Jope 6 - Vakavakadewa Vou kei na iVola tale eso（FNVDC12）

Sausaumi Lesu o Jope

1E sauma o Jope, ka kaya,

2Kevaka e vakarautaki na bibi ni noqu leqa kei na noqu rarawa,

3Na noqu vosa vakaveitalia me kakua ni vakurabuitaki kemudou.

4Sa cacabolobolo vei au na gasau titi ni Kalou,

Na kena gaga sa robota kecega na yagoqu;

Kei na nona veivakarerei kece sara sa yatuna oti tu me'u na sotava.

5Ni kakana voli e dua na asa, ka vakakina na bulumakau,

E rau sa dui wele sara ga ka mamarau.

6Ia o cei sara mada e rawa ni kania na kakana

Dranudranu e sega ni vakamasima?

E rawa sara talega ni'u na taroga

Na i kanakana ni vulavula ni yaloka.

7Na kakana vakaoqo e yali kina na noqu viakana,

Kevaka au kania, ena rawa ni'u luaraka.

8A cava beka e sega tiko kina ni vakayacora na Kalou

Na ka au kerea?

A cava e sega kina ni sauma mai na noqu masu ena ka au gadreva?

9Au na sega ni tukuna rawa na levu ni noqu marau,

Kevaka e dodo liga sara ga mai oqo na Kalou ka vakamatei au.

10Ke'u kila rawa ni sa na vakamatei au,

Au na ladelade, ka rika ena levu ni noqu marau;

Ka'u na sega ni via vakila na mosi levu ka tu vei au.

Au kila tu ni Kalou e dodonu sara ka savasava

Ka'u sega mada ni sa bau saqata na nona lewa.

11Na kaukauwa cava soti e sa taura tiko na noqu i cegu?

Au sa wili cala tu ka'u sa via mate yani me'u cegu.

12Na noqu i cegu e sega ni ka kaukauwa sara

Me vaka na kaukauwa ni vatu se na kaukauwa ni parasa.

13Sa sega na kaukauwa e vo tiko vei au

Me rawa kina ni'u vakabulai au vakataki au;

Ka sega na vanua me'u gole rawa kina me rawa ni'u bau vukei mai kina.

14Ena gauna ni leqa me vaka au sa tiko kina,

Au gadrevi ira vakalevu na noqu i tau yalodina,

Se'u sa qarava tikoga na Kalou se'u sa vakanadakuya.

15Ia o kemudou na noqu i tau lomani,

O dou mai cakava ga na nomudou veivakacalai me vaka e dua na uciwai,

Ni lauqa ga na vanua ka mai maca tu yani.

16E sinai koto na uciwai ena wai cevata,

Ia ni sa katakata na vanua sa qai waicala,

17Ka mani kune tu yani na botodra ni ra sa mamaca.

18Era vaqaqara wai voli yani na i lala levu dauveilakoyaki;

Era mai seseta na sala ka lako vakaveitalia

Ka ra mani mate kecega ena vanua dravuisiga.

19Ni ra vaqaqara wai na i lala dauveilakoyaki

Mai na vanua o Sipa kei ira na Timani,

20Era a qai leqa ka ra veilecayaki

Ni ra a maca kece tu na veiuciwai.

21Au vakatauvatani ira na uciwai oqori vata kei kemudou

Baleta ni dou raica na ka ena yacovi au qai vuka na yalomudou.

22Au kerea beka e dua na i loloma mo dou solia vei au,

Se mo dou la'ki temaka e dua ena ka e baleti au,

23Se mo dou kauta nomudou i lavo se na i yau vei ira na meca

Se na dauveivakasaurarataki me ra sereki au?

24Sa vinaka, au sa na tiko lo me'u vakarorogo mada,

Dou tukuna kece sara mai na cala au a cakava.

25Na i le yalomatua au na rawa ni vakadinata,

Ia na nomudou i tukutuku e rui galala.

26O dou nanuma ni noqu vosa na cagi wale ga;

Ia na cava ga o dou sauma tiko mai kina na noqu tagi ni nuinui ca?

27O ira mada na luveniyali bobula dou qai veimautaki ira,

Ka saga vei ira na nomudou i tau na i sau vinaka me ra voli kina!

28Dou raica vakavinaka mai na mataqu.

Au na sega sara ni lasu.

29Na nomudou vosa sa rui sivia.

Na nomudou veibeitaki vakailasu mo dou tinia.

Dou kakua ni beitaki au me'u ca kina.

Oi au, au tu ga ena dodonu kei na dina.

30Ia o kemudou, o dou nanuma ni'u sa lasu tikoga,

Ka nanuma ni duidui ni dodonu kei na cala au sega ni kila.