Tiko Voli mai na Lekutu 19 - Vakavakadewa Vou kei na iVola tale eso（FNVDC12）

Solevu ni Bulumakau Yalewa Damudamu

1Sa qai kaya vei Mosese kei Eroni o Jiova,

2Sa vakaoqo na i valavala ni lawa virikotori sa vakarota o Jiova: “Mo tukuna vei ira na Isireli me ra kauta mai vei iko e dua na bulumakau yalewa damudamu, sa sega na tikina e ca, ka sa vinaka taucoko, ka sega talega ni se bau vakacakacakataki;

3ka me soli yani oqo vei Iliesa na bete. Me qai kau yani oqo ki na i bili ni tikotiko, ka me vakamatei e matana.

4Me qai tonisua ena dra na i qaqalo i Iliesa na bete, ka kureitaka vakavitu eso na kena dra me vaka sa donuya na mata ni Vale ni Veitavaki.

5Me qai vakamai e matana na bulumakau; na kulina, kei na lewena, na kena dra kei na kena benu;

6ka me qai kauta o koya na kau sitari kei na isopi, kei na wa damudamu, ka biuta ki na lomadonu ni bukawaqa sa kama kina na bulumakau.

7Me qai sava na nona i sulu na bete, ka sisili ena wai, ni oti o ya ena qai lako mai ki na loma ni tikotiko; ia ena sega ni savasava o koya na bete me yacova na yakavi.

8O koya sa vakama na bulumakau ena savata na nona i sulu ena wai ka sili talega ena wai, ia ena qai sega ni savasava me yacova na yakavi.

9Ia me dua na tamata e savasava me kumuna vata na dravusa ni bulumakau yalewa, ka la'ki biuta koto ena dua na vanua savasava ena i bili ni koro, ena maroroi e kea me nodra na lewenivanua ni Isireli me veisola kei na wai a sisili kina o koya sa tawa savasava me i sava ni valavala ca.Ipe 9.13

10Ia o koya sa kumuna vata na dravusa ni bulumakau yalewa, me savata na nona i sulu, ia ena tawa savasava me yacova na yakavi. Ia oqo me sa kena i vakaro ka tawa mudu vei ira na Isireli, kei ira talega na vulagi ka ra tiko ena noda vanua.

Na Veitaratara kei na Yago ni Tamata Mate

11“O koya sa tara na yago ni tamata sa mate, ena sega ni savasava ka me bogi vitu;

12ia me vakasavasavataki koya ena wai ena i katolu ni siga, kei na i kavitu ni siga sa na qai savasava o koya; ia kevaka sa sega ni vakasavasavataki koya ena i katolu, kei na i kavitu ni siga, ena sega ni savasava o koya.

13O koya sa tara e dua na yago ni tamata mate, ka sega ni vakasavasavataki koya, sa vakadukadukalitaka na Vale Tabu i Jiova; ia na tamata o ya ena kau tani mai vei ira na Isireli; baleta ni sa sega ni kureitaki vua na wai me savati tani kina na nona dukaveluvelu, ka na sega ni savasava o koya; ni sa tiko ga vua na nona dukadukali.

14“Oqo na lawa virikotori e cokoti ki vua e dua na tamata kevaka sa mate ena valelaca: o ira kecega sa curu ki na valelaca o ya kei ira kecega era tiko kina era sa sega ni savasava me bogi vitu.

15Ena sega ni savasava na bilo kecega sa dola tu, ka sega ni sogo ena kena i sogo.

16O koya yadua sa tiko ena loma ni vanua, ni sa tara e dua sa vakamatei ena i seleiwau, se, tara e dua na yago ni mate, se na sui ni tamata, se i bulubulu, ena sega ni savasava me siga vitu.

17Ia ena vukudra o ira sa sega ni savasava, me ra qai kauta eso na dravusa ni ka sa vakamai me i sava ni valavala ca, ka me waki vata kei na wai drodro ena dua na bilo;

18me qai dua na tamata savasava me kauta na isopi ka tonia ena wai, ka kureitaka ki na valelaca kei na i yaya kecega. Me kureitaka talega vei ira na tamata era tiko kina, kei koya sa tara na sui, se o koya sa vakamatei, se o koya sa mate wale, se na i bulubulu.

19O koya sa savasava ena kureitaka vua sa sega ni savasava ena i katolu kei na kavitu ni siga, me ra vakasavasavataki kina ena i kavitu ni siga. Me ra qai savata na nodra i sulu ka sisili ena wai, ka ra na qai savasava ena kena yakavi.

20Na tamata sa sega ni savasava, ka sa sega ni vakasavasavataki koya ena vakagalalataki mai vei ira na lewenivanua, ni sa vakadukadukalitaka na Vale Tabu i Jiova; ni sa sega ni kureitaki vua na wai me savasava kina ka sa sega ni savasava o koya.

21Na i vakaro oqo mo ni muria ena nomuni bula taucoko. Na tamata sa kureitaka na wai ni veivakasavasavataki me na savata talega na nona i sulu, ka na sega ni savasava me yacova na yakavi na tamata e tara na wai o ya.

22Na ka kecega sa tara o koya sa sega ni savasava ena sega talega ni savasava, ka na sega ni savasava me yacova na yakavi o ira sa tara na veika tawa savasava.