Yalomatua 15 - Vakavakadewa Vou kei na iVola tale eso（FNVDC12）

Na Kalou dina e solia na bula tawamudu

1Ia o kemuni, neimami Kalou, oni vinaka, oni dina, oni dauvosota, oni lewa na ka kece e na loloma.

2Kevaka mada ga keimami cala, keimami nomuni tiko ga, ni keimami kila na nomuni sau, keimami na sega ga ni cala, ni keimami kila ni keimami wili me nomuni.

3Na kilai kemuni, na yalododonu uasivi; na kila na nomuni sau, na vu ni bula tawamudu.

4E sega ni vakasesei keimami na inaki ca ni dausivisivi se na buno matewale ni dauboroboro, na matakau duiroka,

5kena irairai e vagarogaroi ira na lialia mera guta na matakau mate.

6O ira era na bulia, domona, se rokova na matakau, era domona na ka ca, e na qai kedra maleka ni sa sauti ira.

Era lialia na qaravi kalou qele

7Na dautulituli e natuka na qele qai vakabulia vakamaqosa na ka yaga. E dua vata ga na qele e tulia mai kina na dari ni ka vinaka kei na dari ni ka ca. E bulia vakatautauvata, ia na kena vakayagataki, e lewa ga o dautulituli.

8E cakacaka matewale nona bulia na kalou tawayaga mai na qele, se qai buli oti ga mai na qele o dautulituli, vakalailai ga sana suka tale i na qele a vu mai kina, e na qai vakasuka kina na yalo a soli vua me nona toka.

9Ia e sega ni leqataka ni sana mate, se ni lekaleka wale nona bula, e veiqati ga kei ira na dautuki koula kei na siliva, e vakamuri ira na dautuki kopa; e cibitaka nona dau buli kalou lasu.

10Na utona e dravusa, nona vakanuinui e bau yaga na kuvu, nona bula e bau yaga na dreta,

11baleta ni lecavi koya a buli koya, a vakacuruma vua na yalo e yavala, a ceguva vua na yalo e bula.

12Ia na noda bula e ka ni vakatatalo vua, e vaka na soqo ni kumuni ilavo. Nona ile meda rawa ilavo e na sala cava ga, veitalia ni sala ca.

13O koya ga e kila vinaka sara ni ivalavalaca nona dau tulia mai na qele na dari kakavorovoro rawarawa kei na matakau kanukanu.

Nodra kuitataki na kai Ijipita

14O ira kece na meca era vakararawataki ira na nomuni tamata, era lialia vakalevu, era vakaloloma sara me vaka na gonedramidrami.

15Era wilika nodra matakau kece mera kalou, dina ni sega ni rai na matadra, sega na qara ni ucudra mera cegu kina, se na daliga mera rogo kina, se na liga ni tatara, se na yava ni taubale.

16Era ibulibuli ni tamata, a buli ira e dua a soli vua na yalo me vakayagataka; e sega ni dua e rawa ni bulia na kalou me ucui koya.

17E na mate ga; na cakacaka kece ni ligana valavalaca e ka mate. E vinaka sara o koya vei ira na ka mate e qarava, ni o koya e bula, o ira e sega.

18Na kedra meca nomuni tamata era dau qarava na manumanu vakasisila, na manumanu torosobu duadua e na lecaika.

19Era manumanu rairai ca mada ga, e sega ni dua e taleitaki ira; sa calati ira na veivakacaucautaki ni Kalou kei na nona veivakalougatataki.