2 Veigauna 35 - Vakavakadewa Vou kei na iVola tale eso（FNVDC12）

Solevutaki na Lakosivia(2Tui 23.21-23)

1A cakava talega na solevu ni Lakosivia vei Jiova o Josaia e Jerusalemi; ka ra a vakamatea na lami ni Lakosivia ena i katini kava ni siga ni matai ni vula.

2A lesi ira na bete ki na nodra i tavi, ka vakauqeti ira ena cakacaka ena vale i Jiova.

3A sa tukuna na vosa oqo vei ira kece na Livai ni ra sa dauveivakatavulici vei ira na Isireli ka ra sa savasava vei Jiova, Mo ni la'ki vakatikora na Kato ni Veiyalayalati tabu ki na vale sa tara o na tui o Solomoni na luve i Tevita. Mo ni kakua tale ni qai colata ena tabamuni ka veikauyaka mai na dua na vanua ki na dua tale. Ia oqo mo ni qaravi Jiova na nomuni Kalou kei ira na nona tamata na Isireli.

42Vei 8.14Mo ni vakarautaki kemuni me vaka na nodra veimataqali na nomuni qase me vaka na nomuni i tavi, ka muria tiko na i vakaro volai i Tevita na tui Isireli, kei na i vakaro volai i Solomoni na luvena.

5Ia mo ni tu ena tikina tabu, ka me tiko e dua na i wasewase ni nodra mataqali na Livai ena veimatavuvale kece sara.

6Mo ni vakamatea na lami ni Lakosivia, ka vakasavasavataki kemuni, ka vakarautaki ira na wekamuni, me ra cakava me vaka sa vakarota o Jiova vei Mosese.

7A sa solia o Josaia na tui vei ira na tamata sa soqoni vata mai na i solisoli ki na solevu ni Lakosivia: na lami kei na luve ni me mai na qele ni manumanu ka 30,000 na kedra i wiliwili, kei na 3,000 na bulumakau; a tauri kece oqo mai na veika a nona na tui.

8Era a solisoli ena lomasoli o ira na turaga vei ira na tamata, na bete, kei na Livai. Ia o Ilikaia, o Sakaraia kei Jieli, e ratou lewa na vale ni Kalou, e ratou a solia vei ira na bete e 2,600 na lami kei na luve ni me, kei na 300 na bulumakau me vakayagataki ena Solevu ni Lakosivia.

9E ratou solia talega vei ira na Livai o Konenaia, kei rau na tacina o Semaia, kei Nacanieli, o Esapaia, o Jieli, o Josapati, kei ira na nodra turaga na Livai, e 5,000 na sipi, kei na lima na drau na bulumakau me yaga ki na solevu ni Lakosivia.

10Ia ni a vakarautaki tu na kena cakacaka, era a tu o ira na bete ena nodra i tutu, kei ira na Livai ena nodra i tavi me vaka na i vakaro na tui.

11Era a vakamatea na lami ni Lakosivia, ka kuretaka na dra o ira na bete ka ra a taura mai vei ira na lami, ka drudruga na lami o ira na Livai.

12Era a kauta vakatikitiki na i soro kama me rawa ni ra vota me muria na nodra tiko vakamataqali i tamadra vei ira na i vavakoso, me ra vakacabora vei Jiova me vaka a volai ena i vola i Mosese. A vaka talega kina na bulumakau.

13Lako 12.8,9Era a tavuna na lami ni Lakosivia ena bukawaqa me vaka na kena i valavala, ka ra vakasaqara na i solisoli tabu ena loma ni kuro, ena kuro lelevu, kei na i tavuteke, ka ra sa kauta vakatotolo sara yani me votai vei ira kecega na tamata.

14Ni oti o ya, era a qai vakarautaka na kedra kei na medra na bete mai na kawa i Eroni, baleta ni ra a vakaogai ira sara vakalevu na bete ena kena vakacabori na i soro kama kei na tikina uro me yacova na bogi; era a vakarautaka ga na kedra o ira na Livai kei na kedra na bete mai na kawa i Eroni.

