Maika 6 - Vakavakadewa Vou kei na iVola tale eso（FNVDC12）

Sa bolei Isireli na Kalou

1Ni rogoca mada na bolebole i Jiova me baleti Isireli.

I Jiova, mo ni mata cake, ka vakaraitaka na nomuni lewa; ni laiva me ra rogoca na veiulunivanua kei na veidelana na ka o ni sa tukuna.

2Oi kemuni na veiulunivanua, oi kemuni na yavu dei kei vuravura, mo ni rogoca mada na vosa ni bolebole i Jiova! E dua na ka sa bolei ira kina na nona tamata o Jiova. Sa na vakamacalataka o koya na ka me beitaki ira kina na Isireli.

3A sa kaya o Jiova, “Kemuni na noqu tamata, na veika cava beka au sa vakayacora vei kemuni? Au sa vakaicolacolataki kemuni li vakaevei? Ni sauma na noqu taro.

4Lako 12.50,51; Lako 4.10-16; Lako 15.20Au a kauti kemuni tani mai Ijipita. Au a vakabulai kemuni mai na veivakabobulataki. Au a vakatalai Mosese kei Eroni kei Miriama me ratou liutaki kemuni mai.

5Tiko 22.2–24.25; Josua 3.1–4.19Kemuni na noqu tamata, ni nanuma mada na ka sa nakita me cakava vei kemuni o Pelaki na tui Moapi kei na i lakolako ni nona ciqoma na nona kerekere o Balami na luve i Piori. Ni nanuma tale mada ga na veika sa yaco ena i lakolako mai Sitimi ki Kilikali, mo ni qai kila kina na ka au sa cakava oti mo ni vakabulai rawa kina.”

Na Veika sa Vinakata o Jiova

6A cava me noqu i kaukau vei Jiova, na Kalou ni lomalagi, ni'u sa lako me'u sokalou vua? Me'u kauta beka na luve ni bulumakau uro vinaka me ra la'ki cabo me i soro kama vua?

7Ena taleitaka beka o Jiova ke'u kauta vua e udolu vakaudolu na sipi, se me vuqa vakavuqa na uciwai sa drodro mai kina na waiwai olive? Me'u vakacabora beka vua na noqu ulumatua me i buluti ni noqu i valavala ca?

8E sega, sa tukuna oti ga vei keda o Jiova na ka e vinaka. Na ka e vinakata o koya vei keda sai koya oqo: me vakayacori ga na ka dodonu, me vakatakilai ga na yalololoma sa sega ni yalani, ka me ia ga na talairawarawa kei na veitokani veivolekati kei na noda Kalou ena yalomalumalumu.

9Sa ka ni yalomatua na rerevaki Jiova. Sa kaci ki na koro levu o koya, ka vaka, “Ni vakarorogo, oi kemuni o ni soqoni tiko oqori ena koro!

10Sa tiko ena nodra veivale na tamata ca na i yau era sa rawata mai na i tovo veivakaisini. Era sa taurivaka ena veivoli na i vakarau lasulasu, ka'u sa besetaka oqo.

11Me'u na vosoti ira vakaevei na tamata era sa dau taurivaka na i vakarau bibi lasulasu?

12O ira na nomuni tamata vutuniyau era sa dau rawa-ka mai vei ira na dravudravua ena veivakalolomataki, ka o ni sa tamata lasulasu kecega.

13O koya oqo au sa tekivuna kina na cakacaka ni nomuni vakacacani ka vakarusai ena vuku ni nomuni i valavala ca.

14O ni na kana tiko, ia o ni na sega ga ni mamau — ka o ni na viakana tikoga. Ni o ni butakoca na ka mo ni la'ki maroroya, o ni na sega ni maroroya rawa. Kevaka e dua na ka o ni sa maroroya rawa, au na qai vakarusa ena i valu.

15O ni na kaburaka na itei ni sila, ia o ni na sega ni tamusuka ni sa matua. O ni na caka waiwai olive, ia o ni na sega ni vakayagataka. O ni na qaqia na qerepi, ia o ni na sega ga ni gunuva na kena waini.

161Tui 16.23-28; 1Tui 16.29-34; 21.25,26Ena yaco na veika oqo baleta ni o ni sa muria tiko na i tovo ca nei tui Omirai kei na luvena o tui Eapi. O ni sa tomana tikoga na nodrau i vakarau ni cakacaka, o koya oqo ka'u na vakacacani kemuni kina, ka ra na cati kemuni na tamata kecega. Era na beci kemuni na tamata kecega.”