Isikeli 27 - Vakavakadewa Vou kei na iVola tale eso（FNVDC12）

A Sere ni Lolosi me Baleti Taia

1A yaco vei au na vosa i Jiova, ka vaka:

2“Ia oqo o iko na luve ni tamata, me taurivaka na lele ena vuku i Taia,

3na koro ka toka ena gusu ni toba, ka nodra vanua na dauveivoli e vuqa ena veivanua e baravi, sa kaya vakaoqo na Kalou o Jiova:

O iko Taia, o sa dau kaya,

‘Au sa koro totoka vakaoti.’

4Na kemu i yalayala

Sa koto ena boto ni sauloa;

Sa uasivi na nodra tarai iko

na kemu matai.

5Era a cakava me nomu kau kece sara

Mai na damanu mai Seniri;

Era sa taura na sitari mai Lepanoni

Me sivi kina na kemu i vana.

6Era a cakava me kemu i voce

Mai na oki ni Pasani;

Era cakava me nomu buturara

Mai na kau sa vakarautaki mai Saipurusi,

Ka sa ukucavutaki vinaka ena ivori.

7Ia na laca mo vakarewataka

sai koya na lineni matailalai mai Ijipita;

Ka sa nomu drotini ni waqa

na i sulu karakarawa ka lokaloka

mai na baravi kei Ilaisa,

Ka sa nomu i vakaruru talega.

8Era sa nomu dauvoce

O ira na kai Saitoni kei Arivati;

Era nomu kavetani,

O ira na kena dau mai Semeri.

9Era nomu kai waqa na qase mai Keperi,

Kei ira na kena tamata vuku,

Era dau ni sausaubulu e waqa;

Era sa nomu na waqa kece ni wasawasa

Kei ira na kena dausoko,

Me ra volitaka na nomu i yau.”

10“Era sa lewe ni nomu mataivalu na kai Peresia, na kai Luti, kei na kai Puti me ra nomu tamata i valu; era rubeca e tikimu na i sasabai kei na i sala; era vakaraitaka na kemu totoka, kilikili ka lagilagi.

11Era sa tu volivolita na kemu bai kei na veiyasana, o ira na kai Arivati kei Eleki, ka ra tawana na nomu vale cere-i-cake o ira na kai Kamati; era rubeca na nodra i sasabai ena kena lalaga kei na veitikina; era sa cakava me uasivi vakaoti na kemu totoka.

12“Sa dauveivoli kei iko na koro o Tasisi, ena vuku ni nomu i yau levu, ena kedra veimataqali kecega; na siliva, na kaukamea, na tini kei na uma, era mai veivoli ka veisautaka kei na nomu i yau.

13Era dau veivoli kei iko o Javena, o Tuvali, kei Meseki; na tamata kei na i yaya parasa era veisau kei na i yaya ni veivoli.

14O ira na mataqali i Pecitokama era veivolitaka na nomu i yau ni veivoli, kei na ose, na ose ni valu, kei na meuli, ena nomu rara ni veivoli.

15Era dau veivoli kei iko o ira na kai Rotisi. E vuqa na veivanua e baravi, e nomu vanua ni veivoli digitaki, era kauta mai vei iko me i voli na i leu ivori eso kei na eponi.

16Sa dau veivoli kei iko o Itomi, ni sa ka levu na i yaya o bulia; era veivolitaka na nomu i yaya ni veivoli, na emerelita, kei na i sulu lokaloka, na i sulu vakatalitali, na lineni matailalai, na lase, kei na veimataqali vatu talei.

17E rau dau veivoli kei iko o Juta kei na vanua o Isireli; era volitaka na nomu i yau ni veivoli, o ya na witi, na oni, na waiwai olive, kei na i saluwaki eso.

18Sa dau veivoli kei iko o Tamasiko ena vuku ni yau kei na i yaya o bulia, kei na levu ni nomu i yau, ena veimataqali kecega; ena waini mai Eliponi kei na vutika ni sipi vulavula.

