1Ni oti koto e dua na gauna, a sa yaco mai na vosa i Jiova vei Ilaijia, ena i katolu ni yabaki, ka kaya, “Mo lako, ka vakaraitaki iko mada vei Eapi; ia au na vakatauca tale na uca ki vuravura.”
2A lako o Ilaijia me rairai vei Eapi. A ka levu na dausiga e Samaria.
3A sa kaya o Eapi vei Opetaia, ka lewa na lewe ni vale. Sa dau qaravi Jiova ena yalodina o Opetaia;
4ena gauna sa vakamatei ira kina na parofita i Jiova o Jesipeli, a qai kauta e lewe dua na drau na parofita o Opetaia, ka vunitaki ira ena rua na wasewase vakayalimasagavulu ena rua na qara vatu ka vakayalimasagavulu ena qara vatu, ka vakani ira ena madrai kei na wai.
5A sa kaya, “Mo lako voli ena vanua ki na mata ni wai vure kecega, kei na veibuca; me ra kakua ni mate kece na noda manumanu.
6Erau a wasea rua na vanua, me rau dui lako voli kina; a lako vakataki koya ena dua na sala o Eapi, ka lako vakataki koya ena dua na sala tani o Opetaia.
7Ia ni lako voli ena sala o Opetaia, raica, a tavaki koya o Ilaijia; a kilai koya, ka cuva sobu vakatoboicu, ka kaya, “O iko li oqo, na noqu turaga o Ilaijia?”
8A sauma o koya ka kaya, “Sai au oqo. Mo la'ki kaya vua na nomu turaga, ‘Raica, sa tiko e ke o Ilaijia.’ ”
9A qai kaya o koya, “A cava na noqu cala, o sa via solia kina na nomu tamata ki na liga i Eapi, me vakamatei au?
10Me vaka sa bula o Jiova na nomu Kalou, sa sega ni dua na vanua se matanitu, a sega ni talatala kina na noqu turaga me vakasaqarai iko; ia ni ra kaya, ‘Sa yali e ke,’ a qai vakabubuluitaki koya na i liuliu ni vanua o ya ni ra sega ni kunei iko.
11Ia oqo, o sa kaya, ‘Mo la'ki tukuna vua na nomu turaga, “Raica, sa tiko eke o Ilaijia.”
12Ena gauna ga e daru veitalatala kina, ena kauti iko tani na Yalo i Jiova, ka'u na sega ni kila se o na kau ki vei; ia ni'u sa lako ka tukuna vei Eapi, ka sega ni kunei iko o koya, ena qai vakamatei au, ia sa dina ga ni o au na nomu tamata, ka'u sa rerevaki Jiova ni'u sa cauravou ka yacova na gauna oqo.
13Sa sega li ni dua e tukuna vei kemuni na noqu turaga, ni sa vakamatei ira na parofita i Jiova o Jesipeli, kei na noqu a vunitaki ira e lewe dua na drau na parofita i Jiova, e yayalimasagavulu ena rua na qara vatu, ka vakani ira ena madrai kei na wai?
14Ia o sa kaya oqo, ‘Mo la'ki tukuna vua na nomu turaga, “Raica, sa tiko e ke o Ilaijia; ia ena qai vakamatei au o koya.”
15A qai kaya o Ilaijia, “Me vaka sa bula o Jiova ni lewe vuqa, ka'u a tu e matana, au sa na vakaraitaki au vua edaidai.”
16A la'ki tavaki Eapi o Opetaia, ka tukuna vua; me la'ki tavaki Ilaijia.
17Ia ni sa raici Ilaijia o Eapi, a kaya vua, “E sega li ni o iko, o vakavuna tiko na leqa e Isireli?”
18A sa kaya o Ilaijia, “Au sega mada ni bau vakaleqai ira na Isireli; o kemuni ga, kei na mataqali i tamamuni, o ni sa biuta na vunau i Jiova, ka muri ira na Peali.
