Siraki 37 - Vakavakadewa Vou kei na iVola tale eso（FNVDC12）

iTau lasulasu

1Na tamata kece e rawa ni kaya, “O yau tale ga nomu itau”; ia e so na itau era yacana ga.

2E sega beka ni vu ni rarawa vaka na mate nona vuki nomu itau se itokani me kemu meca?

3Sobo, lomaca! Cava beka o a buli kina mo solega na vanua e na lasu?

4E so era marau ni tiko vinaka nodra itau, ia e na gauna ni nona leqa era saqati koya.

5Na itau dina e na vukei iko e na nona itovo ni veikauitaki, e na taqomaki iko e na gauna ni ivalu.

6Kua ni guilecavi koya a nomu itau e na ivalu. Kua ni guilecavi koya nio sa vutuniyau.

Qarauna nio ciqo ivakasala

7Na dauvakasala kece e na vakasala yani, ia e so era veivakasalataki e na vukudra ga.

8Qarauni iko vua na daunivakasala, kila mada na cava e lomana - ni nanumi koya taumada ga - de lakolako e veidabuitaki iko,

9tukuna vei iko, “Sa vinaka nomu ivakarau,” qai tu vakatikitiki me raica na cava e yaco vei iko.

10Kua ni kere ivakasala vua e dua e kilakasamitaki iko; kua ni vakasalataki ira era vuvutaki iko.

11Kua ni kere ivakasala vua na yalewa erau veivuvutaki kei na dua tale, se vua na rerere me baleta na ivalu,

se vua na dauvolivolitaki me baleta na isau ni iyaya, se vua na dauvolivoli me baleta na volivolitaki,

se vua na buroburogo me baleta na vakavinavinaka, se vua na yaloca me baleta na yalovinaka,

se vua na vucesa me baleta na cakacaka, se vua na tamata cakacaka vagauna me baleta na vakacavari ni cakacaka,

se vua na dauveiqaravi vucesa me baleta na itavi levu - kua ni rogoci ira qo nira veivakasalataki.

12Kabita matua ga na tamata lotu o kila ni dau rokova na ivunau, e tautauvata na yalomudrau, e na rarawa vata kei iko nio kalouca.

13Vakabauta na ka e tukuna vei iko na yalomu, ni kauaitaki iko duadua o koya,

14ni yalomu e rawa ni dodonu nona itukutuku, cala na nodratou e vitu na yadra e na dela ni valeniyadra.

15Mo qai masu tale ga vua na Cecere Sara me tuberi iko e na dina.

Yalomatua kei na nuidei

16Na tuvatuva kei na vakasama e yavu ni cakacaka taucoko.

17E va na vakasama e kauaitaka na yalo:

18na vinaka kei na ca, na bula kei na mate; na yame ga e lewai iratou tu ga.

19E dua e rawa ni qaseqase, nodra qasenivuli e lewe levu, e sega ga ni rawata kina e dua na ka.

20E dua e gusu matata e rawa ni cati, qai levu na nona viakana,

21ni sega ni solia vua na Turaga na lewa matau, lailai sara na nona yalomatua.

22E rawa ni nanuma ga e dua ni yalomatua, dau kaya ni dina sara ga na ka e tukuna.

23O koya e yalomatua, e na vakavulici ira na wekana, e rawa ni vakabauti na nona kilaka.

24O koya e yalomatua, e na vakacaucautaki vakalevu, era na vakatokai koya me marau o ira kece era raici koya.

25Na bula ni tamata e vakaiyalayala, ia na bula nei Isireli e sega ni yalani.

26O koya e yalomatua vei ira na wekana, e na vakabauti, e na bula tawamudu na yacana.

Qarauna na ka o kania

27Na luvequ, vakadikeva na yagomu nio se bula. Ke dua na ka e na ca vua, kua ni vakayagataka.

28Ni sega ni ka kece e vinaka vei keda kece, sega tale ga ni o keda kece eda taleitaka na ka kece.

29Kua ni domona vakasivia e dua na kakana vinaka, kua ni kana vakasese,

30ni dau vakavuna na tauvimate kei na lomalomaca.

31E levu era sa mate e na kana vakasivia, ia o koya e qarauni koya kina, e na bula dede.