Siraki 44 - Vakavakadewa Vou kei na iVola tale eso（FNVDC12）

Na lagilagi ni Kalou e na veitabagauna sa oti

1Meda vakacaucautaki ira na tamata rogo kei ira na noda qase e na nodra tabagauna.

2E solia vei ira na Turaga na lagilagi levu, e laurai nona itutu vakatui mai na ivakatekivu.

3Era tu o ira era veiliutaki e na nodra vanua, ra rogo e na nodra sau,

ra soli ivakasala e na dela ni nodra kilaka, ra parofisai;

4era tu o ira era veiliutaki e na nodra veivakasalataki, ra daunivuli vei ira na lewenivanua, ra yalomatua e na nodra vosa ni veivakavulici;

5era tu o ira era buli ivakatagi, ra daunivucu;

6era tu o ira era tamata vutuniyau, ra bula sautu tu e na nodra itikotiko —

7o ira kece qo era rokovi e na nodra delanigauna, e rogo kina na nodra lagilagi.

8E so vei ira era vakairogorogo tu mai, era se dau vakacaucautaki tu ga.

9E so e sega na kedra irogorogo; era sa mate, sega tale ni nanumi;

e vaka era sega ni bula, sega ni sucu; era vaka tale ga kina o luvedra.

10Ia o ira era talanoataki e ra, era tamata yalololoma, e sega ni guilecavi na nodra ivakarau vinaka;

11na kedra irogorogo e na dewa vei ira na nodra kawa me nodra iyau na makubudra.

12Na nodra kawa era rokova na veiyalayalati e na vuku ni ka era cakava na nodra itubutubu.

13E na tudei na nodra kawa, e na sega ni taqusi na kedra lagilagi.

14E bulu e na vakacegu na yagodra, e na tu na kedra irogorogo e na veitabagauna.

15Era na tukuna na veimatatamata na nodra yalomatua, era na tusanaka na ivavakoso na nodra lagilagi.

Inoke

16 Vteki 5.24; Ipe 11.5; Dvei 14 A taleitaka na Turaga na ivakarau nei Inoke, mani kau cake, na idusidusi ni veivutuni vei ira na veitabatamata.

Noa

17 Vteki 6.9–9.17 A tamata yalododonu ivakarau vinaka o Noa, mani vakabulai e na gauna ni cudru

meratou vo ga e lewe vica e vuravura ni oti na waluvu.

18A virikotori na veiyalayalati tawamudu vata kei koya me kua ni vakarusai tale na tamata e na waluvu.

Eparahama

19 Vteki 15.1–17.27; 22.1-18 O Eparahama na tamadra rogo e levu na matanitu, e sega ni dua e tautauvata kaya e na lagilagi;

20a rokova na ivakaro nei koya na Cecere Sara, mani veiyalayalati vata kei koya,

a vakadeitaka na veiyalayalati e yagona; ni sa vakatovolei, a kunei ni yalodina.

21A mani bubuluitaka na Turaga vua nira na kalougata na veimatanitu e na vuku ni nona kawa,

ni na vakalevutaka nona kawa me vaka na nuku ni matasawa kei na kalokalo ni lomalagi,

mera na tawana na vanua taucoko mai matasawa i matasawa, mai na Uciwai levu i na yalayala kei vuravura.

Aisake kei Jekope

22 Vteki 17.19; 26.3-5; 27.28; 28.14 A vakadeitaka tale na yalayala qori vei Aisake e na vuku i Eparahama na tamana,

23vakina vei Jekope, a tukuna ni na kalougata o vuravura e na vukuna;

a vakalougatataki koya, solia vua nona ivotavota,

wasea vei iratou na yavusa e tinikarua.