1Qo na lewe ni ivola: “O yau na tui levu o Asuerosi, au volavola vei kemuni na roko tui e dua na drau ruasagavulukavitu mai Idia i Eciopea kei kemuni na nodra dui buli.
2E na noqu sa mai lewa e levu na matanitu, noqu lewa na vuravura taucoko, au sega tiko ga ni dokadokataka na noqu itutu, au dau vakatulewa ga e na dodonu kei na yalololoma; au sa mani lewa mera bula vakacegu tu ga na noqu tamata, me sautu tale na vanua me vaka na noda gagadre kece, meda qai veimaliwai vinaka tu kina, me qai rawa tale ga kina na veitosoyaki e na veiyasana.
3“Au tarogi iratou noqu daunivakasala se na rawa vakacava qo. Ia o Amani, o koya e rogo vei keda e na lewa matau, kena idivi na yalovinaka kei na yalodina tudei, mani yaco kina me noqu iraviti,
4sa qai vakaraitaka mai nira veituyaki e na veimatanitu e vuravura e dua na matatamata dauveivala, e duatani sara nodra lawa, sega ni tautauvata kei na dua tale na matanitu, era dau beca na lewa ni tui, sa mani dreve kina na noda inaki cecere me vakaduavatataki na matanitu.
5Sa macala ni o ira ga na yavusa qo era dau saqata tu ga na veimatatamata kece, e duatani sara na nodra itovo ni bula kei na lawa, ra cata na noda veiliutaki, era vakacaca vakalevu me yavavala tu ga kina na noda matanitu.
6“Au sa mani lewa: o ira kece e vakaraitaka vei kemuni e na nona ivola o Amani, noda Paraiminisita, karua ni tamada, mera na vakamatei kece vakadua kei na nodra veitinani e na iselewau ni kedra meca e na ika14 ni siga ni ika12 ni vula, na Atara, ni yabaki qo. Me kua ni dua e lomani.
7Na kena inaki mera bala i Etesi e na dua ga na siga o ira kece na keda meca makawa, me rawata kina na noda matanitu na tudei kei na galala mai muri.”
Wilika qo na Est 3.14–4.8. E talanoataki kina nona rarawa o Motekai ni kila na lewa ni tui, kei na nona qai tukutuku vei Esiteri me bau yavala. E tabaki e ra na ikuri ni tikina 8 e na ivola vaKirisi.
Who We AreWhat We EelieveWhat We Do
2025 by iamachristian.org,Inc All rights reserved.
