Niemaia 1 - Vakavakadewa Vou kei na iVola tale eso（FNVDC12）

1Oqo na i tukutuku me baleta na veika sa qarava ka rawata o Niemaia na luve i Akalaia tagane.

Na Masu i Niemaia me Baleti Jerusalemi

Ena vula o Kisilevi, ena i karuasagavulu ni yabaki ni veiliutaki vakatui nei Atakisekise e Perisia, ka'u a tiko o au, o Niemaia, ena kena koro turaga o Susa.

2A qai yaco yani ki kea e dua vei ira na wekaqu, o Anani, vata kei na nona i lawalawa eratou a lako vata yani mai Juta. Au a mani tarogi iratou kina ena veika me baleti ira na wekaqu na Jiu era sa suka lesu mai na veivakabobulataki mai Papiloni.

3E ratou a kaya vei au ni o ira kece sara sa vagalalataki ka tiko tale mai na noda vanua era sa sotava tiko e dua na gauna dredre ni ra sa raici sobu mai vei ira na kai tani era sa tiko veivolekati. Eratou kaya talega vei au ni se kabasu tu ga na bai kei Jerusalemi ka se bera ni vakavinakataki tale na veimatamata ni koro mai na kena a vakarusai taumada.

4Ni'u sa rogoca na veika oqo, au a dabe sobu ga ka tagi.

Au a tagicaka voli ena vica na siga ka'u sega ni kana. Au sa qai masu vakaoqo,

5“Kemuni Jiova na Kalou ni lomalagi! O ni sa rui cecere, ka keimami sa vakasinaiti ena yalo sa rerevaki kemuni. O ni sa dau yalodina ki na nomuni veiyalayalati kei ira era sa lomani kemuni ka talairawarawa ki na nomuni i vunau.

6Mo ni vakanamata mai vei au, i Jiova, ka rogoca na noqu masu, ni'u sa masulaki ira na nomuni tamata, o ira na Isireli, ena siga kei na bogi. Au sa vakatusa ni keimami sai valavala ca, oi keimami na Isireli. O ira na noqu qase era sa caka cala, ka vakakina oi au.

7Keimami sa vakayacora na veika dukadukali e matamuni ka sega ni muria na veika o ni vinakata. Keimami sa sega ni maroroya na lawa o ni a solia vei Mosese na nomuni tamata.

8Mo ni nanuma mada na vosa o ni a vakadreti Mosese kina na nomuni tamata, ena nomuni a kaya vakaoqo, ‘Kevaka dou sa sega ni dina vei au na Isireli, au na dui biubiuti kemudou ena veivanua tani.

10“Turaga, sai ira saka oqo na nomuni dauveiqaravi, o ira saka na nomuni tamata. O ni a sereki ira mai na nomuni kaukauwa levu kei na ligamuni qaqa.

11Mo ni rogoca mada na noqu masu kei na nodra masu na nomuni tamata tale eso era sa gadreva me ra vakarokorokotaka na yacamuni. Au kerea mo ni solia mada vei au na qaqa edaidai ka vakayacora me yaloveivosoti vei au na tui.”

Ena gauna o ya, au a dau qarava na mena waini na tui.