Yalomatua 10 - Vakavakadewa Vou kei na iVola tale eso（FNVDC12）

E taqomaki Atama o yalomatua

1 Vteki 1.26-28 O yalomatua a taqomaka na isevu ni tama e vuravura ni sa qai buli duadua o koya; a sereki koya mai na nona cala,

2a vakaukauataki koya me lewa na ka kece.

Vakanadakui yalomatua o Keni

3 Vteki 4.8-13 Ni mani besetaki koya na tamata ca e na cudru, sa qai mate, baleta ni a labati tacina e na yalokatakata.

E taqomaki Noa o yalomatua

4 Vteki 7.1–8.22 Ni luvuci o vuravura e na vukuna, o yalomatua ga a vueta tale e na nona ulia voli e dua na tolonikau malumalumu e vodo kina na tamata yalododonu.

E vukei Eparama o yalomatua

5 Vteki 11.1-9; 12.1-3; 22.1-19 O yalomatua tale ga, ni sa seva na nodra veinaki ca na veimatanitu, a raica rawa na tamata yalododonu, qai maroroi koya voli me kua ni cala e mata ni Kalou. A solia vua na yalodei me vorata kina nona lomani luvena.

E vakabulai Lote o yalomatua

6 Vteki 19.1-29 O yalomatua a vakabula na tamata yalododonu e na nodra sa vakawabokotaki na tamata tabulotu; a drotaka bula na bukawaqa a lutuka na koro e lima.

7Se tu ga na ivakadinadina ni nodra ca: na vanua lala e kuvu tu ga kina na kubou, na kau vuata e sega ni dreu rawa, kei na duru masima se duri tu ga me ivakananumi ni dua a vakatitiqa.

8Nodra besetaki yalomatua gona, a sega wale ga kina ni bureitaki vei ira na kila na ka vinaka, a biu koto mai na ivakananumi ni nodra sese, me kila o vuravura me kua sara ni dua e lecava nodra cala.

9O yalomatua e dau vueti ira na qaravi koya.

E taqomaki Jekope o yalomatua

10 Vteki 27.43; 28.10-22; 32.24-30 E tuberi koya i na sala dodonu na tamata yalododonu a drovaka mai na cudru nei tuakana; a vakaraitaka vua na matanitu ni Kalou, a vakatakila vua na veika tabu; a vakalougatataka nona cakacaka, qai vakatubura na vua ni nona buno.

11Nira sa vuvutaki koya mai na tamata kocokoco, a tu e yasana me vakaiyautaki koya.

12A viribaiti koya vei ira na kena meca, maroroi koya vei ira na lawataki koya; a solia vua na qaqa e na veiqedravu me kila kina ni mana duadua na qaravi Kalou.

E vakabulai Iosefo o yalomatua

13 Vteki 37.12-36; 39.1-23; 41.37-44 Ni a volitaki na tamata yalododonu, a sega ni biuti koya o yalomatua, a maroroi koya ga mai na ivalavalaca. A curu vata kei koya i valeniveivesu;

14ni vesu tu, a sega ni biuti koya me yacova sara ni sa bukia vua na masi ni veiliutaki me sa lewai ira tale na vakasaurarataki koya. A vakalasui ira na beitaki koya, a qai solia vua me dokai tawamudu.

O yalomatua e kauti ira tani na Isireli mai Ijipita

15 Lako 1.1–15.21 O yalomatua a sereki ira na matatamata tabu, na kawa tawacala, mai na matanitu veivakabobulataki.

16A curuma na yalo ni italai ni Turaga, vorati ira na tui rerevaki e na cakamana kei na ivakatakilakila.

17A solia vei ira na tamata yalododonu na isau ni nodra cakacaka; a tuberi ira e na sala uasivi; a nodra ivakaruru e na siga, nodra kalokalo serau e na bogi.

18A vakawaci ira e na Wasa Damu, tuberi ira e na wai titobu,

19ia a vakaluvuci ira na kedra meca, qai vakavudei ira lesu mai na boto ni sauloa.

20O ira gona na yalododonu era mani butakoci ira na tabulotu, era serevaka saka na yacamuni tabu, ra vakacaucautaka vata na ligamuni veitaqomaki,

21baleta ni o yalomatua a sereka na yame ni galu, vakavuna mera vosa macala na gonedramidrami.