Vosavakaibalebale 13 - Vakavakadewa Vou kei na iVola tale eso（FNVDC12）

1Na gone vuku ena vakarorogo ni vakadodonutaki koya o tamana, ia na tamata dokadoka ena sega ni via vakabauta ni cala.

2Era na saumi na tamata vinaka ena veika era sa kaya, ia o ira na tamata lawaki ca era sa viakania ga na i valavala kaukauwa.

3 Sr 28.25,26 Qarauna vinaka na ka o tukuna ka taqomaka na nomu bula. Na tamata e sega ni dau qarauna na nona vosa sa vakarusai koya ga vakai koya.

4Veitalia sara ga na levu ni nona gadreva e dua na ka na tamata vucesa, ena sega sara ni rawata.

5Na tamata yalododonu e cata na lasu, ia na nona i tovo na tamata ca sa vakasisila ka veivakamaduataki.

6Sa maroroya na tamata yalododonu na nona yalododonu, ia na i tovo vakasisila sa vakarusai ira ga na tamata i valavala ca.

7Eso na tamata era dau via vakaraitaka ni ra vutuniyau, ia sa segai sara na ka e tu vei ira. Eso tale era via vakaraitaka ni ra dravudravua, ia sa levu sara na ka e tu vei ira.

8Na tamata vutuniyau ena vakayagataka na nona i lavo me qaravi kina na nona bula, ia sa sega ga ni vakasosataki na nona bula na tamata dravudravua.

9O ira na yalododonu era sa vaka na rarama ni cina serau, ia o ira na tamata ca era sa vaka na cina kata bokoboko.

10Na yaloviavialevu sa vakatubura ga na veileti. Sa ka ni yalomatua ga me dautarogi na i vakasala.

11Na i yau e rawa vakarawarawa ena yali talega vakarawarawa, ia na i yau e rawa vakadredre ena vakalevutaki.

12Na ka e nuitaki qai sega ni yaco sa vakavorotaka na yalo, ia na kena yaco na ka e gadrevi sa vaka na kau ni bula.

13Kevaka o besetaka na i vakasala vinaka, o sa vinakata sara tikoga na leqa; ia ni o sa muria, o na vakabulai.

14Na nodra i vakavuvuli na tamata yalomatua sai vurevure ni bula, era na vukei iko ni o sa leqa.

15Na tamata kila-ka ena dokai, ia o ira sa sega ni vakadinati era sa lakova na i lakolako me ra rusa kina.

16Na tamata yalomatua ena dauvakasama mada e liu ni bera ni cakava e dua na ka, ia na tamata yalowai ena vakaraitaka na nona lecaika.

17Na daukau i tukutuku e sega ni vakadinati ena vakatubu leqa, ia o ira era vakadinati era sa vakavuna na veisaututaki.

18Na tamata e bese ni vakavulici ena dravudravua ka madua, ia na tamata ena ciqoma na nona vakadodonutaki ena dokai.

19Sa dua na ka talei ni o sa rawata na ka o gadreva! Na tamata lecaika sa bese ga ni gole tani mai na ca.

20 Sr 6.33,34 O na yaco mo yalomatua ni o sa vuli mai vei ira na tamata yalomatua, ia o na rusa kevaka o sa vakailala vata kei ira na tamata lecaika.

21Na leqa ena muri ira na tamata ca ki na veivanua kecega era lako kina, ia era na saumi na tamata yalododonu ena veika vinaka.

22Na tamata vinaka ena laiva tu mai na i yau me nodra na makubuna, ia na nodra i yau na tamata ca ena nodra na yalododonu.

23Na vanua e sega ni teivaki e rawa ni rawati mai kina na kakana me kedra na dravudravua, ia era sa tarova na tamata ca me kakua ni teivaki.

24Kevaka o sega ni totogitaka na luvemu, o sa sega sara ni lomani koya. Kevaka o sa lomani koya dina, o na vakadodonutaki koya.

25Sa ka levu sara na kedra kakana na tamata yalododonu, ia era na dau viakana tu ga na tamata ca.