1 Samuela 1 - Vakavakadewa Vou kei na iVola tale eso（FNVDC12）

Na Sucu kei na Cabori nei Samuela

1E a bula voli ena koro o Ramaceimi Sofimi mai na vanua veidelana o Ifereimi e dua na tamata, na yacana o Ilikana mai na mataqali i Ifereimi. E luve i Jiorame o koya, ka makubui Ilaiu mai na vuvale i Tou ena mataqali i Sufi mai Efiraca.

2E rau lewe rua na wati Ilikana; e dua na yacana o Ana, ka yacana na kenai karua o Penina. E vakaluveni o Penina, ia o Ana e sega ni vakaluveni.

3A sa dau lako cake mai na nona koro ena veiyabaki o Ilikana me la'ki sokalou ka vakacabora na nona i madrali vei Jiova ni lewevuqa mai Sailo, na vanua ka rau tiko kina o Ofinai kei Finiasi. Oi rau oqo erau luvei Ilai tagane ka rau bete talega i Jiova.

4Ena veisiga kece e dau vakacaboisoro kina o Ilikana, sa dau solia e dua na kena i votavota vei Penina na watina, ka ra tau yadua o ira kece na luvena tagane kei ira na luvena yalewa.

5Ia sa solia ga vei Ana na i votavota sa vakaruataki baleta ni sa dau lomani koya vakalevu sara, ka veitalia ga ni sa tarova tu na nona vakaluveni o Jiova.

6E dau vakacudrui Ana sara vakalevu o Penina na kena i sa, ka dau vakararawataka na lomana, baleta ni sa sogota na ketena o Jiova.

7E yaco tiko na ka oqo e veiyabaki; ena veigauna kece eratou dau lako cake kina ki na vale i Jiova mai Sailo, e dau vakararawataki Ana vakalevu sara o Penina, ka dau tagi kina o koya, ka bese ni kana.

8Sa dau tarogi koya o Ilikana na watina, “I Ana, na cava o tagicaka tiko? A cava o bese kina ni kana? A cava o dau yalorarawa tu ga kina? E sega li ni'u sa vinaka cake sara e matamu ka ca ke sa lewe tini na luvemu tagane?

O Ana kei Ilai

9Ia ena dua na gauna, ni oti na nodra kana ka gunu mai Sailo, a sa qai tucake o Ana. Ena gauna vata oqori, sa dabe tiko ena nona i dabedabe ena tutu ni katuba ni Vale i Jiova o Ilai na bete.

10E a rarawa vakalevu sara o Ana, ka tabalaka na tagi vei Jiova ena nona masu.

11Sa qai cavuta na nona bubului, ka kaya, “Kemuni Jiova ni lewevuqa, mo ni raici au mai na nomuni vada! Mo ni raica mada na noqu leqa kei na noqu vakararawataki, mo ni nanumi au me'u kakua ni guilecavi! Ia kevaka o ni solia vei au e dua na luvequ tagane, au sa yalataka me'u na solia na nona bula taucoko vei kemuni, ka na sega ni koti vakadua na drauniuluna.”

12Me vaka ni sa masu tiko o koya ena mata i Jiova, sa vakaraica tiko na tebe ni gusuna o Ilai.

13Sa masu vuni tiko o koya; ka yavavala walega na tebe ni gusuna ka sega ni rogo na domona. Sa mani nanuma kina o Ilai ni a mateni o Ana,

14ka kaya vua, “Ena vica tale na gauna na dede ni nomu mateni tiko; mo biuta laivi sara na gunu waini ka mo kilai yalomu!”

15A sa vosa o Ana ka kaya, “E segai, noqu turaga, au sega sara ni mateni se gunuva na waini se na gunu kaukauwa; au sa yalewa yalorarawa ka lomabibi oi au, ni'u sa masu tiko vei Jiova, ka talaucaka vua na noqu leqa kece.

16Kakua ni okati au na nomuni vada me'u dua vei ira na yalewa ca, ni'u sa vosa tiko ena vuku ni rarawa ni yaloqu, kei na yalobibi, me yacova mai na gauna oqo.”

17Sa qai kaya vua o Ilai, “Mo lako ena vakacegu, ia me solia mada ga vei iko na Kalou ni Isireli na ka o kerea vua.”

18A sa kaya o Ana, “Me'u kune loloma mada e matamuni, oi au na nomuni vada.” A sa kana ka lako yani na yalewa oqo ena nona i lakolako, ka sega tale ni vakaveveku mata o koya.

Na Sucu nei Samuela

19E ratou a yadra vakamataka sara o Ilikana kei na nona vuvale ka lotu vei Jiova ka vakatekivu tale na nodratou i lakolako lesu ki Rama. A rau sa veimoceri o Ilikana kei Ana na watina; ka sa nanumi koya o Jiova ka sauma vua na nona masu.

20Ia ni sa yaco mai na kena gauna, sa kunekune ka bukete o Ana, ka vakasucuma e dua na gonetagane. A sa vakatoka me yacana o Samuela, ni a vakamacalataka vakaoqo, “Ni'u sa kerei koya vei Jiova.”

21A sa lako cake ki Sailo o Ilikana, kei ira kecega na nona lewe ni vale me ra la'ki vakacabora na nona i soro vakayabaki, kei na i soro digitaki me vaka sa yalataka o koya.

22Ia sa mani sega ni lako vata kei ira o Ana, ni sa kaya vei watina, “Me sa tei kali mada na gone, au na qai kauti koya ki na vale i Jiova me rairai e matana, ka me tiko kina ka tawa mudu.”

23A sa kaya vua o Ilikana na watina, “Mo cakava ga na ka e vinakata vei iko, mo waraka mada me kali o koya, ia me vakataudeitaka o Jiova na nomu vosa ni yalayala me yaco.” A sa mani tikotiko ga e vale o Ana, ka qarava na luvena tagane me yacova na gauna sa kali kina.

24Ia ni sa kali oti na gone, sa qai kauti koya ki Sailo kei na dua na bulumakau tagane yabaki tolu, kei na 10 na kilokaramu na falawa, kei na dua na bola kuli-ni-manumanu ka sinai ena waini. A sa kauti Samuela o tinana ena gauna e se gone lailai sara kina ki na Vale i Jiova mai Sailo.

25Era sa vakamatea na bulumakau, ka kauta cake na gone vei Ilai.

26Sa qai vosa o Ana vei Ilai ka kaya, “Kemuni na noqu turaga, me vaka ni o ni bula tiko, sai au oqo na vada ka a mai tucake tu eke e matamuni, ka masu tiko vei Jiova.

27Au a kerea vua na gone oqo; ia sa rogoca o koya na noqu masu.

28Ia, au sa cabora lesu tale kina na gone oqo vei Jiova; ena nona tiko ga o Jiova me yacova na nona bula taucoko. A sa qarava na sokalou vei Jiova mai kea o iratou.