1Turaga, sai kemuni ga na neimami i tikotiko ni veitabagauna.
2Ni o ni se bera ni bulia na veiulunivanua,
Se vakayacora na vuravura me dua na ka,
Sa i kemuni ga na Kalou sa sega ni mudu,
Io, o ni na Kalou tikoga ka tawamudu.
3O ni sa tukuna ki na tamata me suka tale ki na ka sa buli mai kina,
O ni sa vukici ira me ra suka tale me kuvu ni soso.
4E dua na udolu na yabaki sa vaka ga e dua na siga vei kemuni,
Sa tautauvata ga kei na siga ena noa, ni sa oti yani,
Me vaka ga e dua na gauna lekaleka ena bogi.
5O ni sa kauti ira tani na tamata me vaka na waluvu
Era sa vaka wale ga na tadra.
Era sa vaka na co sa tubu ena mataka,
6Sa tubu cake ka bulabula sara,
Ia ena yakavi sa malai ka mate yani.
7Keimami sa vakarusai ena nomuni cudru,
Keimami sa vakarerei ena nomuni cudru waqawaqa.
8O ni sa tuva na neimami i valavala ca e matamuni,
Na neimami i valavala ca keimami vunitaka
ena vanua o ni rawa ni raica kina.
9Ni sa vakalekalekataki ga na neimami bula
ena vuku ni nomuni cudru;
Ka sa oti yani me vaka e dua na vakasolokakana.
10Na dede ni neimami bula sa vitusagavulu wale ga na yabaki,
Ka yacova na walusagavulu, kevaka keimami se kaukauwa voli;
Ia, ke mani vakakina, sa kauta ga mai na oca kei na yalo rarawa;
Ni sa oti na bula, keimami sa qai takali yani.
11O cei li e kila na kaukauwa kece ni nomuni cudru?
O cei e rawa ni kila na rere cava e rawa ni kauta mai na nomuni cudru?
12Ni vakavulici keimami ena kena rui lekaleka na neimami bula,
Me rawa ni keimami vuku kina.
13A cava so na kena dede o ni na qai gole lesu mai?
Ni lomani ira na nomuni dauveiqaravi!
14Ni vakacegui keimami ena nomuni loloma tudei ena veimataka,
Me keimami rawa ni sere ka marau kina ena neimami bula taucoko.
15Ni vakamarautaki keimami me tautauvata ga kei na veisiga eso
o ni a vakararawataki keimami kina,
Ena veiyabaki kece keimami a sota kaya kina na leqa.
16Ni vakaraitaka vei keimami na nomuni tamata
na nomuni cakacaka veivakurabuitaki,
Kei na nomuni lagilagi vei ira na neimami kawa.
17I Jiova na neimami Kalou, mo ni qai sobuti keimami
ena nomuni veivakalougatataki.
Ni qai vakayacora me keimami rawata vakavinaka sara
na veika kecega sa vakaitavi kina na liga i keimami!
Who We AreWhat We EelieveWhat We Do
2025 by iamachristian.org,Inc All rights reserved.
