Dauvunau 3 - Vakavakadewa Vou kei na iVola tale eso（FNVDC12）

Sa Dui Vagauna na Ka Kece

1Sa dui vagauna na ka kecega,

Ka tu na gauna lokuci ni veika sa caka e ruku i lomalagi:

2Na gauna ni sucu, kei na gauna ni mate,

Na gauna ni teitei, kei na gauna ni tatamusuki;

3Na gauna ni veivakamatei, kei na gauna ni veivakabulai;

Na gauna ni basuraka sobu na ka, kei na gauna ni tara cake na ka;

4Na gauna ni rarawa, kei na gauna ni marau;

Na gauna ni vakaloloku, kei na gauna ni meke;

5Na gauna ni veidomoni, kei na gauna me kakua kina na veidomoni;

Na gauna ni veimokoti, kei na gauna me kakua kina na veimokoti;

6Na gauna ni vakasaqaqara, kei na gauna ni vakasavuliga;

Na gauna ni mamaroroi, kei na gauna ni vakasabusabu;

7Na gauna ni dresulaka na ka, kei na gauna ni culacula;

Na gauna ni vakanomodi, kei na gauna ni vosa;

8Na gauna ni veilomani, kei na gauna ni veicati;

Na gauna ni veivaluvaluti, kei na gauna ni veisaututaki.

9Na cava mada li ena rawata na tamata mai na nona cakacaka kecega?

10Au sa kila na veika dredre sa lewa na Kalou me da sota kaya.

11Sa lewa o koya na gauna dodonu me baleta na ka kecega. Sa solia vei keda na gagadre me da kila na gauna sa bera mai, ia sa sega ni solia me da kila taucoko sara na veika sa cakava na Kalou.

12Au sa qai kila ni sega tale ni dua na ka e vinaka cake vua na tamata me cakava, ia me marau ga ka cakava na ka vinaka e rawa ni cakava.

13Sa dodonu ga me da kana, gunu ka marautaka na ka eda rawata. Sa i solisoli ni Kalou oqo.

14Au sa kila ni veika kece sa cakava na Kalou ena tudei ka sega ni mudu. E sega ni rawa mo kuria tale e dua na ka se mo kauta tani mai kina e dua na ka. Sa dua na ka sa cakava na Kalou, o ya me vakavuna me da rerevaki koya.

15Na veika e yaco tiko sa yaco taumada, kei na veika e vakarau yaco e sa yaco oti. Sa vakavuna na Kalou na veika vata oqori me dau yaco tikoga vakawasoma.

A Veika e Tawa Dodonu e Vuravura

16Me kuria, au sa raica talega ni sa rawa mo kunea ena vuravura oqo na i valavala ca ena vanua e dodonu me kune kina na lewa dodonu kei na ka dina.

17Au a qai kaya e lomaqu, Na Kalou ena lewai ira vakatautauvata na i valavala ca kei ira na i valavala dodonu, baleta ni ka kecega kei na ka kece e vakayacori era na dui yaco ga ena kena gauna sa lewai oti tu.

18Au sa qai raica na Kalou sa vakatovolei ira na tamata me vakaraitaka kina vei ira ni ra sa sega ni vinaka cake mai vei ira na manumanu.

19Ni sa tautauvata ga na ka sa yacovi ira na tamata vata kei ira na manumanu, sa mate o koya me vakataki ira talega na manumanu. E rau sa tautauvata ga. Sa sega ni vinaka cake na tamata mai na manumanu baleta ni sa sega ni vakaibalebale ruarua vei rau na bula.

20E rau sa gole vata ga ki na dua ga na vanua, sai koya na kuvu ni soso, e rau sa lako ruarua mai kina ia e rau na lesu ruarua talega kina.

21E rawa vakacava me dua me vakadinadinataka ni lako cake na yalo ni tamata ka lako sobu ki na qele na yalo ni manumanu.

22Ia au sa qai la'ki raica ni ka uasivi duadua e rawa me cakava e dua na tamata sai koya me marautaka na nona cakacaka. E sega tale ni rawa ni cakava e dua na ka. Sa sega tale ni dua na sala me kila rawa kina na ka e yaco ni sa mate o koya.