19Ia oqo, mo ni talatala, mo vakasoqoni ira vata kecega na Isireli vei au, ki na ulunivanua o Kameli kei ira na lewe va na drau limasagavulu na parofita i Peali, kei na lewe va na drau na parofita ni kalou yalewa ni veikau o Asera, era kana tiko mai na teveli i Jesipeli.
Na Vakavala Kaukauwa e Ului Kameli20A talatala o Eapi vei ira kece sara na Isireli, ka vakasoqoni ira vata na parofita ki na ulunivanua o Kameli.
21A toro voleka vei ira kecega na tamata o Ilaijia, ka kaya, “Ena vica tale li na dede ni gauna mo ni lomalomarua tiko kina? Kevaka sa Kalou o Jiova, mo ni muri koya; ia kevaka kina o Peali, ia mo ni muri koya.” Era a sega ni tukuna vua e dua na ka na tamata.
22A sa kaya vei ira na tamata o Ilaijia, “Sai au duadua ga na parofita i Jiova au sa vo tiko; ia na parofita i Peali era lewe va na drau limasagavulu.
23Ia me ra solia vei keda e rua na bulumakau tagane; me ra qai digitaka o ira e dua na bulumakau, seleseleta, ka vakotora ena dela ni buka, ia me kakua ga ni vakacaudrevi na buka oqori; ia au na vakarautaka na bulumakau ka dua, ka vakotora e dela ni buka, ka'u na sega talega ni vakacaudreva na kena buka.
24Ia mo ni qai masu ka kaciva na nomuni kalou, ia ka'u na masu ka kaciva na yaca i Jiova; o koya ga sa vosa mai ena bukawaqa, me Kalou ga o koya.” Era a vosa kecega na tamata, ka kaya, “Sa vakadonui.”
25A qai vosa o Ilaijia vei ira na parofita i Peali, “Mo ni digitaka e dua na nomuni bulumakau, ka vakarautaka mada e liu; ni o ni sa lewe vuqa; ni qai masu ka kaciva na yaca ni nomuni kalou, ia me kakua ni vakacaudrevi na kena buka.”
26Era a kauta na bulumakau a soli vei ira, era a vakarautaka, masu ka kaciva yani na yaca i Peali, me vakatekivu mai na mataka lailai me yacova na sigalevu tutu, ka ra kaya, “Kemuni Peali, mo ni rogoci keimami mai!” A sega ni dua na domo e rorogo, se dua me vosa mai. Era a ladeva wavokita na i cabocabonisoro ka ra a tara.
27Ia ni sa sigalevu, a qai vakalialiai ira o Ilaijia, ka kaya, “Ni kaci vakadomoilevu, ni sa kalou o koya; de dua e vakanananu tiko, se lako vakatikitiki, se lako tu ki na dua na vanua, se moce tiko beka, ka sa yaga me vakayadrati.”
28Era a tabalaka na kaci vakadomoilevu, ka tavalaki ira ena seleiwau, kei na i sele, me vaka na nodra i valavala, a dave mai na nodra dra.
29Ia ni oti na sigalevu, era a parofisai tiko, ka vosa balavu vakalialia tiko me yacova na gauna a vakacabori kina na i soro; a sega na domo me rorogo, se dua me vosa mai, se e dua me rogoca.
30A sa kaya vei ira kecega na tamata o Ilaijia, “Ni toro voleka mai vei au;” era a toro voleka mai vua na tamata kecega. A sa vakavinakataka taumada o koya na i cabocabonisoro i Jiova ka a talaraki sobu.
31Sa qai kauta o Ilaijia e tinikarua na vatu me vaka na i wiliwili ni nodra mataqali na luve i Jekope, o koya sa vakatoka o Jiova me yacana o Isireli.Vteki 32.28; 35.10
32Mai na vatu kece o ya, a sa tara cake kina o koya na i cabocabonisoro ena yaca i Jiova. A sa kelia e dua na i keli me wavolita na i cabocabonisoro, ka sa levu vinaka me rawa ni vakatawana e rauta ni 14 na lita na wai.
