Isikeli 33 - Vakavakadewa Vou kei na iVola tale eso（FNVDC12）

Vakadrukai kei Jerusalemi(Isi 3.16-21)

1Sa yaco tale mai vei au na vosa i Jiova, ka vaka:

2“Luve ni tamata, mo vosa vei ira na kai nomu ka kaya, ni'u sa kauta mai na i seleiwau ki na vanua, ka ra kauta na lewe ni vanua e dua na tamata, ka lesi koya me nodra i vakatawa;

3ia kevaka sa raica o koya ni sa lako tiko mai ki na vanua na i seleiwau, uvuca na davui, ka vakaroti ira na mate;

4ia kevaka sa rogoca dina e dua ga na tamata na domo ni davui, ka sega ni muria, ka yaco mai na i seleiwau, me mate kina o koya; sa baleti koya ga na nona mate.

5Sa rogoca o koya na domo ni davui, ka sega ni kauwai kina; sa na baleti koya ga na nona mate. Ia kevaka sa muria na i vakaro, ena rawa ni vakabulai koya.

6Ia kevaka sa raica o koya na i vakatawa ni sa lako tiko mai na i seleiwau, ka qai sega ni uvuca na davui, ka ra sega ni vakaroti kina na tamata, sa yaco mai na i seleiwau, ka mate kina e dua vei ira na tamata; sa mate yani o koya ena nona i valavala ca, ia na nona mate ka'u na taroga vua na i vakatawa.

7“Ia o iko, na luve ni tamata, ka'u sa lesi iko mo nodra i vakatawa na mataqali i Isireli; mo solia na noqu i vakaro ena gauna ga o rogoca kina na vosa ka tau mai gusuqu.

8Kevaka ka'u sa kaya vua na tamata ca, o iko na tamata ca, o sa na mate vakaidina, ia o qai sega ni vakaroti koya na tamata ca me vuki tani mai na nona i tovo ca, sa na mate ga na tamata o ya ena vuku ni nona i valavala ca, ia na nona mate ka'u na taroga vei iko.

9Ia kevaka o sa vakaroti koya na tamata ca me gole tani mai na nona i tovo ca, ka qai sega ni vuki tani mai; ena mate ga o koya ena nona i tovo ca, ia o sa vakabulai iko.

10“Ia o iko na luve ni tamata, mo kaya vei ira na mataqali i Isireli, Mo ni vosa vakaoqo, ka kaya, ‘Ia na noda talaidredre kei na noda i valavala ca, sa na saumi vei keda, ka da na uru sobu kina ena vuku ni veika oqo; ia e da na qai bula vaka e vei oi keda?’

11Mo kaya vei ira, Me vaka na dina ni noqu bula, sa kaya na Kalou o Jiova, au sa sega ni vinakata se marautaka me mate na tamata ca, au vinakata ga me vuki tani mai o koya mai na nona i tovo ca; a cava li o ni via mate kina Oi Kemuni na Mataqali i Isireli?

12“Ia o iko na luve ni tamata, mo kaya vei ira na kai nomu, Ena sega ni vakabulai koya na yalo dodonu na nona i valavala dodonu. Ena siga sa talaidredre kina; ia na nona cala na tamata ca ena sega ni mate kina o koya ni sa vuki tani mai na nona ca; ia o koya sa yalo dodonu ena sega ni vakabulai koya na nona i valavala dodonu ena gauna sai valavala ca kina.

13Ia sa dina au sa kaya vei ira na yalo dodonu ni sa na vakabulai vakaidina o koya, ia kevaka e vakararavi ki na nona i valavala dodonu, ka qai i valavala ca, ena sega ni la'ki nanumi tale na nona i valavala dodonu; ia ena mate ga ena vuku ni valavala ca sa cakava o koya.

14“Ia sa dina ka'u sa kaya tale vua na tamata ca, ‘O na mate vakaidina,’ ia kevaka e gole tani mai na nona i valavala ca, ka cakava ga na ka e dodonu ka vinaka;

15kevaka sa vakasuka na tamata ca na i vakadinadina, ka vakasuka talega na ka sa butakoca, ka sa muria na vunau ni bula, ka sega ni cakava na ka ca; ena bula vakaidina o koya, ena sega ni mate.

