1A sa vosa tale vei Jona o Jiova, ka kaya,
2“Mo lako ki na koro levu o Ninive ka la'ki vunautaka vei ira na tamata na i tukutuku ka'u na solia vei iko.”
3A sa qai talairawarawa o Jona ki na vosa i Jiova, a sa lako ki Ninive, e dua na koro levu ka sa taura e tolu na siga na kena lako takosovi.
4Maciu 12.41; Luke 11.32A sa tekivu o Jona me lako kosova na koro, ia ni oti e dua na siga na nona lako voli, a sa vakatekivu me vunau ka kaya, “Sa vo ga e vasagavulu na siga me vakarusai kina o Ninive!”
5Era sa vakabauta na vosa ni Kalou na kai Ninive. Ia era a qai lewa me ra lolo na tamata kecega, a tekivu sara mai vei ira era cecere me yacovi ira era lalai sara, me ra vakaisulu taga me ra vakaraitaka na nodra sa veivutuni.
6Ia ni sa rogoca na tui Ninive, a sa tucake mai na nona i dabedabe vakatui, sa luvata na nona i sulu vakatui ka daramaka na i sulu taga me la'ki tiko sobu ena dravusa.
7Sa qai vakauta e dua na i tukutuku vei ira na lewe i Ninive me vakaoqo: “Oqo na i vakaro mai vua na tui kei ira na nona vakailesilesi: me kakua sara ni dua me kania e dua na ka; na tamata kece sara, na bulumakau, kei na sipi me ra kakua ni kania e dua na ka se me ra gunu.
8Na tamata kece sara kei ira na manumanu kece me ra vakaisulu taga. Na tamata yadua me masu vagumatua vua na Kalou ka me biuta talega na nona i valavala kei na i vakarau ca.
9De sa na veisautaka kina na lomana na Kalou; de sa na oti beka kina na nona cudruvi keda, ka da na qai sega ni mate!”
10A sa raica na Kalou na ka era sa vakayacora; a sa raica ni ra sa biuta tani na nodra i valavala vakasisila. Sa qai mani veisautaka kina na lomana ka sega ni cudruvi ira me vaka sa kaya oti ni na vakayacora.
Who We AreWhat We EelieveWhat We Do
2025 by iamachristian.org,Inc All rights reserved.
