Tobita 9 - Vakavakadewa Vou kei na iVola tale eso（FNVDC12）

Na ilakolako i Rajesi

1Sa qai kacivi Rafaele o Tobia a kaya,

2“Na wekaqu Asaria, me va na italai kei na rua na kameli, lako vei Qavaele i Rajesi mai Mitia, solia vua na risiti me solia mai kina na ilavo, kauti Qavaele tale ga mai i na soqo ni vakamau,

3-4O tamaqu sa wili siga tiko; keu bera sara, e na rarawa vakalevu. O kila tale ga ni sa cikevi yau o Rakueli meu tiko, au sega ni via beca nona vosa.”

5Eratou sa mani lako, ratou moce e na vale nei Qavaele. E solia o Rafaele na risiti qai tukuna vua ni sa vakamau o Tobia na luve i Tobita, a sureti koya sara me mai tiko e na kena soqo. Oti, sa wilika sara mai o Qavaele na taga ilavo, se dregati tu ga, rau qai vakavodoka e na kameli.

6Mataka cake, erau yadra vakamataka, rau sou i na soqo ni vakamau. Rau tadu yani vei Rakueli, sa kana tiko o Tobia. E tu sara o Tobia me kidavaki Qavaele, qai sauma tagitagi o Qavaele, “O sa ucui tamamu dina e na yalodina kei na loloma. Me vakalougatataki iko na Turaga, kei na watimu kei rau na vugomu. Me vakalagilagi na Kalou ni sa solia na bula meu raici luvequ o Tobia, ni ucui tamana dina.”