Same 18 - Vakavakadewa Vou kei na iVola tale eso（FNVDC12）

A Sere ni Qaqa i Tevita(2Samu 22.1-51)Vua na i liuliu ni sere. A Same i Tevita na tamata i Jiova, o koya sa cavuta na qaqa ni sere oqo vei Jiova ena siga sa vakabulai koya kina o Jiova mai na ligadra kecega na nona meca, kei na liga i Saula.

1I Jiova, sa ka levu na noqu lomani kemuni,

Oi kemuni na vu ni noqu kaukauwa.

2Sa noqu i vakabula na Kalou,

Ka sai koya na noqu bainivalu kaukauwa.

Sa noqu dauveitaqomaki na Kalou;

Ka'u sa maroroi vinaka mai vua.

Sa taqomaki au me vaka e dua na i sasabai;

Sa maroroi au ka taqomaki au vinaka.

3Au a masu vei Jiova,

Ka sa vakabulai au mai vei ira na kequ meca.

Me vakacaucautaki na Turaga!

4Sa vesuki au vakaukauwa ena wa ni mate,

Ka sa ubi au na ua ni veivakarusai.

5Sa vesuki au vakaukauwa ena nona wa ni mate

Ka vakatura e mataqu na nona dai ni bulubulu.

6Au a qai masu vei Jiova ena noqu leqa;

Ka'u kerea na noqu Kalou me veivuke mai.

Sa qai rogoca o koya na domoqu mai na nona vale tabu,

Ka sa yaco sara ki daligana na noqu kere veivuke.

7Ia sa qai uneune ka yavala na vuravura;

Sa yavala ka veitosoyaki na yavu ni veiulunivanua,

Baleta ni sa cudru na Kalou

8Sa lako mai na kubou mai na ucuna,

Ka dua na yameyame ni buka kei na qilaiso waqa mai na gusuna.

9Sa biliga na lomalagi me lako sobu mai,

Ka sa dua na o loaloa ena ruku ni yavana.

10Sa vuka vakatotolo yani ena jerupi:

Ka veitosoyaki voli ena bati ni cagi.

11Sa ubi koya o koya ena butobuto,

Sa wavoliti koya na o vavaku sa sinai ena wai.

12A sa botea mai na o loaloa,

Na uca cevata kei na qilaiso waqa

Mai na i serau ni matana.

13Sa qai kuru mai lomalagi o Jiova;

Ka rogo mai na domo i Koya sa Cecere Sara.

14Sa vanataka na nona gasau ni dakaititi o koya

Era sa veiseyaki kina na kena meca;

Ka sa vakacicivi ira ena tibi ni liva.

15A sa vakaraitaki mai na boto ni wasawasa,

Ka sa laurai na yavu kei vuravura,

Ni o ni sa cudruvi ira na kemuni meca Jiova

Ka vunauci ira ena nomuni cudru waqawaqa.

16Sa talatala mai cake o Jiova, ka tauri au;

A sa vueti au cake mai na wai titobu.

17Sa vakabulai au mai na noqu meca kaukauwa,

Kei ira kece era cati au;

Era sa kaukauwa sara mai vei au.

18Ni'u leqa tu era a qai ravuti au,

Ia, sa qai taqomaki au ga o Jiova,

19Sa vakabulai au mai na leqa o koya;

E sa vakabulai au o koya; baleta ni sa vinakati au.

20Sa saumi au o Jiova baleta ni'u sa yalododonu,

Sa vakalougatataki au baleta ni'u sa tawa cala.

21Au sa dau muria na lawa i Jiova,

Ka'u sega ni dau saqata na noqu Kalou.

22Au sa muria kece na nona lawa,

Ka'u sega ni talaidredre ki na nona i vakaro.

23Sa kila o koya ni'u sa tawa cala,

Ka dau tarovi au mai na veika ca.

24A sa saumi au o koya ni'u sa yalododonu,

Ka sa kila o koya ni'u sa tawa cala.

25O ni sa yalodina, i Jiova, vei ira era sa yalodina,

Ka vinaka vei ira era sai vakarau vinaka.