33A sa tuvana na buka ena dela ni cabocabonisoro, ka musumusuka vakalalai na bulumakau, ka biuta ena dela ni buka. A sa kaya, “Ni vakasinaita e va na saqa ena wai, ka sova ki na i soro kama kei na buka.”
34A sa kaya tale, “Ni vakaruataka;” ka ra sa vakayacora vakakina. “Ni vakatolutaka,” ka ra sa cakava vakatolu.
35A sa vuabale ka drodrova na yasa ni cabocabonisoro na wai; ka sa vakasinaiti talega na i keli ena wai.
36Ena gauna a vakacabori kina na i soro ena yakavi, a toro voleka kina o Ilaijia na parofita, ka kaya, “Oi kemuni Jiova, na Kalou i Epara-ama, Aisake kei Isireli, me kilai mada ena siga oqo ni o ni sa Kalou ni Isireli, au sa nomuni tamata talega, ka sa nomuni vosa au sa cakava kina na ka kecega oqo.
37Mo ni rogoci au, kemuni Jiova, mo ni rogoci au; me ra kila na tamata oqo ni o ni sa Kalou oi kemuni Jiova, ka ni o ni sa kauti ira lesu tale vei kemuni.”
38E a qai lutu sobu mai na bukawaqa i Jiova ka kania na i soro kama, na buka, na vatu, kei na kuvu ni qele, ka domica na wai ena i keli.
39Ia ni ra sa raica oqo na tamata kecega, era sa cuva vakatoboicu, ka kaya, “Sa Kalou dina ga o Jiova.”
40Sa qai tukuna vei ira o Ilaijia, “Ni vesuki ira na parofita i Peali; ka me kakua sara ni dro bula e dua vei ira!” Era a tauri ira kece ka kauti ira sobu o Ilaijia ki na uciwai o Kisoni, ka vakamatei ira mai kea.
Oti na Gauna ni Lauqa41A sa kaya vei Eapi o Ilaijia, “Mo lako ka la'ki kana ka gunu. Au sa rogoca na vakere ni uca levu ni sa voleka mai.”
42Ia ni sa lako cake o Eapi me la'ki kana ka gunu, sa cabe cake ki dela i Kameli o Ilaijia, ka cuva ki na qele, ka sa vakacuva na matana ena maliwa ni duruna ruarua.Jeme 5.18
43Sa qai tukuna vua na nona cauravou, “Mo lako mada ka vakararai vaka ki wasawasa.”
A sa lako na nona cauravou ka lesu tale mai, ka kaya, “Au sega ni raica rawa e dua na ka.” E a talai koya vakavitu na cauravou o Ilaijia me la'ki vakararai.
44Ia ena kena i kavitu ni gauna, a lesu mai na cauravou ka kaya, “Au raica e dua na o lailai, sa sega ni sivia na levu ni liga ni tamata, ka sa tubu cake mai na wasawasa.”
Sa qai vakaroti koya na cauravou o Ilaijia, ka kaya, “Mo lako vei Eapi na tui ka tukuna vua me vakarautaka na nona qiqi vakaturaga ka lesu ki na nona vale ni bera ni tarovi koya na uca.”
45Ena dua na gauna lekaleka, sa vakaturu buto na lomalagi ena o loaloa, ka tekivu me liwa na cagi, ka tekivu me tau na uca levu. A vodo o Eapi ena nona qiqi vakaturaga ka lesu tale ki Jesireli.
46A sa lutuki Ilaijia na kaukauwa i Jiova; sa vauca vakaukauwa ki tolona na nona i sulu ka cici siviti Eapi me yaco sara ki Jesireli.
Who We AreWhat We EelieveWhat We Do
2025 by iamachristian.org,Inc All rights reserved.
