1Kemuni Jiova, ni rogoca mada na noqu kerekere vakadodonu,
Ka kauwaitaka na noqu kaci veivuke!
Ni rogoca na noqu masu
Ni sa sega na veivakaisini e lomaqu.
2Ni lewai au ena nomuni totaki au
Ni o ni sa kila na ka dodonu.
3O ni sa kila na lomaqu, o ni sa lako mai vei au ena bogi;
O ni sa dikevi au vakavinaka,
O ni sa sega ni kunea vei au na vere ca,
4Me vaka era sa cakava na tani,
me vaka na vosa ni tebe ni gusumuni,
Au sa sega ni muria na nodra sala
Na tamata i tovo kaukauwa.
5Au sa dau muria tikoga na nomuni sala
Ka sega ni lako tani mai kina.
6Au sa masu vei kemuni na Kalou baleta ni o ni na sauma mai,
O koya oqo mo ni gole mai kina vei au ka rogoca na noqu masu.
7Kemuni na i Vakabula, ni vakaraitaka na talei ni nomuni loloma;
Keimami sa vakarurugi ena yasamuni mai vei ira na keimami meca.
8Ni taqomaki au me vaka na nomuni taqomaka na yaloka ni matamuni,
Ka vunitaki au ena yaloyalo ni tabamuni,
Mai vei ira na tamata ca era via vakacacani au.
9Era sa wavoliti au na kequ meca;
Era sa sinai ena yalo ca.
10Sa sega vei ira na loloma,
Ka ra sa vosa vakaviavialevu.
11Era sa wavoliti au ena vanua kecega au lakova
Ka vaqara e dua na gauna me ra vakabalei au kina.
12Era sa vaka na laione era vinakata me ra dresulaki au vakamatailalai,
Ka vaka na luve ni laione era waraki au toka ena nodra i vunivuni.
13Ni lako mai Jiova mo ni saqati ira na kequ meca ka vakadrukai ira.
Ni vakabulai au mai na tamata ca ena nomuni seleiwau;
14ni vakabulai au mai vei ira ena nomuni kaukauwa, mai vei ira era sa rawata na veika era vinakata ena bula oqo.
Ni totogitaki ira me ra na vakararawataki o ni sa maroroya tu me baleti ira;
Me tu talega na kena me rauti ira na luvedra,
Ka me vo tu eso me baleti ira na nodra kawa.
15Au na raici kemuni baleta ni'u sa yalododonu;
Ia ni'u sa yadra cake au sa na marau ni'u sa raici kemuni.
Who We AreWhat We EelieveWhat We Do
2025 by iamachristian.org,Inc All rights reserved.
