Jope 5 - Vakavakadewa Vou kei na iVola tale eso（FNVDC12）

1I Jope, mo yalo vinaka ka kaci mada yani.

De lakolako ena sauma mai e dua.

2Na nomu vakaleqa vakasivia na lomamu ena nomu yalo ca,

Sa rui ka lialia ka yalowai talega.

3Au raica na tamata e lialia vakalevu sara

Ni tiko dei ga ka tiko vinaka;

Ia a qai lutuka vakasauri na nona vale e dua na sau me vu ni

Nona mate.

4O ira na luvena era sega ni tiko vinaka rawa,

Ni ra na buturaki kecega e matamata,

Ka sega ni dua e vukei ira rawa.

5O ira ga na viakana tu, era na rawa ni kania na ka e tea na lialia;

Ka ra kania talega na sila ka tubu tu vakaveitalia;

Ia na nona i yau kecega, era na veidomoyaka na daugunu dra.

6E sega ni dau bula ena qele na leqa kei na i valavala ca.

7E sega sara ga!

Ia na tamata duadua sara ga e dau vakaleqai koya tu ga,

Me vaka ni rui ka dina sara na kena dau lidi na bukawaqa.

8Oqo ga na noqu i vakasala:

Gole sara ga oqo vua na Kalou ka tusanaka vua na nomu cala.

9 Sr 43.32 E dredre me da kila rawa, na ka lelevu e dau cakava;

Kei na nona cakacaka mana ni sega ni dau vakaiyalayala.

10Sa vakatauca mai o koya na uca ki na qele,

Ka vakasuasuataka na veilomanivanua.

11Io, o ira na yalo malumalumu sa laveti ira cake na Kalou,

Ka vakamarautaki ira era tiko vakaloloku.

12Sa vakasevai ira na tamata lawaki ca ena nodra i naki,

13 1Kori 3.19 Ka vakatacoritaki ira na tamata qaseqase ena nodra i lawaki,

Ka me kakua kina ni yaco rawa na ka era dau bukiveretaka.

14Ia ni sigalevu tutu sara tu mada ga,

Ena vaka ga na butobuto ni ra vakayayamo voli ga.

15Na Kalou ga sa taqomaki ira na luveniyali mai vei ira na daulawaki;

Ka maroroi ira na vakaloloma kei na dravudravua

Mai na veivakasaurarataki ni tamata i tovo kaukauwa.

16O koya sa qai nodra kina na nuidei na tamata tu vakaca

Ni ra sa tababokoci na tamata i valavala ca.

17 Vbale 3.11,12; Ipe 12.5,6 Me qai marau sara mada na tamata sa vakadodonutaka na Kalou!

Na nona vunauci iko na Tamada,

Mo kakua ni lule se yalocataka.

18 Osea 6.1 Na mavoa kecega sa vakayacora na Kalou,

Ena vadretitaka;

Kevaka ena vakamavoataki iko na ligana,

Sa na veivakabulai talega na ligana.

19Ena veigauna kecega

Sa dau taqomaki iko kina o koya mai na veika ca;

20Ni sa yaco mai na dausiga levu

Ena qarauna mo bula tikoga,

Ia ni sa yaco na i valu,

Ena taqomaki iko mo kakua ni mate.

21Ena sabaya tani vei iko na lasu

Kei na vosa vakacaca ni gusuda;

Ena viribaiti iko ni basika mai o rusa.

22O na dredrevaka na veivakarusai kei na dausiga,

Ka sega ni rerevaka na manumanu kila eso.

23Na tikinivanua kecega o siviyarataka

Era na kau tani kina na veivatu me galala vinaka;

Ka ra na sega ni katalaki iko na manumanu daukata.

24O na qai tiko vakacegu ena nomu valelaca;

O na rai yani ka raici ira na nomu sipi ni ra tu welewelei sara.

25Era na lewe vuqa na luvemu kei na nomu kawa

Me vaka na i wiliwili ni drau ni co ena dua na i kanakana.

26Me vaka na witi ka tamusuki ni sa matua vinaka,

O iko talega o na qai mate ni o sa matua ka qase sara.

27Na ka kece oqo Jope,

Keitou kila mai na vakadidike dede keitou a cakava.

E ka dina taucoko ka dodonu mo rogoca,

Ka kila me rawa kina ni o vinaka.