1A yaco tale vei au na vosa i Jiova, ka vaka:
2“Luve ni tamata, mo rai mada vaka ki Jerusalemi, ka vakatauca na nomu vosa ki na veiyasana tabu; ka parofisaitaka na ka ca ki na vanua o Isireli,
3ka kaya ki na vanua o Isireli, ‘sa kaya vakaoqo o koya na Turaga, au na kemu meca, ka'u na ucuna na noqu i seleiwau mai na kena taga ka taya na tamata yalo dodonu kei ira na tamata ca.
4Ena vuku ni noqu a muduki ira vata na yalo dodonu kei ira na tamata ca: ia ni vaka tu oqo, ena ucu kina na noqu i seleiwau mai na kena taga me taya na tamata kecega vaka ki na ceva ka vaka talega kina ki na vualiku;
5ka ra na kila na tamata kecega ni sai au o Jiova ka'u sa ucuna na noqu i seleiwau mai na kena taga; ka na sega ni daramaki tale kina.’ ”
6“O koya oqo, o iko na luve ni tamata, mo vutugu me vaka na mosi ni rarawa bibi ni yalomu e matadra.
7Ia ni ra sa kaya vei iko, ‘A cava li o vutugu kina?’ mo qai kaya, ‘Ena vuku ni dua na i rogorogo. Ia ni sa yaco mai, ena waicala na loma ni tamata kecega, ka na nawa na duru ni tamata kecega me vaka na wai. Raica sa lako tiko mai, ka na vakayacori vakaidina,’ ” sa kaya na Kalou o Jiova.
8A yaco tale vei au na vosa i Jiova, ka vaka:
9“Luve ni tamata,
mo parofisai mada ka kaya,
‘Sa vosa vakaoqo o Jiova, mo kaya:
A i seleiwau, a i seleiwau sa vagatari tu
ka sa vakacalivataki vinaka.
10Sa vagatari tu me ia kina na veivakamatei,
Ka masiraki me tatibi vaka na livaliva!
Se me da veiwali li? O ni sa beca na noqu i titoko,
i na luvequ, na veika kecega sa caka ena kau.
11Sa vakacalivataki tu na i seleiwau,
me rawa ni taurivaki;
A sa vagatari, ka qusiraki vinaka,
ka soli ki na ligana na dauveivakamatei.
12Mo tagi ka qoqolou o iko na luve ni tamata,
Ni sa baleti ira na noqu tamata
kei ira na turaga na i seleiwau oqo.
Era na vakamatei na veiliutaki e Isireli
Era sa soli ki na i seleiwau kei ira na noqu tamata
O koya oqo mo tavi lomaseremu kina.
13Ni sa sega ni dua na vakatovolei
A cava tale li o na rawata kevaka o beca na i titoko?”
Sa kaya na Kalou o Jiova.
14“O koya oqo, mo ia kina na parofisai o iko na luve ni tamata; ka tavia vata na ligamu, ka laiva me lutu mai vakarua, io me vakatolu, na kedra i seleiwau o ira me ra moku; e sai seleiwau ni veivakamatei levu, ka vakavolivoliti ira,
15ka me waicala kina na lomadra, ka ra bale mate e lewe vuqa ena nodra matamata ni koro. Na noqu i seleiwau ni veivakamatei sa wawa tu ena veimatamata yadua, sa taliva vinaka me ia kina veivakamatei.
16Ena ta yani ki na i matau se ki na i mawi, ena vanua ga sa qara vakadodonu kina na matana.
17Ia oi au, au na qumia vata na ligaqu ruarua, ka vakaceguya na noqu cudru; oi au o Jiova, ka'u sa vosa me vakaoqo.”
18A sa yaco tale vei au na vosa i Jiova, ka vaka:
19“Luve ni tamata, mo vakatakilakilataka e rua na sala me muria yani na nona i seleiwau na tui Papiloni; e duabau ga na vanua e rau vu ruarua mai kina. Ia mo vakaduria e dua na i dusidusi ni sala, ka kelea ena mua ni sala ki na koro;
20mo vakatakilakilataka e dua na sala, me yaco yani ki Rapa, na nodra koro na kawa i Amoni, kei Juta talega, kei Jerusalemi na koro vakabai.
21Ni sa tu o tui Papiloni ena basoga ni salatu, ena mua ni rua na sala, me taurivaki kina na i vakatakilakila; sa vakayavalata na gasau o koya, sa taroga na matakau, sa dikeva na yate ni manumanu.
22Sa tu ena ligana i matau na madigi kei Jerusalemi, me dolava na gusuna ena qoqolou, me tabalaka cake na domo ni kaila, me vakatikora na i tukituki ni voro bai ki na matamata ni koro, me viria na suva, me tara na vale ni valu.
23Ia vei ira, e rairai vaka e dua na madigi vakailasu; era sa vosa bubului oti tu; ia sa vakananuma ga o koya na nodra cala, me rawa kina ni ra tauri vakavesu.
24O koya oqo, sa kaya kina vakaoqo na Kalou o Jiova: Ni o ni sa kitaka na nomuni caka cala me sa nanumi, ni sa vakavotui na nomuni talaidredre, ka sa kilai na nomuni i valavala ca ena nomuni cakacaka kecega; io ena vuku ni o ni sa nanumi, o ni sa tauri kina vei ira.
25“Ia o iko o tamata beci ka vere ca, na turaga ni Isireli, ka sa yaco mai na nomu siga na gauna me tau kina na i tinitini ni kemu i totogi,
26sa kaya kina vakaoqo na Kalou o Jiova: Mo luvata tani na i vauvau, ka kauta tani na i sala vakatui; ena sega ni o koya tikoga na veika sa yaco; mo laveta cake na veika sa vakalolovirataki, ka vakasivoi o koya sa cecere.
27Au na vukica me rusa, me rusa, io me rusa; ena sega wale mada ga ni kune e dua na tikina, me yacova ni sa lako mai o koya sa dodonu me nona; ia ka'u na solia vua.
28“Ia o iko, na luve ni tamata, mo ia na parofisai, ka kaya, Sa kaya vakaoqo na Kalou o Jiova ena vukudra na Amoni kei na nodra vunauci; ka kaya,
Sa ucu mai na kena taga na i seleiwau,
Io, na i seleiwau me ia kina na veivakamatei.
Sa masiraki vinaka me makumakualiliva
Ka me tatibi me vaka na livaliva.
29Ni ra sa raica vei iko na nomu raivotu vakailasu ena vukumu ka me taubeni e domodra na tamata beci ka dauvere, o ira ka sa yaco mai na kedra siga, me ra totogi kina ena vuku ni nodra caka cala.
30“ ‘Mo vakasuka tale na i seleiwau ki na kena taga. Au na vakataulewa vei iko ena vanua o a buli kina, io na vanua o a sucu kina.
31Ia ka'u na sovaraka vei iko na noqu cudru; ka'u na uvuca e delamu na bukawaqa ni noqu cudru; ka'u na soli iko ki na ligadra na tamata dauveivakararawataki, ka kedra dau na veivakarusai.
32O na buka me bukani kina na bukawaqa; ia na nomu dra ena curuma na qele; o na sega ni nanumi tale; ia oi au o Jiova ka'u sa cavuta.’ ”
Who We AreWhat We EelieveWhat We Do
2025 by iamachristian.org,Inc All rights reserved.