16Ena sega tale ni la'ki nanumi me baleti koya na i valavala ca sa kitaka oti o koya; sa cakava o koya na ka dodonu ka vinaka, ena bula vakaidina o koya.

17Ia, era sa kaya ga na kai nomu, ‘Sa sega ni dodonu na i valavala i Jiova’; ni o ira ga vaka i ira sa sega ni dodonu na nodra i valavala.

18Ni sa gole tani o koya sa yalo dodonu mai na nona i valavala dodonu, ka sa cakava na ka ca, ena mate kina o koya.

19Ia ni sa gole tani na tamata ca mai na nona ca, ka cakava na ka dodonu ka vinaka, ena bula vakaidina o koya.

20Ia o ni sa kaya tiko, ‘Sa sega ni dodonu na i valavala i Jiova’. Oi kemuni na mataqali i Isireli, au na lewai kemuni yadudua me vaka na nomuni valavala.”

Tukutuku mai Jerusalemi

21Ia ena i kalima ni siga ni katini ni vula ni katini karua ni yabaki ni neimami tiko vakabobula, a qai lako mai vei au e dua na tamata a dro mai Jerusalemi, ka kaya, “Sa vakadrukai na koro.”2Tui 25.3-10; Jere 39.2-8; 52.4-14

22Ia oqo na liga i Jiova sa tu vei au ena yakavi ni bera ni tadu mai vei au o koya sa dro mai; ka sa dolava na gusuqu o Jiova ena gauna ka lako mai kina vei au ena mataka; ka sa rawa kina me'u vosa ka sega ni galu tiko.

23Sa yaco mai vei au na vosa i Jiova, ka vaka:

24“Luve ni tamata, Era sa vosa na i vakatawa na veitiki ni vanua lala e Isireli, ka kaya: ‘Sa lewe dua ga o Eparama, ni sa taukena na vanua; ia e da sa lewe vuqa oi keda; sa soli vakaidina vei keda na vanua me da taukena.’

25O koya oqo mo kaya kina vei ira, ‘Sa kaya vakaoqo na Kalou o Jiova: O ni sa kania na lewe vata kei na dra, ka tacake na matamuni ki na nomuni veimatakau, ka vakadave dra; ia mo ni qai taukena li na vanua?

26O ni sa vakararavi ki na i seleiwau, ka cakava na ka vakasisila, o ni sa vakacacana na watina na kai nona; ia mo ni taukena li na qele?’

27Mo kaya vakaoqo vei ira, ‘Sa kaya vakaoqo na Kalou o Jiova: Me vaka na dina ni noqu bula, era na mate ga ena i seleiwau o ira ka vakatawa na veitiki ni vanua lala; ia o koya talega mai na i bili ka'u na soli koya vei ira na manumanu me ra kania; o ira ka ra tu ena vale kaukauwa vakaivalu, na ulu vatu, kei na qara vatu, era na mate ena mate dauveitauvi.

28Ni'u sa na vakalala na vanua me rusa; ena mudu talega na nona kaukauwa na viavialevu; ena lala talega na veiulunivanua e Isireli, ka sega ni dua na tamata me curuma yani.

29Era na qai kila ni sai au o Jiova, ni'u sa vakalala na vanua ka me rusa ena vuku ni nodra i valavala vakasisila kecega era sa cakava.’

30“O iko talega na luve ni tamata, era sa veivosakitaki iko tikoga na kai nomu e tutu ni lalaga ni veivale kei na kedra katuba talega, ka ra veivosaki vaka i ira vakaveitacini, ka kaya, ‘Ni lako mai ka mai rogoca mada se na vosa cava sa rogo mai vei Jiova.’

31Era a lako mai vei ira me vaka era lako mai na tamata, ka mai tiko e matamu me vakataki ira na noqu tamata, ka ra rogoca na nomu vosa, ia era sega ni muria se cakava, ni sa tu e tebe ni gusudra na vosa vakayalo loloma, ia na lomadra sa muria ga na nodra kocokoco.

32Raica, o sa vaka vei ira, e dua ka sa lagata na sere ni veidomoni, ka domo vinaka, ka qiria vinaka talega na i vakatagi, ni ra sa rogoca na nomu vosa, ka ra sega ga ni cakava.

33Ia ni sa yaco na ka oqo ka na yaco vakaidina! era na qai kila ni a tiko kei ira e dua na parofita.”