1Ena siga sa vakabulai Tevita kina o Jiova mai na ligadra na nona meca kecega kei na liga i Saula, sa qai lagata kina o Tevita na qaqa ni sere oqo vei Jiova:
2A noqu uluvatu o Jiova;
Sa i koya ga na noqu bai kaukauwa.
3Na noqu Kalou sa dau taqomaki au,
ka'u sa vakarurugi vua.
Sa dau taqomaki au me vaka na i sasabai;
A noqu bai kaukauwa ka noqu i vunivuni o koya.
O koya sa noqu i vakabula;
sa maroroi au ka vueti au mai na i tovo kaukauwa.
4A voqa yani na noqu kaci vei Jiova, o koya sa kilikili me vakacaucautaki,
Ka'u sa vakabulai mai vei ira na kequ meca.
Me lagiti o Jiova!
5Sa vakavolivoliti au na biau ni mate;
Ka sa ologi au na ua ni veivakacacani.
6Sa vakavivigi au na i vesu nei bulubulu,
Ka sa tu e mataqu na i cori ni mate.
7Ena dela ni noqu rarawa, au a tagi vei Jiova;
Ka kaci veivuke vua na noqu Kalou.
A sa rogoca na domoqu mai na nona vale tabu,
Ka vagolea na daligana ki na noqu tagi ni kere veivuke.
8Sa qai yavavala na vanua ka sautaninini;
Sa kureitaki na vu ni lomalagi
Ka sa uneune, baleta ni sa cudru o koya.
9Sa kuvu cake na kubou mai ucuna,
Ka caudre mai gusuna na bukawaqa
Kei na qilaiso katakata.
10Sa basuka na lomalagi ka siro sobu mai,
Kei na o butobuto ena ruku ni yavana.
11A sa vuka vakatotolo ena nona jerupi;
Ka veitosoyaki voli ena taba ni cagi.
12A sa solegi koya ena butobuto;
Sa viribaiti koya na o loaloa vavaku suasua;
13Ka caudre cake mai na qilaiso waqa
ena livaliva sa koto e matana.
14Sa kurukuru mai lomalagi o Jiova,
ka sa rogo cake na domo i Koya sa Cecere Sara.
15A sa vanataka na nona gasau ni dakaititi
ka ra veiseyaki kina na meca;
sa vakacicivi ira ena tibi ni livaliva.
16Sa rairai na dreke ni wai ni wasa liwa,
Ka sa vakavotui mai na yavu ni vuravura,
Ni sa vunauca o Jiova,
Ni sa tasoro na i cegu mai na ucuna.
17“A sa tatara mai cake o Jiova, ka tauri au,
Sa vueti au o koya mai na wasawasa e vuqa.
18Sa vakabulai au mai vei ira na kequ meca kaukauwa,
Mai vei ira kece sa cati au —
Ni ra sa rui kaukauwa cake vei au.
19Ni'u a tiko leqa, era sa vakasosataki au,
Ia sa taqomaki au ga o Jiova.
20Sa vukei au ena veileqa eso;
Sa vakabulai au, ni sa dau vinakati au.
21“Sa sauma vei au o Jiova ni'u sa daucaka dodonu;
Sa vakalougatataki au ni sa sega na noqu cala.
22Au sa talairawarawa ki na lawa i Jiova;
Au se sega ni vuki tani mai vua na noqu Kalou.
23Ni sa tu ga e mataqu na nona lawa kecega,
Ka'u sega ni gole tani mai na nona i vakaro.
24Sa kila o koya na dodonu ni yaloqu,
Ni'u sa dau maroroi au mai na caka ca.
25O koya oqo sa sauma kina vei au o Jiova
Me vaka na noqu i valavala dodonu,
Ni sa kila na savasava ni lomaqu.
26I Jiova, o ni sa dau yalodina vei ira sa dau yalodina vei kemuni,
Ka dau vinaka vei ira sa vinaka sara.
