Siraki 46 - Vakavakadewa Vou kei na iVola tale eso（FNVDC12）

Josua

1 Josua 1.1–11.23 O Josua na luve i Nuni e qaqa ni ivalu, na isosomi kei Mosese e na parofisai.

Me vaka e vakatakila na yacana, a yaco me dua na ivakabula rogo vei ira na tamata digitaki ni Kalou

me ravuti ira lesu na meca era via ravuti ira mai, mera taukena na vanua yalataki na kawa i Isireli.

2E dau vakasakiti dina na nona laveta na ligana me dodoka yani na nona iselewau me kabakoro!

3O cei tale e liu a tudei vakataki koya? A liutaka tiko na ivalu ni Turaga.

4A sega beka ni tarovi na matanisiga e ligana? A sega beka ni balavu e dua na siga me vaka e rua?

5A masu vua na Cecere Sara na Kalou sau e na gauna era kaba kina mai na veiyasana na meca;

6a sauma nona masu na Turaga sau e na nona vakatauca bi vei ira na ucaqereqere levu.

A valuta na matanitu ya, vakamatei ira era vakababa e na icurucuru o Becoroni

mera kila na veivanua se o cei na nona isasabai, ni valu tiko e mata ni Turaga, ni dau muria duadua ga na Kalou sau.

Kelevi

7 Tiko 14.6-10; 11.21; Josua 14.6-11 E na gauna i Mosese erau a vakayacora kina e dua na ivakarau cecere, o koya kei Kelevi na luve i Jepune,

erau vorati ira na mataitikotiko taucoko, rau tarova na nodra valavalaca na lewena kei na nodra vosa kudrukudru.

8Vei ira na ono na drau na udolu e na vanua talasiga, erau qai bula ga o rau qo

merau taukena na vanua yalataki, na vanua ni sucu kei na oni.

9Sa solia na Kalou me kaukaua tu ga o Kelevi me yacova ni sa qase,

mani lako taudua i na veidelana me qaqauraka na vanua me kedra ivotavota na nona kawa,

10mera raica kece na luve i Isireli ni vinaka na muria na Turaga.

Dauveilewai

11 Dvei 1.1–16.31 Era tu tale ga na dui dauveilewai, o ira era sega ni bale i na qaravi kalou tani, ra sega ni biuta na Turaga - mera nanumi e na vakarokoroko!

12Me bula tale mada ga na suidra mai na vanua era davo tu kina, me bula tale vei luvedra na yacadra o ira era vakarokokorotaki!

Samuela

13 1Samu 3.19,20; 7.9-11; 10.1; 12.3; 16.13; 28.18,19 O Samuela, na daulomani ni Turaga, nona parofita, a tauyavutaka na matanitu, lumuti ira na iliuliu ni nona tamata.

14A lewai ira na lewe ni mataivavakoso me vaka na ivakaro ni Turaga; na Turaga a taqomaki Jekope.

15E na vuku ni nona yalodina, sa macala kina ni parofita; e na nona vosa, a kilai kina me daurai nuitaki.

16A masu vua na Turaga na Kalou sau e na gauna era kaba mai kina e na veiyasana na kena meca, ka cabora me nona isoro e dua na luve ni sipi.

17A vakuru mai lomalagi na Turaga, cabolo e na rorogo vakaitamera na domona,

18qai vakawabokotaki ira na iliuliu ni vanua o Taia kei na nodra iliuliu kece na kai Filisitia.

19Ni se bera ni vakacegu vakadua, a kacivi ira na tamata o Samuela mera vakadinadinataka e mata ni Turaga kei na nona lumuti:

“Au sega ni bau taura nona iyau e dua se bau dua mada ga na ivava.” E sega ni qai dua e beitaki koya.

20Ni sa vakacegu, ase parofisai, vakaraitaka vua na tui nona mate,

vosa cake mai na ibulubulu e na parofisai me bokoca na nodra ivakarau ca na nona tamata.