1O sa valavalaca na luvequ? Kua ni cakava tale; mo qai masulaka ga me vosoti na nomu ivalavalaca e liu.
2Drovaka na ivalavalaca me vaka na gata; kevaka o torova yani na ivalavalaca, e na kati iko. Na batina na bati ni laione, e vakamavoataka na yalo ni tamata.
3Na beci lawa e vaka na iseleiwau batirua; e sega ni mavo rawa na kena mavoa.
4Na rere vakadomobula kei na ivakarau kaukaua, e na yali kina na nona iyau; e na qeyavu tale ga kina na vale ni viavialevu.
5 Sr 35.17-19 Na masu ni tamata dravudravua, e biuta ga na tebenigusuna, cabe vakadodonu i daliga ni Kalou, qai yaco sara na kena isau.
6O koya e cata na vakadodonutaki, e muria tiko na mawe ni dauvalavalaca; o koya e doka na Turaga, e na veivutuni e yalona.
7O koya e dau vosa matau, e kilai raraba; na tamata vuku, ke mani cala, e kila vinaka.
8Na nona tara nona vale e dua e na nodra ilavo na tamata tale e so, e vaka na nona kumuna tiko na vatu ni kena ibulubulu.
9Na nodra soqoni na tamata ca e vaka na buka e bini vata; era na tini ga e na kama.
10Na nodra gaunisala na dauvalavalaca e tuva vinaka tu e na vatu, ia e muana, e koto kina na qara mai Etesi.
Vuku kei na lialia11O koya e rokova na lawa, e lewa vakamatau na nona vakasama; na yalomatua e votuka ni doka na Turaga.
12O koya e sega ni vuku, e sega ni rawa ni vakavulici, ia e dua na mataqali vuku e kuria na yalorarawa.
13Na kilaka ni tamata yalomatua e na tubu vaka na waluvu, nona ivakasala vaka na wai tovure.
14Na mona ni tamata lialia e vaka na tavaya kavoro, e sega ni katona rawa na vuli.
15Ni rogoca na tamata kilaka e dua na ivosavosa vuku, e na vakacaucautaka qai kuria;
ni rogoca na lialia, e sevaka qai biuta i dakuna.
16Na italanoa ni tamata lialia e vaka na icolacola e na taubale, ia e matalau na rogoca na vosa ni tamata vuku.
17Na vosa ni tamata vuku e na namaki e na soqoni, era na dau vakasamataka voli nona vosa.
18Vua na lialia, na vuku e vaka na vale sa rusa; ni vakaraitaka na nona vakasama na tamata lecaika, e sega ni vakaibalebale.
19Vua na tamata yalowai, na vuli e vaka na ivesu, e vaka na iqamuniliga.
20Na lialia e tabalaka cake na domona ni dredre, ia na tamata vuku e sigege ga na batina.
21Vua na tamata yalomatua, na vuli e vaka na iukuuku koula, e vaka na qato ni liga.
22Na yava ni lialia e butu sara vakadodonu e lomanivale, ia na tamata matua e wawa e matanivale.
23Na dogadoga e vakairoiro i lomanivale, ia na tamata vuli e tu ga vakarokoroko e tuba.
24E ivakarau ca me dua e vakarorogo tu e katuba, e rarawataka na tamata vakaitovo na veibeci qo.
25O ira na dau kakase era siova na ka e sega ni nodra, ia o ira na dau lewa maqosa era taqomaka na gusudra.
26Na nodra vakasama na lialia e tu e gusudra, ia na gusudra na tamata yalomatua e tiko e nodra vakasama.
27Ni ruka na kena meca na tamata ca, e ruki koya ga vakataki koya.
28Na daukakase, e vakadukadukalitaki koya, e sevaki e na nona mataitikotiko.
Who We AreWhat We EelieveWhat We Do
2025 by iamachristian.org,Inc All rights reserved.