27O ni sa cakacaka vakayalododonu vei ira sa yalododonu,
Ia sa veisaqasaqa ga kei ira sa dauloma ca.
28O ni sa dauvakabulai ira era sa yalomalumalumu,
Ia o ni sa vakamalumalumutaki ira ga era sa viavialevu ka dokadoka.
29Oi kemuni Jiova na noqu vu-ni-rarama;
O ni sa vakararamataka na noqu butobuto.
30O ni sa dau ia na veivakaukauwataki
Me'u ravuti ira rawa kina na kequ meca,
Ka rawa na nodra sasaga ni tataqomaki.
31Na Kalou oqo sa vinaka vakaoti na nona i valavala,
Sa vakadinati sara na nona vosa!
Ni sa vaka na i sasabai o koya
Vei ira sa gadreva na nona veimaroroi.
32Sa Kalou duadua ga o Jiova;
Sa noda i sasabai ga na Kalou.
33Sa noqu bai kaukauwa ga na Kalou oqo;
Sa taqomaka na noqu i lakolako o koya.
34Sa bulia me dei na yavaqu me vaka na dia;
Sa maroroi au vinaka ena veidelana.
35Sa vakavulici au ena veika vakai valu,
Me'u rawa ni'u vanataka kina na dakaititi kaukauwa sara.
36I Jiova, o ni sa taqomaki au ka vakabulai au;
Na nomuni veivuke loloma sa laveti au cake.
37O ni sa maroroi au me'u kakua ni vesu,
Ka'u se sega vakadua ni bale.
38Au a vakasasataki ira na kequ meca ka vakadrukai ira;
Au a sega sara ni cegu me yacova ni'u sa vakarusai ira.
39Au a mokuti ira ka ra sega ni tucake tale;
E a sa sega ni tucake rawa tale;
Io, era sa bale sobu ena ruku ni yavaqu.
40O ni sa vakaukauwataki au ena i valu
Kei na noqu qaqa vei ira kequ meca.
41O ni sa vukici ira na kequ meca me ra dro tani mai vei au,
Me'u vakarusai ira era sa cati au.
42Era sa kere veivuke voli, ka sa sega e dua me vakabulai ira,
era tagi vei Jiova, ka sega ni vosa vei ira o koya.
43Au sa butuqaqi ira, ka ra sa vaka na kuvu ni qele;
Ka'u sa butubutuki ira me vaka na soso e gaunisala.
44O ni sa vakabulai au mai vei ira na noqu tamata veilecayaki
Ka maroroya na noqu veiliutaki ena veimatanitu;
Era sa yaco me noqu tamata o ira ka'u a sega ni kilai ira tu eliu.
45Era sa vakarokorokotaki au na vulagi;
Ni ra sa rogoci au, era sa talairawarawa sara.
46Era sa yalolailai na vulagi;
Era sa lako rerere mai na nodra i vunivuni.
47Sa bula o Jiova! Sa cecere na noqu uluvatu!
Kacivaka na cecere i koya na Kalou kaukauwa sa vakabulai au!
48Sa solia vei au na qaqa vei ira na kequ meca;
Ka vakamalumalumutaki ira na veivanua e rukuqu
49Ka kauti au tani mai vei ira na noqu meca.
I Jiova, o ni sa solia vei au na qaqa vei ira sa saqati au,
Ka taqomaki au mai vei ira na tamata i tovo kaukauwa.
50O koya oqo ka'u sa vakacaucautaki kemuni kina
Ena kedra maliwa na veivanua;
Ka seretaka na yacamuni.
51Na Kalou sa solia na qaqa vua na nona tui;
Sa solia na nona loloma tudei vua na nona i lumuti,
Io, vei Tevita kei na nona kawa me tawamudu.”
Who We AreWhat We EelieveWhat We Do
2025 by iamachristian.org,Inc All rights reserved.
