Same 58 - Vakavakadewa Vou kei na iVola tale eso（FNVDC12）

1Oi kemuni na dauveiliutaki, sa dodonu li na nomuni lewa?

O ni sa vakatauca li vakadodonu na nomuni lewa

me baleti ira na tamata kecega?

2E segai sara! O ni sa nanuma ga na veika ca mo ni cakava,

Ka vakayacora na i valavala kaukauwa ka cala ena vanua oqo.

3Era sa daulako cala voli ga na tamata ca ena nodra bula taucoko;

Era sa dauvosa lasu me vakatekivu mai na siga era sucu kina.

4Era sa sinai ena ka gaga me vaka na gata,

Ka vakadidivarataka na daligadra me vaka na gata didivara,

5O koya oqo era sa sega kina ni rogoca na domo i koya

na dauuvu bitu ni gata,

Se rogoca na nodra sere se vucu na daucakamana qaseqase.

6Ni musuka na batidra rerevaki na laione oqo, na Kalou.

7Me ra takali yani me vaka na wai sa drodro tani yani,

Me ra vaka na co sa buturaki ena gaunisala.

8Me ra vaka na bosucu sa waicala yani me vaka na qele dregadregata;

Ka vaka na gone sa qai sucu ka sega ni se bau raica na rarama.

9Ni bera ni ra kila, era sa tamusuki sobu me vaka na kau;

Ena uvuci ira tani na Kalou ena nona cudru katakata ni ra se bula tiko.

10Era na marau na tamata yalododonu

ni ra raica ni ra sa totogitaki na tamata i valavala ca;

Era na lako kosova na nodra dra na tamata ca.

11Era na kaya na tamata,

“Sa dina sara, era sa vakaicocovi vakaidina na tamata yalododonu.

Sa dina sara, sa tiko vakaidina e dua na Kalou sa lewa e vuravura.”