1 Makabe 16 - Vakavakadewa Vou kei na iVola tale eso（FNVDC12）

1A lako cake mai Qasara o Jone me lai tukuna vei Saimoni na tamana na ka sa cakava o Kedeveo.

2O Saimoni sa qai kacivi rau na luvena qase o Jutasa kei Jone, kaya vei rau: “Keitou na veitacini kei na vuvale nei tamaqu keitou sa vala e na ivalu nei Isireli tekivu mai na neitou se gone me yacova nikua, a sautu kina na vanua, keitou sa sereki Isireli vakavica mai na liga ni meca.

3Ia au sa qase mai qo, odrau sa uabula mai o kemudrau e na loloma ni Kalou. Drau sosomitaki keirau na veitacini, drau lai valataka na noda vanua, me salavata kei kemudrau na veivuke mai lomalagi.

4A mani digitaka o Jone e le 20,000 na mataivalu taubale kei na mataivalu vodo ose, ra mani lai kabati Kedeveo, ra keba e na bogi e Moteini.

5E na kena mataka caca era sa cavutu, ra tayabe yani e na buca, era raica nira sa lako tiko mai e dua na mataivalu vakaitamera taubale kei na vodo ose; e wasei ira e dua na wai lailai.

6Nira tuva e matadra, sa raica nira rere mera kosova na uciwai na nona sotia, a mani takoso o koya e liu. Nira sa raica nona tamata, era qai muri koya.

7A qai wasea na mataivalu, na mataivalu vodo ose me tu e na kedra maliwa na mataivalu taubale, nira lewe levu sara na mataivalu vodo ose ni meca.

8Era sa uvu biukila, ra qai dro na mataivalu nei Kedeveo, e levu vei ira era mavoa se mate; na kena vo era dro i na koronivalu.

9A mavoa e na gauna ya o Jutasa na taci i Jone, qai cemuri ira ga o Jone, me yacova ni sa yaco o Kedeveo i Kitironi, na koro a tara.

10Era dro sara tale ga i na valeniyadra e na buca i Asoto, qai vakama o Jone, ra mate kina e rauta ni le 2000. Sa qai lesu bula tale mai i Jutia.

Labati na veitamani

11Sa lesi o Tolemi na luve i Avuvo me kovana e na buca o Jeriko, levu na nona siliva kei na koula,

12ni watina na luve ni betelevu.

13E na nona via rogo, sa lomana kina me lewa na matanitu, a mani veretaki Saimoni kei iratou na luvena meratou mate.

14A sikovi ira voli o Saimoni na veikoro e lomanivanua me rogoca na nodra leqa, a lako sobu i Jeriko vata kei rau na luvena o Matacayasi kei Jutasa e na ika177 ni yabaki e na ikatinikadua ni vula, na vula o Sevata.

15A ciqomi iratou vakalawaki na luve i Avuvo e na koronivalu lailai o Doko a tara o koya, qai vakarautaka e dua na kedratou magiti vakaitamera, vunitaki ira tu e kea nona tamata.

16Niratou sa mateni o Saimoni kei rau na luvena, era qai vura mai o Tolemi kei ira nona tamata, ra vakaiyaragi, ra cicivi Saimoni yani e na vale ni kana, era vakamatei koya kei rau na luvena kei na so na nona italai.

17A mani vakayacora kina e dua na itovo ni veidabui levu, sauma na vinaka e na ca.

18A vola o Tolemi na itukutuku ni veika qo, vakauta vua na tui, salavata kei na kerekere me tala mai na mataivalu me mai vukei koya, me lewa na veikoro kei na vanua.

19A talai ira e so tale i Qasara mera vakamatei Jone; a vola vei ira na kavetani mera lako mai vua me na solia vei ira na siliva, na koula kei na iloloma;

20e so tale mera tauri Jerusalemi kei na delana ni valenisoro.

21Ia a cici i liu e dua me tukutuku vei Jone e Qasara niratou sa mate o tamana kei rau na tacina, “sa talai ira tiko mai e so mera vakamatei iko tale ga.”

22Ni sa rogoca qo sa kidroa, qai vesuki ira na mai labati koya, mokuti ira, ni sa kila rawa na lomadra.

23Na vo ni cakacaka nei Jone, nona ivalu kei na veika rogo a vakayacora, nona tara na bainikoro kei na veika e rawata,

24sa volai tu e na ivola tukutuku ni nona gauna ni betelevu, e na gauna a yaco kina me betelevu taravi tamana.