26O ni sa yalosavasava vei ira sa yalosavasava,

Ka cudruvi ira era sai valavala ca.

27O ni sa vakabulai ira era yalo malumalumu,

Ka vakamalumalumutaki ira era viavialevu.

28Sa solia vei au o Jiova na rarama:

Sa vakasava tani na noqu butobuto na noqu Kalou.

29Sa solia vei au na kaukauwa o koya

me'u ravuti ira kina na kequ meca

Kei na kaukauwa me'u lako baleta kina na nodra bai.

30Sa uasivi sara na nona i tovo na Kalou oqo,

Ka sa dau vakadinati me i nuinui na nona vosa.

Sa vaka e dua na i sasabai o koya,

Vei ira kece era qara na nona veitaqomaki.

31Sa Kalou taudua ga o Jiova,

Sa noda dauveitaqomaki ga na Kalou.

32Sa i koya ga na Kalou sa vakaukauwataki au,

Ka taqomaka na noqu sala.

33 Ipe 3.19 Sa i koya sa cakava na yavaqu me vaka na dia,

Ka sa taqomaki au ena i valu.

Me'u rawa kina ni vakayagataka

na dakaititi kaukauwa duadua.

34Sa vakavulici au o koya me'u ia na i valu,

Ka sa rawa kina me'u loveca na dakaititi parasa e ligaqu.

35O ni sa solia vei au na i sasabai ni nomuni veivakabulai,

Ka sa vakataudeitaki au na ligamuni i matau;

Ka sa taqomaki au me'u bula ena nomuni kaukauwa.

36O ni sa taqomaki au me'u kakua ni kau vakavesu.

Ka'u sa sega kina ni bau bale.

37Au sa vakasavi ira na kequ meca ka vesuki ira

Ka'u sega mada ni bau cegu me yacova sara ni'u sa vakadrukai ira.

38Au sa mokuti ira ki ra, era sa sega ni tucake rawa

Ka ra sa mai davo druka koto tu yani ena yavaqu.

39O ni sa solia vei au na kaukauwa me'u vala kina,

Ka vakadrukai ira na kequ meca.

40O ni sa vakavuna me ra dro tani na kequ meca mai vei au;

Ka'u sa vakarusai ira era sa cati au.

41Era sa tagica na veivuke ia sa sega ni dua me vakabulai ira;

Era sa masu vei Jiova ia sa sega ni sauma mai o koya.

42Au sa vakavurumemeataki ira me vaka na kuvu ni soso

Sa cagina tani ena cagi.

Au sa butulaki ira me vaka na soso ena gaunisala.

43O ni sa vakabulai au mai na dua na matatamata dauveisaqasaqa,

Ka lesi au me'u liutaki ira na veimatanitu;

Ka ra sa vakarorogo vei au na tamata au sega ni kilai ira.

44Ni ra rogoca na noqu vosa era na muria

Ka ra na cuva vei au na kai veimatanitu tani.

45Era sa datuvu

Ka lako sautaninini mai ena nodra bainivalu

46Sa bula tiko o Jiova, me vakacaucautaki o koya sa dautaqomaki au.

Sa noqu i vakabula na Turaga! Me vakacaucautaki na nona qaqa.

47Sa solia vei au me'u vakadrukai ira na kequ meca

Ka vakadrukai ira sobu na tamata ki rukuqu,

48Ka sa vakabulai au mai vei ira na kequ meca.

Sa i kemuni na Turaga o ni sa solia vei au me'u qaqa vei ira na kequ meca

Ka taqomaki au mai vei ira na tamata i tovo kaukauwa.

49 Roma 15.9 Au na vakacaucautaki kemuni ena kedra maliwa na veimatanitu,

Ka'u na sere ni vakalagilagi kemuni.

50Sa solia eso na qaqa levu vua na nona tui,

Ka vakaraitaka na nona loloma tudei vei koya sa digitaka,

Vei Tevita kei ira na nona kawa ka sega ni mudu.

Na Lagilagi ni Kalou Dauveibuli

Vua na i liuliu ni sere. A Same i Tevita.