Tobita 4 - Vakavakadewa Vou kei na iVola tale eso（FNVDC12）

Vakasalataki Tobia o Tobita

1Na siga ya, sa qai nanuma kina o Tobita na ilavo a tautaunaka tu vei Qavaele e Rajesi mai Mitia, mani kaya lo:

2“Au sa kerea oti meu mate. Vakacava meu kacivi Tobia na luvequ meu vakamacalataka rawa vua na ilavo au qai mate.”

3A mani kacivi koya, a kaya, “Na luvequ, niu sana mate, buluti yau, kua nio weletaki tinamu. Rokovi koya e na veisiga kece ni nomu bula; cakava na ka e donu vua, kua ni vakararawataki koya.

4Nanuma, na luvequ, ni a colata e levu na leqa e na vukumu nio se lewe ni ketena. Ni sana mate, buluti koya e yasaqu e na kequ ibulubulu.

5“Nanuma luvequ na Turaga na noda Kalou e veisiga, kua sara ni galeleta na ivalavalaca se beca nona ivakaro. Mo itovo savasava e na veisiga kece ni nomu bula, kua ni muria na sala ni ca.

6Kevaka o na dina, o na sautu kina.

7Vrua 15.7,8; Vbale 19.17; Sr 3.30–4.6; 1Joni 3.17Mo wasea nomu iyau vei ira kece na tamata itovo vinaka, kua ni solia voraki. Kua ni gole tani vua na tamata dravudravua, e na qai sega ni gole tani vei iko na mata ni Kalou.

8Ke levu nomu iyau, me vaka kina na nomu iloloma; ke lailai, kua ni madua nio solia na iloloma lalai.

9O sana kumuna tiko kina na iyau e na yaga vei iko e na nomu leqa,

10ni yalololoma e sabaya na mate, e tarova na nomu curuma na butobuto;

11vei ira kece era vakayacora, na yalololoma e isolisoli uasivi e mata i koya na Cecere Sara.

12“Qarauna luvequ na ivakarau vakasisila kece. Mo vakawatitaka mada e dua drau kawa vata, me kua ni watimu na yalewa tani e sega ni mataqali i tamamu, ni o keda na luvedra na parofita. Nanuma luvequ ni o iratou na noda itubutubu makawa o Noa, Eparahama, Aisake kei Jekope, eratou vakawati ga e loma ni mataqali. Eratou kalougata niratou vakaluveni, nodratou kawa era na taukena na vanua.

13Mo lomani ira na wekamu luvequ, kua ni beci ira na wekamu kei ira na nodra kawa e na nomu bese ni vakawatitaka e dua vei ira. Na dokadoka na vu ni rusa kei na veilecayaki levu; na vucesa na vu ni ligalala kei na vakaloloma, baleta ni vucesa e tina ni dausiga.

14Kua nio qai sauma na nomu tamata cakacaka nimataka, saumi koya sara nikua; keo qarava na Kalou, o na taura na kena isau.

“Mo qarauni iko na luvequ e na ka kece o cakava, mo yalomatua e na nomu ivakarau kece.

15Maciu 7.12; Luke 6.31Na ka o cata, kua ni cakava tale vua e dua. Kua ni gunu waini vakasivia se me nomu itokani na mateni.

16Solia na kemu madrai vei ira na viakana, nomu isulu vei ira na luvawale. Na ka e sega ni yaga vei iko, solia vei ira na leqa. Mo kua ni solia voraki.

17Vrua 26.14Kau magiti i na somate ni yalododonu, kua i na somate ni dauvalavalaca.

18Qara ivakasala vei ira kece na vuku, kua ni beca na ivakasala yaga.

19Vakacaucautaka tu ga na Turaga na Kalou; kerea vua me vakadodonutaki na nomu sala, me kalougata na nomu ilakolako kei na nomu inaki kece. E sega ni dua na matanitu e yalomatua; na Turaga ga e solia na ka vinaka kece, e lewa se me na vakalolovirataki cei.

“Mo nanuma gona luvequ noqu ivakaro, me kua sara ni taqusi e lomamu.

20Ia meu vakamacalataka mada qo vei iko na tini na taledi siliva au a tataunaka tu vei Qavaele na luve i Qaviriasi mai Rajesi e Mitia.

211Timo 6.6-8Kua ni yalolailai luvequ nidatou sa dravudravua. O na vutuniyau vakalevu nio doka na Kalou, o yawaka na ivalavalaca kece, o cakava na ka e donu e matana.”