1Na levu ni nona domobula kei na nuiqawaqawa, sa goleva kina na Turaga o Esiteri na ranadi.
2E luvata nona isulu totoka, dara na isulu ni rarawa kei na lolosi. Na ivakaboi saulevu sa sega, sa bena dravusa ga kei na denimanumanu; sa vakalolomataka sara ga na yagona, sa ubia e na drauniuluna qaliqalica na veitiki ni yagona a dau via ukutaka.
3Sa qai masu vua na Turaga na Kalou ni Isireli, a kaya: “I noqu Turaga, o kemuni duadua na neimami Tui;
4ni vukei yau, niu tiko duadua, e sega ni dua me vukei yau, o kemuni ga, niu sa vakarau bolea qo na mate.
5Noqu bula taucoko, au dau rogorogoca tu vei ira na lewe ni yavusa ni o kemuni saka oni a digitaki Isireli vei ira kece na matanitu, o ira na neimami qase vei ira kece na nodra qase, mera nomuni iyau tawamudu; oni sa vakayacora kece sara vei ira na nomuni yalayala.
6Ia keimami sa mai cala e matamuni, oni sa mani soli keimami vei ira na meca,
7ni keimami sa rokovi ira nodra kalou. E dodonu saka na nomuni lewa!
8Ia qo sa sega ni rauti ira na neimami vakabobulataki, era sa veiyalayalati kei na nodra matakau
9me bokoci na nomuni lewa, me vakawabokotaki na nomuni iyau, me sogo na gusudra na dau vakacaucautaki kemuni, me talaraki na icabocabonisoro kei na nomuni vale lagilagi,
10me qai dalaga na veimatanitu mera vakacaucautaka na matakau wale, ra vakacerecerea tawamudu e dua na tui ni vuravura.
11Moni kua saka ni solia nomuni matanakilagi vua na ka mate; mera kua saka ni veivakalialiai ni neimami sa sikalutu; ni vukica ga nodra vere me sauti ira tale, ni totogitaki koya a bukiveretaki keimami me kedra ivakila.
12Ni nanumi keimami saka; moni vakatakilai kemuni mai e na gauna ni neimami leqa; ni vakayaloqaqataki yau tale ga, kemuni nodra Tui na kalou, nodra Sau na tui!
13Ni solia meu gusukamica e mata ni laione o Asuerosi, ni vukica na yalona me sevaki koya e sagai keimami tiko, me mudu na nona bula kei na nodra na nona ito.
14Moni vakabulai keimami, ni vukei yau, niu tiko duadua, e sega ni dua me vukei yau, o kemuni saka ga!
15Oni kila na ka kece, oni kila noqu cata nodra dokai yau na tabulotu, noqu sevaka nodra idavodavo na tawateve se vulagi cava tale.
16Oni kila niu voraki, niu vakasisilataka na isala vakatui au dau tokara niu dau rairai e matanalevu. Au vakasisilataka me vaka na qamuqamu ni matenivula, au sega kina ni dau tokara niu tiko voli ga e vale.
17Au sega ni bau kana na nomuni vada e na teveli nei Amani, sega tale ga niu bau tiko e na kanavata ni tui se meu gunuva na waini ni vakacabo isoro.
18Au sega ni bau marau na nomuni vada e na veisiga kece ni noqu kau mai ke, noqu marau saka ga o kemuni na Kalou i Eparahama.
19I kemuni na Kalou sau duadua, ni rogoca na domo i keimami na yalolailai, ni vakabulai keimami mai na ligadra na tamata ca. Ni kauta laivi na noqu rere!”
Na 15.1-16 e ra e wiliki me isosomi ni 5.1-2 e na ivolatabu qo.
Who We AreWhat We EelieveWhat We Do
2025 by iamachristian.org,Inc All rights reserved.
