Jope 12 - Vakavakadewa Vou kei na iVola tale eso（FNVDC12）

Vosa o Jope: Sa Levu na Noqu Veiwalitaki

1A vosa o Jope, ka kaya,

2E sega ni vakabekataki ni o kemudou na domodra na tamata.

Ia ena gauna dou sa mate kina, dou na mate vata kei na vuku.

3Na noqu yalomatua sa tautauvata ga kei na nomudou;

Ka'u sega sara ni toro sobu vei kemudou ena dua na ka;

Ia na ka kece sara ga dou sa tukuna oti era sa kila tu na tamata kecega.

4E dina ga ni'u yalododonu tu ka sega na ka au sa bau beitaki kina,

Ia o iratou sara ga na noqu i tau

E ratou sa mate ena veiwalitaki au;

Ia ena dua na gauna e a dau sauma tiko mai kina na noqu masu na Kalou.

5O kemudou e sega na nomudou leqa,

Ia o dou qai mai veiwalitaki au tiko;

O dou vacuka tiko e dua sa vakarau tiko me bale.

6Ia o ira na daubutako kei ira na lecava na Kalou

Era tu vinaka sara tu ga,

Ka nodra kalou duadua wale sara ga na nodra kaukauwa.

7E vuqa sara na ka ena rawa ni ra vakavulici kemudou kina

Na manumanu vuka kei na manumanu yava i va;

8Dou kerei ira na manumanu ni vanua mamaca kei ira mai wasawasa

Me mai nomudou na nodra vuku.

9Era kila kece tu na manumanu ni liga i Jiova ga sa buli ira.

10Na Kalou ga sa lewa na i lakolako ni nodra bula

Na manumanu kei na tamata;

Ka tu sara ga ena nona kaukauwa na bula ni tamata yadua.

11Ia me vaka ga ni dau taleitaka na yamemu na tovolea na kakana,

Sa taleitaka vaka talega kina na daligamu me dau vakarorogo ki na vosa.

12Sa tu na vuku vei ira na qase,

Kei na yalo matau vei ira sa vuqa nodra siga.

13Sa tu na rai yawa vei ira na qase;

Ia sa tu vua na Kalou na rai yawa

Kei na kaukauwa me vakayaco ka kina.

14Ni sa basuraka sobu na Kalou, o cei ena qai tara vou tale;

Se o cei ena sereka rawa na tamata sa biuta ki vale ni veivesu na Kalou?

15Ena yaco na dausiga ni sega ni vakatauca na uca na Kalou;

Ka na coka mai na dobui ni dolava na wai o koya.

16Sa kaukauwa sara na Kalou

Ka sa dau qaqa ena veigauna kecega,

Ka rau vakarorogo ruarua ki na nona lewa

O koya e dauveivakaisini kei koya e vakaisini.

17Sa vakarusa na Kalou na nodra vuku na turaga,

Ka vakasesea na nodra cakacaka na i liuliu

Me vaka na cakacaka ni tamata lialia.

18Sa vakasivoi ira na tui ka biuti ira me ra kaivesu;

19Ka vakalolovirataki ira na bete kei ira na daulewa ka.

20Sa vagalui ira na tamata nuitaki,

Ka kauta laivi na nodra vuku na qase.

21E vakamaduataki ira na tu ena i tutu ni kaukauwa,

Ka muduka vakadua na nodra kaukauwa na turaga.

22E vakacilava yani o koya na rarama ki na veivanua ni yaloyalo ni mate.

23Sa vakaukauwataki ira na veimatanitu me ra qaqa ka rogo,

Ia e muri, a qai vakamalumalumutaki ira ka vakarusai ira sara.

24Sa qai vakalialiai ira na i liuliu ni veimatanitu oqori o koya,

Ka cakava me ra veilakoyaki vakaveitalia,

Me ra veilecayaki ka mani lako sese;

25Ka ra vakayayamo voli ena butobuto ka ra tatabalebale

Me vakataki ira na daumateni.