19Na waini mai Usali era volitaki kei na nomu i yaya ni veivoli; na kaukamea tuki, na kasia, kei na i saluwaki, ka ra veisautaki kei na nomu i yaya ni veivoli.

20O Titani sa dau veivoli kei iko ena vuku ni tatara ni dabedabe ni vodo ose.

21Era dau veivoli vinaka kei ira na Arapea, kei na turaga kecega ni Kitari ena voli lami, na sipi tagane, kei na me; era dau veivoli kei iko ena veika oqo.

22Era dau veivoli kei iko o ira na dauveivoli mai Sipa, mai Reama ena nomu i yau ni veivoli, na kena ka uasivi sara ena veimataqali vuanikau boi vinaka, kei na vatu talei kecega, kei na koula.

23O Arana, o Kane, o Iteni, o Asuri, kei Kalimati era a dau veivoli kei iko.

24O ira oqo era sa dau veivoli kei iko ena veimataqali i sulu digitaki kecega, ena i sulu karakarawa, na kena ka caka vakatalitali, kei na ibe tali ena dui roka, ka vauci ena wa tudei; era veivoli kei iko o ira oqo.

25Era na usa na nomu i yaya ki na vanua ni veivoli o ira na waqa ni Tasisi.

Ia o sa tawa vinaka,

Ka usa bi sara,

E lomadonu ni wasawasa.

26Era a vocetaki iko yani na dauvoce

Ki na dua na wasawasa levu.

Sa labati iko na cagi tokalau

E lomadonu ni wasawasa,

27Na nomu yau talei,

Na nomu i yaya,

Na nomu i voli,

Na nomu kai waqa,

Na nomu kavetani,

Na nomu dausaubulu waqa,

Na nomu dauveivoli ena i yau ni veivoli,

Na nomu tamata i valu ka ra tiko kei iko,

Kei ira na nomu lewe ni lawalawa ka ra tiko kei iko,

Era sa lutu dromu ki na boto ni wasawasa

Ena siga o lutu dromu kina.

28Sa sakure na loma ni vanua,

Ena domo ni nodra kaila na kavetani,

29Ka ra sobu mai na nodra waqa

O ira kecega na lewe ni dauvoce,

Na lewe ni waqa

Kei ira na kavetani ni soko e wasawasa

Ka ra na tucake tu e baravi,

30Ka ra na tabalaka na domodra

Ni ra sa tagicaki iko,

Ka tagi sara ni rarawa levu.

Era ubia na uludra ena qele,

Ka ra vaqiqiqi ena dravusa;

31Era tasia sara na uludra ena vukumu,

Ka sulumaka na i sulu taga,

Ka ra ia na tagi yaso,

Ka ra osivaki iko,

Ena rarawa levu ni yalodra,

Vata kei na vakaloloku bibi sara.

32Ena nodra qoqolou tiko

Era sa tagilagalaga ena vukumu,

Ia era tagicaki iko ena rarawa:

‘Na koro cava tale beka ka vakarusai

Me vakataki Taia ena loma ni wasawasa,

33Ni sa vakasoburi ki vanua na nomu i yau

Ka usani mai wasawasa,

Era vakacegui ira kina na lewe vuqa;

Ni sa bini tu na nomu i yau

Kei na i yau volitaki,

Ka vakavutuniyautaki ira na tui ni veivanua e vuravura.

34Ia oqo o a voca ka kasere sara

Mai na ua ni wasawasa ena loma ni wai titobu;

Era sa lutu dromu

Vata kei iko na nomu waqa.’

35“Era sa domobulataki iko o ira kecega na lewe ni veikoro e baravi; ka ra sa rere ka taqaya vakaidina o ira na nodra tui, ka sa veisoroyaki na matadra.

36Era sa katasisitaki iko na dauveivoli vei ira na tamata; ka qai yacovi iko na i tinitini rerevaki o na qai yali sara kina ka tawa mudu.”