151Vei 25.1Era a tu ena nodra i tutu o ira na dausere na Esava, me vaka na i vakaro i Tevita kei Esava, kei Imani, kei Ajitucuni na nona parofita na tui; era a tiko na i vakatawa ena nodra dui matamata ni koro, ni ra a sega ni biuta na nodra i tavi, ka ra vakarautaka na kedra o ira na wekadra na Livai.

16A vakarautaki na cakacaka kece i Jiova ena siga o ya, me qaravi na Solevu ni Lakosivia, ka vakacabori na i soro kama ena dela ni cabocabonisoro i Jiova, me vaka na lewa i Josaia na tui.

17Lako 12.1-20Era a qarava na Solevu ni Lakosivia kei na Solevu ni Madrai Sega ni Vakatubu me siga vitu o ira kece na Isireli era tiko kina.

18A sega mada ga ni dua na Solevu ni Lakosivia a caka e Isireli me tautauvata kaya oqo, me vakatekivu mai na gauna i Samuela na parofita; ka segai talega ni dua vei ira kece na tui Isireli me a vakayacora e dua na Solevu ni Lakosivia me tautauvata kei na kena sa cakava o Josaia, o ira na bete, kei na Livai, kei na Juta, kei ira na Isireli era a tiko kina, kei ira na kai Jerusalemi.

19E a qaravi na Solevu ni Lakosivia oqo ena i katini kawalu ni yabaki vakatui i Josaia.

Na i Cavacava ni Veiliutaki i Josaia(2Tui 23.28-30)

20Ni sa qarava oti o Josaia na tui na kena biu vakadodonu tale na veika kece sara me baleta na Valenisoro, a sa lako cake o Niko na tui Ijipita me kabai Kakimisi ena bati ni uciwai na Uferetisi. A sa via tarovi koya o Josaia,

21ia sa vakadewataka ga mai vua o Niko na i tukutuku oqo: A cava beka me'u vala kina kei kemuni na tui Juta? Au sa sega ni mai vala kei kemuni ena siga oqo; ia vei ira ga na mataqali ka'u sa vala tiko kei ira; ka sa vakaroti au na Kalou me'u vakusakusa. Mo kakua kina ni vorata na Kalou, o koya sa tiko kei au, de na qai vakarusai iko o koya.

22Ia sa bese ga ni gole tani mai vua o Josaia; a sa mani lako vakavuni ga yani me rawa ni vala tikoga kina kei koya. A sa sega ni vakarogorogo o Josaia ki na vosa i Niko ka sa lako mai na gusu ni Kalou, ka sa lako ga yani me vala ena buca o Mekito.

23Era a qai vanai Josaia na tui Juta o ira na dauvana, ka kaya na tui vei ira na nona tamata, Ni kauti au tani, ni'u sa mavoa sara vakaca.

24Era a kauti koya na nona tamata mai na nona qiqinivalu, ka ra vakavodoki koya ki na i karua ni nona qiqi, ka kauti koya yani ki Jerusalemi. A ciba o koya, ka bulu ena kedra i bulubulu na nona qase. Era a tagicaki koya kecega na Juta kei ira na kai Jerusalemi.

25A osivaki Josaia o Jeremaia na parofita; ka ra tagilagalagataki Josaia o ira kecega na tagane kei na yalewa dausere ena nodra lele me yacova na siga oqo. Era a vakarota me cavuti tiko e Isireli, ka raica, sa volai tu ena vakaloloku.

26Ia na vo ni cakacaka i Josaia, kei na nona i valavala vinaka, me vaka a volai ena vunau i Jiova,

27kei na nona cakacaka mai na kena i tekivu kei na kena i otioti, raica, sa volai ena Kedra i Vola na Tui Isireli kei Juta.