Aisea 56 - Vakavakadewa Vou kei na iVola tale eso（FNVDC12）

Veivakabulai ni Kalou ki na Tamata Kece

1A sa kaya o Jiova vei ira na nona tamata,

“Au sa na vakarau vakabulai kemuni

Ka vakaraitaka na noqu veisereki.

Ia ni vakayacora na veika dodonu ka savasava.

2Au na vakalougatataki ira era sa maroroya

Na Siga ni Vakacecegu,

Ka sega ni vakacacana.

Au na vakalougatataki ira era sega ni cakava e dua na ka ca.”

3Me kakua ni kaya na tamata vulagi sa mai duavata

Kei na tamata ni Kalou.

Ena tawasei au tani dina o Jiova mai vei ira na nona tamata

Me'u kakua ni qaravi koya.”

4 Ym 3.14,15 A sa kaya o Jiova,

“Na vulagi e vakatabuya na Siga ni Vakacecegu

Ka digia me vakayacora na ka sa vinaka vei au

Ka maroroya na noqu veiyalayalati,

5au na dau nanumi na yacana ena noqu Valenisoro

Kei na kedra maliwa na noqu tamata

Ena dua na gauna balavu sara.

Ena sega sara ni guilecavi o koya.”

6A sa kaya o Jiova vei ira na vulagi,

“Era sa mai duavata kei ira na nona tamata;

O ira era sa lomani Jiova ka qaravi koya,

O ira era sa vakatabuya na Siga ni Vakacecegu

Ka yalodina ki na nona veiyalayalati.

7 Maciu 21.13; Mari 11.17; Luke 19.46 “Au na kauti kemuni mai ki noqu ulunivanua tabu,

Ka solia vei kemuni na reki ena noqu vale ni masu.

Na nodra i soro kama kei na i madrali

Ka'u na vakadonuya ena noqu i cabocabonisoro;

Na noqu vale ena vakatokai

Me nodra vale ni masu na veimatanitu kecega.”

8A sa kaya na Turaga na Kalou,

O koya sa kauti ira lesu mai na Isireli era vakabobulataki,

“Au na kauti ira tale mai eso era sa sega ni lako mai.”

Vosataki o Ira na i Liuliu kei Isireli

9A sa kaya o Jiova,

“Ni lako mai na veimatanitu me vaka na manumanu daukata

Mai loma ni veikau ka tilomi ira na noqu tamata.

10Kemuni kece na i liuliu

E dodonu mo ni vunauci ira na noqu tamata;

O ni sa mataboko ka sega ni kila e dua na ka.

Era sa vaka na koli sa sega ni dau kodro,

Ka ra sa dau davo voli ga ka tadra;

Era sa dau gadreva tu ga me ra moce.

11Era sa vaka na koli dau kana

Ka ra sa sega ni mamau rawa.

Era sai liuliu sega ni vakasama.

Era sa dui cakava ga na ka era vinakata

Ka qara na ka ga e dui baleti ira.

12Era sa kaya,

‘Me mai kau eso na waini

Ka gunuva na ka eda rawata.

Ena vinaka cake na siga ni mataka

Mai na siga edaidai.’ ”