1Ena yaco na veika ca vei ira era la'ki kere veivuke ki Ijipita.
Era sa vakararavi ki na veiqiqinivalu kei na ose,
Kei ira na sotia.
Ia era sa sega ni vakararavi
Vei Jiova na Kalou Yalo Savasava ni Isireli,
Se kere veivuke vua.
2Sa kila na ka e cakava o koya,
Ka sa kauta mai na ka ni veivakaleqai.
Sa sega ni dau vakasuka na nona vosa,
Ka sa na dau totogitaki ira era i valavala ca,
Kei ira era dau vukei ira na i valavala ca.
3Era sa tamata ga na kai Ijipita ka sega ni Kalou;
Era sa vakalewe ga na nodra ose, ka sega ni yalo.
Ni sa dodoka na ligana o Jiova,
Ena malumalumu o koya sa ia na veivuke,
Ka na bale o koya sa vukei,
Ka rau na rusa ruarua ga.
4Sa kaya vei au o Jiova,
“Ke mani levu sara vakaevei na nodra kaila na i vakatawanisipi,
Era sa sega ni vakasava tani rawa na laione
Mai na kena manumanu e se qai vakamatea.
Sa vakakina oqo ni sa sega na ka me tarovi au
Mai na noqu via taqomaka na Ulunivanua o Saioni.
5Me vaka na nona ovici ira na luvena na manumanu vuka,
Ena vaka o ya na noqu taqomaki Jerusalemi.
6Kemuni na Isireli, ni lesu mai vei koya o ni sa talaidredre vua.
7Ena siga o ya era sa na dui biuta tani kina na tamata yadua na nona matakau siliva kei na matakau koula sa cakava na ligamuni mo ni vakadukadukalitaki kemuni kina. Ena vakarusai o Asiria.
8Ena vakarusai o Asiria ena i valu,
Ka sega ena qaqa ni tamata.
Era na dro yani na kai Asiria mai na i valu,
Ka ra vakabobulataki na nodra cauravou.
9Ena dro na nodra tui ena rere,
Era na taqaya vakalevu na vakailesilesi
Ka ra biuta tu mai na nodra drotini ka dro yani.”
Ni sai Jiova ga sa kaya vakaoqo,
O koya ka sa qaravi mai Jerusalemi,
Ka sa caudre na nona bukawaqa
Ena vuku ni i soro kama.
Who We AreWhat We EelieveWhat We Do
2025 by iamachristian.org,Inc All rights reserved.
