Isikeli 28 - Vakavakadewa Vou kei na iVola tale eso（FNVDC12）

Na Parofisai me Baleti Tui Taia

1Sa yaco tale vei au na vosa i Jiova, ka vaka: “Luve ni tamata, mo kaya vua na tui Taia,

2Sa kaya vakaoqo na Kalou o Jiova: Ena vuku ni sa rui dokadoka na lomamu, o sa kaya kina, ‘Oi au e dua na kalou, Ka'u sa tiko ena nodra i tikotiko na kalou, e loma ni wasawasa,’ ia o tamata ga, o sega ni kalou, ia sa dina ni o sa okati iko mo vuku me vaka e dua na kalou,

3o sa vuku cake vakaidina beka mai vei Taniela; sa sega ni dua na ka me ra vunia rawa vei iko;

4ena nomu vuku kei na nomu yalomatua o sa binia kina na i yau levu me nomu, o sa kumuna vata na koula kei na siliva ena nomu vale ni yau;

5ena levu ni nomu vuku vakadauveivoli, o a vakalevutaka kina na nomu i yau, ia sa viavialevu na lomamu ena vuku ni nomu i yau!

6A sa kaya kina na Kalou o Jiova, “O koya oqo, ni o sa nanuma e lomamu ni o sa vuku me vaka e dua na kalou,

7au na kauti ira mai na kemu meca rerevaki me ra vorati iko. Era na vakacacana na veika talei kece o sa kilai kina mai na nomu vuku mei na kila vakacakacaka.

8Era na biuti iko sobu ki na i keli ni rusa, o na mate me vakataki ira sa vakamatei e loma ni wasawasa.

9O sa kaya tiko li, ‘Oi au e dua na kalou,’ e matadra ka ra vakamatei iko, ia sa dina ni o sa tamata ga, ka sega ni kalou, ena ligadra o ira era vuetaki iko?

10O na mate me vaka na koli ena ligadra na kai tani era sa tawa cili. Sa i au ga, na Turaga o Jiova, ka'u sa cavuta na i vakaro oqo.”

11A sa yaco tale mai vei au na vosa ni Kalou o Jiova, ka vaka,

12“Luve ni tamata, mo osivaki koya na tui Taia, ka kaya vua, ‘Sa kaya vakaoqo na Kalou o Jiova: Oi vakatakilakila ni ka e totoka vakaoti, ka sinai ena vuku. Ka uasivi vakaoti ena mata vinaka.

13O a tiko mai Iteni, na nona i teitei na Kalou, ka daramaka na veimataqali vatu talei: na rupi kei na daimani; na topasa, na berili, na kaneliani, na jasipa; na safaia, na emeralita, kei na qarineti. Sa tiko talega vei iko na veiukuuku koula. Era sa vakarautaki ga me nomu ena siga o a buli kina.

14Au a vakatikora e dua na jerupi mai keri me vakatawani iko. O a tiko ena noqu ulunivanua tabu ni ka lako voli ena kedra maliwa na veivatu makumakualiliva.

15Sa dodonu sara o iko ena veisala o muria me vakatekivu mai na siga o a buli kina, me yacova ni sa kune na nomu caka cala.

16Ena kena levu na nomu dau veivoli o sa vakasinaiti ena i tovo kaukauwa, ka o sai valavala ca; Ka'u sa viritaki iko kina me vaka e dua na ka sa beci ka vakasisilataki mai na ulunivanua ni Kalou, ka sa vakasavi iko tani na jerupi ka i vakatawa mai na loma ni vatu bukawaqa.

17Sa dokadoka na lomamu ena vuku ni nomu mata vinaka; o sa vakacataka na nomu vuku me baleta na kemu totoka. Ka'u sa viritaki iko ki na qele; Ka'u na vakatusai iko e matadra na tui, me raici iko sara kina na matadra.

18Ni sa levu sara na nomu caka cala, ena nomu cakacaka vakayalo dodonu ni nomu veivoli o sa vakacacana kina na nomu veivale tabu; ka'u sa vakayacora mai kina na bukawaqa vei kemuni; ka sa kani iko, ka'u sa vukici iko mo dravusa ena dela i vuravura e matadra kece era raici iko.

19O ira kecega era kilai iko e matadra na tamata era sa domobulataki iko; o sa yacova mai e dua na i tinitini rerevaki ka o sa yali sara ka tawa mudu.’ ”

20A yaco vei au na vosa i Jiova, ka vaka:Joeli 3.4-8; Saka 9.1,2; Maciu 11.21,22; Luke 10.13,14

21Luve ni tamata, mo vaqara na matamu ki Saitoni, ka parofisaitaka na ca ena yaco kina, ka kaya,

22Sa kaya vakaoqo na Kalou o Jiova: Raica, au sa veimecaki kei iko Saitoni, ka'u na vakaraitaka na noqu i ukuuku vei kemuni. Era na kila ni sai au o Jiova, ni'u sa vakatauca vua na veilewa, ka vakamacalataka na noqu yalo dodonu vua;

23Ni'u sa na vakayacora vua na mate dauveitauvi, kei na dra me dave ena nona veigaunisala; ka ra na babale o ira na vakamatei vei ira, ka a veimecaki kaya na i seleiwau mai na veiyasana kecega. Era na qai kila ni sai au o Jiova.

24Ia vei ira mada na mataqali i Isireli, sa na sega tale ni dua na soni dauveilau me ceuti se dua na voto ni soni me lauti ira na kai nodra, ka ra vosa beci ira. Era na qai kila ni sai au na Kalou o Jiova.

25A kaya vakaoqo na Kalou o Jiova: Ni sa vakasoqoni ira na mataqali i Isireli mai vei ira na dui mataqali era sa dui vakasevi ira kina, ka vakamacalataka na noqu yalo dodonu vei ira e matadra na veimatanitu, era na qai tiko ena nodra vanua ka'u sa solia vua na nodra i talatala o Jekope.

26Ena tudei na nodra tiko kina, ka ra na tara na nodra veivale ka tea na nodra loganivaini. Ena tudei na nodra tiko kina, ena gauna ka'u sa na vakatauca kina na noqu lewa vei ira kecega na kai nodra: o ira ka ra i valavala beci vei ira. Era na qai kila ni sai au na Kalou o Jiova.