1 Roma 10.20 A sa kaya o Jiova,
“Au sa vakarau tu me'u sauma na nodra masu na tamata,
Ia era sa sega ni bau masu.
Au sa vakarau tu me'u laurai, ia era sa sega ni tovolea.
‘Au a kaya, oi au oqo, oi au oqo,’
Ki na dua na matanitu sa sega ni masu vei au.
2 Roma 10.21 Au dodoka tu yani na ligaqu ena veisiga kece
Ki na dua na matatamata dauveisaqasaqa;
Era sa dui muria ga na sala ca
Ka vakayacora ga na dui nodra i naki.
3Era sa sega ni madua ni vakacudrui au.
Era sa ia na vakacaboisoro ena veiwere
Ka vakama na ka boi vinaka
Ena veicabocabo ni soro ni veikalou tani.
4Ena bogi era sa dau lako ki na veiqara vatu kei na veibulubulu
Me ra taroga na nodra i vakasala na yalo ni tamata mate.
Era sa dau kana vuaka na tamata oqo.
5Era sa qai dau kaya vei ira na tani
Me ra kakua ni voleka mai vei ira
Ni ra sa rui savasava.
Au sa sega ni vosota rawa na tamata vaka o ya.
Na noqu cudruvi ira e vaka na buka
Sa sega ni lako ki tuba.
6“Au sa lewa oti me ra totogitaki
Ka sa volai oti tu na kedra i totogi.
Au na sega ni vakawaletaka na nodra i valavala ca,
Ia au na sauma vei ira,
7Kei na nodra i valavala ca na nodra qase.
Era sa vakacaboisoro ki na veicabocabo ni soro tani,
Ka ra vosa vakacacataki au.
A ka oqo ka'u na totogitaki ira kina
Me rauta vinaka na i sau ni nodra i vakarau.”
8A sa kaya o Jiova.
“E sega ni dua e dau vakarusa na vaini vinaka
Ia e dau caka ga kina na waini.
Au na sega ni vakarusai ira vakakina na noqu tamata;
Ka'u na vakabulai ira era qaravi au.
9Au na vakatubura eso na kawa i Jekope
Kei na so na kawa i Juta me ra taukena na
Na noqu vanua veiulunivanua.
10 Josua 7.24-26 Era na qaravi au
Ka liutaka na nodra sipi kei na bulumakau
Ena veico ena buca o Saroni mai na ra,
Kei na Qakilo ni Leqa ena tokalau.
11Ia ena sega ni vakakina vei kemuni o ni sa vakanadakui au
Oi kemuni o ni guilecavi Saioni na noqu ulunivanua tabu
Ka qarava na Kalou ni kalougata kei na veivakaleqai.
12Na nomuni voravora mo ni mate ena i seleiwau
Baleta ni o ni sega ni rogo mai
Ni'u kacivi kemuni, se vakarorogo ni'u vosa yani.
Ia o ni sa cakava ga na ka vakasisila e mataqu
Ka digitaka na ka au sega ni taleitaka.
13Oi koya oqo au sa kaya kina vei ira
Era qaravi au ka talairawarawa vei au
Ni na levu na kedra kei na medra.
Ia oi kemuni o ni na viakana ka viagunu.
Era na marau ka o ni na vakamaduataki.
14Era na sere ena marau
Ia o ni na tagi ena yalo rarawa.
15Na yacamuni ena yaca ni veivakamaduataki
Vei ira na noqu tamata digitaki.
Oi au o Jiova au na vakamatei kemuni.
Ia au na solia e dua na yaca vou,
Vei ira era talairawarawa vei au.
16O koya yadua sa kerea
Me vakalougatataki ena vanua oqo,
Ena kerea me vakalougatataki koya
Na Kalou sa dau yalodina.
O koya yadua sa ia na bubului,
Ena bubului ga ena yaca ni Kalou Yalodina.
Na leqa ni veigauna sa oti ena takali yani
Ka guilecavi sara yani.”
Na Vuravura Vou kei na Lomalagi Vou17 Aisea 66.22; 2Pita 3.13; Vtaki 21.1 A sa kaya o Jiova,
“Raica au sa bulia e dua na vuravura vou
Kei na dua na lomalagi vou.
Na veika e a yaco ena gauna sa oti,
Sa na guilecavi sara yani vakadua.
18Ia ni reki ka marau ka tawa mudu,
Ena vuku ni ka au sa bulia.
Na Jerusalemi vou au na cakava ena sinai ena marau
Ka ra na marau talega na lewena.
19 Vtaki 21.4 Oi au sara mada ga au na sinai ena marau
Baleti Jerusalemi kei ira na lewena.
Ena sega kina na tagi se na kere veivuke.
20Era na sega ni mate kina na gone ena nodra gauna ni gone
Ka na balavu sara na nodra bula yadua era bula kina.
O ira mada ga era mate ni ra yabaki dua na drau
Era na okata ga ni ra sa mate gone.
O koya e mate ni sa bera ni drau na nona yabaki,
Ena totogi ga ena vuku ni nona i valavala ca.
21Era na tara na vale ka tawana talega
Ka ra na tea na loganivaini ka gunuva talega na vuana.
22Era na sega ni tara vale me dua tale e la'ki tawana
Ka ra na sega ni teitei ka qai dua tale e la'ki vakayagataka.
O ira na noqu tamata era na vaka na kau
Ena nodra bula balavu,
Ka ra na vakayagataka ena marau na cakacaka ni ligadra.
23Na veika era cakava ena rawa vinaka
Ka ra na sega ni sota kaya na luvedra na veika ni leqa.
Au na vakalougatataka na nodra kawa ena gauna kecega.
24Ni ra bera ni masu vei au, au sa na sauma.
25 Aisea 11.6-9 Na olifa kei na lami era na kana vata.
Na laione ena kana co madu me vaka na bulumakau
Ia na gata ena kana kuvu ni soso.
Mai Saioni na noqu ulunivanua tabu,
Ena sega kina na ka me veivakacacani
Se me veivakarusai.”
Sa i Jiova ga sa kaya na veika oqo.
Who We AreWhat We EelieveWhat We Do
2025 by iamachristian.org,Inc All rights reserved.
