Baruki 2 - Vakavakadewa Vou kei na iVola tale eso（FNVDC12）

1“Sa mani vakadeitaka na Turaga na vosa a tauca me vakalewai keda kei ira noda dauveilewai era lewai Isireli, noda tui, noda luve ni tui, kei ira na kai Isireli kei Juta.

2Se bera mada ni se caka e ruku i lomalagi na ka sa cakava mai Jerusalemi me vaka e volai e na lawa i Mosese,

3ya meda kania na lewe ni luveda.

4Sa qai soli ira mera bobula e na veimatanitu voleka, mera kana vosa kei na veibeci vei ira na lewe ni veivanua sa veitalayaki ira kina na Turaga.

5Era butuki sobu, ra sega ni vueti, nida valavalaca vua na Turaga na noda Kalou e na noda sega ni rogoca nona vosa.

6“Na yalododonu e nona na Turaga, na madua e nodra na noda qase me yacova nikua.

7Sa tau vei keda na kuita a yalataka na Turaga.

8Ia eda sega ni bau kerea na loloma ni Turaga e na noda dui vakanadakuya na inaki ca ni yaloda.

9Sa vakarautaka tu na Turaga na kuita, sa mai tauca vei keda, ni yalododonu na Turaga e na nona cakacaka kece sa lewa meda cakava.

10Eda sega ga ni rogoca nona vosa meda rokova na lawa sa mai tauca vei keda na Turaga.

Masulaki na Veisereki

11“Kemuni na Turaga na Kalou ni Isireli, oni a tuberi ira nomuni tamata mai na vanua o Ijipita e na ligamuni sau, e na ivakatakilakila kei na cakamana, e na kaukaua levu kei na ligamuni veirurugi, sa rogo tu kina na yacamuni me yacova nikua.

12Ia qo keimami sa valavalaca, keimami sa sega ni yalododonu, keimami sa cala, Turaga neimami Kalou, e na nomuni lewa kece.

13Me kua mada ni tarai keimami na nomuni cudru, ni keimami sa lewe vica wale ga e na veivanua oni veitalayaki keimami kina.

14Moni rogoca saka na neimami masu kei na neimami kerekere; e na vukumuni ga, ni sereki keimami, ni solia mera lomani keimami o ira na kauti keimami vakavesu;

15me kila o vuravura taucoko ni o kemuni na Turaga na neimami Kalou, ni o Isireli kei ira nona kawa era vakayacani vei kemuni.

16Ni rai sobu saka mai na nomuni itikotiko tabu, ni nanumi keimami. Ni vakatudaliga saka moni rogoca;

17ni rai saka moni raica, ni o ira na mate era sa tu mai Etesi sa wasei na yalodra mai yagodra, era na sega ni kacivaka na lagilagi se na lewa dodonu ni Turaga;

18o koya ga sa bikai e na rarawa, vakalairoro, malumalumu, mataca, kei koya e viakana, e na kacivaka saka na nomuni lagilagi kei na yalododonu.

19E sega ni baleta nodra caka dodonu na neimami qase se neimami tui keimami vakacabera tiko kina e matamuni neimami masu moni lomani keimami na Turaga na neimami Kalou.

20Oni sa cudruvi keimami me vaka era sa gusumuni kina na nomuni italai na parofita e na nodra kaya:

21Jere 7.34; 27.10-12‘Qo na vosa ni Turaga: Moni cuva, moni qarava na Tui Papiloni, oni na qai tiko ga kina e na vanua au a solia vei ira na nomuni qase.

22Ia kevaka oni bese ni rogoca na domo ni Turaga oni bese ni qarava na Tui Papiloni,

23au na tinia e na veikoro mai Juta kei na yasayasa vakaJerusalemi na domo ni dredre kei na marau, na domo ni tagane vou kei na yalewa vou; e na qai lala vakadua na vanua, sega na lewena.’

24 Jere 8.1,2 “Ia keimami a sega ni rogoca na nomuni lewa me keimami qarava na Tui Papiloni, oni sa mani vakayacora na nomuni vosa era a gusumuni kina na nomuni italai na parofita, ni na cekati mai na ibulubulu na suidra na neimami tui kei na neimami qase;

25raica, era sa talaraki me kedra na todra ni siga kei na tegu ni bogi. Era mate e na rarawa vakaitamera e na dausiga, na iselewau kei na matetaka.

26Na yavusa e vakayacani vei kemuni, oni sa lewa me vaka tu qo e na levu ni ca ni yavusa i Isireli kei na yavusa i Juta.

27“Ia oni sa vakaraitaka ga vei keimami na Turaga na neimami Kalou na nomuni yalosavu kei na nomuni loloma levu,

28Vrua 28.58,62me vaka a gusumuni kina nomuni italai o Mosese e na siga oni vakaroti koya kina me vola nomuni ivakaro e matadra na kai Isireli, oni a kaya,

29‘Kevaka oni sega ni rogoca na domoqu, na yavusa vakaitamera qo e na lutu me lewe lailai sara e na veivanua au na veitalayaki ira kina.

30Au kila nira na sega ni rogoci yau, nira tamata lomaqa. Era na qai vakilai yalodra ga e na vanua era na kau vakavesu kina,

31era na qai kila kina ni o yau na Turaga na nodra Kalou. Au na solia vei ira na yalo e vakarorogo kei na daliga e rogo;

32era na qai dau vakacaucautaki yau e na nodra vanua ni bobula, era na nanuma na yacaqu,

33era na vakanadakuya na lomaqa kei na ivakarau ca, nira na nanuma na ivakarau ni nodra qase mera dau valavalaca e mata ni Turaga.

34Au na tuberi ira tale i na vanua au a yalataka meu solia vei ira na nodra qase, vei Eparahama kei Aisake kei Jekope, era na qai veiliutaki kina; au na vakatubura na kedra iwiliwili, era na sega ni lailai mai.

35Jere 32.38-40Au na veiyalayalati tawamudu kei ira meu nodra Kalou mera noqu tamata, au na sega tale vakadua ni kauti ira tani noqu tamata na Isireli mai na vanua au sa solia vei ira.’