1Sa qai lagata o Udite e matadra na Isireli na sere ni vakavinavinaka qo, ra lagata vata kece vakadomoilevu na lewenivanua.
2A kaya o Udite:
“Ni sere vua na noqu Kalou e na tibereli,
ni sere vua na noqu Turaga e na sibali.
Ni laga vua na same vou,
ni vakacerecerei koya, ni kacivi koya,
3ni Kalou na Turaga e dau butuqaqia na ivalu,
sa vakabulai yau vei ira na cemuri yau,
vakacurumi yau i na nodra keba na nona tamata.
4“E sirova mai na kai Asiria na veiulunivanua mai na vualiku,
era salavata mai na oba vakaoba na sotia,
na kedra levu e oso kina na veibuca,
nodra mataivalu ose e robota na veidelana.
5A bolea me visa na noqu vanua,
me mokuti ira na noqu cauravou e na iselewau,
me tavulaki ira na gone dramidrami e na qele,
vesuki ira na luvequ mera vakalolomataki,
noqu daulato mera itokinivalu.
6“Ia sa vakaseva na Kalou sau na nodra inaki e na dua na yalewa.
7E sega ni bale na nodra qaqa e ligadra na cauravou
se mera ravuti koya na kawa ni qarikau,
se mera yaki koya na tuwawa vakaitamera;
o Udite ga na luve i Merari a rawati koya e na totoka ni matana.
8“A luvata na isulu ni vakaloloku ni yada
mera vakacerecerei kina na kai Isireli vakaloloma.
A lumuta na matana, vauca na uluna,
qai vakavinivo lineni me temaki koya kina.
9Na nona ivava a vakacala na matana,
na kena totoka a vesuka na yalona,
na iselewau a tagutuva na domona.
10Era sautaninini na kai Peresia e na nona yaloqaqa,
ra kilavaka na kai Mitia na nona doudou.
11“Era sa qai kaila e na reki na noqu tamata vakaloloma;
era kaila na malumalumu, era sautaninini kina na meca;
era kaila sara e cake, era suka kina na meca.
12Era sa suaki ira na luve ni vada,
era mavoa vaka na luve ni isenivalu,
era mate e na ivalu ni noqu Turaga.
13“Au na laga vua na noqu Kalou na sere vou:
Kemuni na Turaga, oni cecere,
oni lagilagi, oni kaukaua vakaoti, oni tabusoro.
14Mera qaravi kemuni na veikabuli kece;
nomuni vosa ga era a buli kina.
Oni a ceguvi ira, era sa vakavotukana;
e sega ni dua me vorata na domomuni.
15“Era na kuretaki na ulunivanua kei na wasawasa;
e na waicala e matamuni na vatu me vaka na kadrala,
ia o ira na dokai kemuni,
oni na lomani ira tiko ga.
16“Na isoro boi vinaka kece e ka wale;
e ka wale sara na uro kece ni isoro kama vei kemuni;
o koya ga e rerevaka na Turaga,
e na ka levu tawamudu.
17“Kalouca na matanitu e via valuta na noqu tamata!
E na saumi koya na Kalou sau e na siga ni lewa;
e na kuitataka na yagodra e na buka kei na ulo,
era na tagi lagalaga tawamudu.”
Sa rogo o Udite18Nodra yaco i Jerusalemi, era sa qarava na Kalou. Era vakasavasavataki oti ga na tamata, sa cabo sara na isoro kama, na isolisoli, kei na iloloma.
19Sa cabora tale ga o Udite vua na Kalou na iyau kece nei Oloferenesi a soli vua, kei na taunamu a uruca mai na nona idavodavo.
20Era mani solevu vula tolu e Jerusalemi e mata ni vale tabu vata kei Udite.
21Oti, era dui lesu i nona yavu, sa mani lesu o Udite i Beculia me bika yavu; a rokovi e na nona gauna e na vanua taucoko.
22Era lewe levu era via vosaki koya, ia a bula vakadawai e na veisiga ni nona bula ni sa toki yani na watina o Manase.
23Sa tubu ga na kena irogorogo, sa qai qase mai e na vale nei watina me yacova ni sa yabaki dua na drau ka lima. Sa sereka na nona vada. Sa mate e Beculia qai bulu vata kei Manase na watina e na qaravatu,
24sa qai siga vitu nodra lolositaki koya na vanua o Isireli. Ni se bera ni mate, a vota na nona iyau vei ira kece na wekana voleka kei ira na weka i Manase.
25E na gauna nei Udite kei na gauna balavu ni sa mate oti, e sega tale ni dua me vakarerei ira na Isireli.
Who We AreWhat We EelieveWhat We Do
2025 by iamachristian.org,Inc All rights reserved.
