Yalomatua 18 - Vakavakadewa Vou kei na iVola tale eso（FNVDC12）

Na rarama e cilavi ira na Isireli

1 Lako 13.17-22 Ia o ira na nomuni yalododonu sa cilavi ira tu na rarama levu. Era rogoca na meca na domodra era sega ga ni raici ira. Era kaya na meca nira kalougata nomuni tamata nira sega ni vakararawataki,

2era vakavinavinaka tale ga na meca nira sega ni sauma nomuni yalododonu na itovo ca a caka vei ira, era kere veivosoti gona e na nodra duiyaloyalo.

3Oni sa solia vei ira nomuni tamata na duru bukawaqa me idusidusi e na nodra ilakolako tawamacala, kei na siga malumu me cilava na nodra sala lagilagi.

4A dodonu na kena bureitaki vei ira na meca na rarama mera bobula ni butobuto, nira a vesuki ira na luvemuni era a vakarau vakadewa i vuravura taucoko na rarama tawamudu ni lawa.

Nodra vakamatei na ulumatua ni Ijipita

5Nira sa nakita na meca mera vakamatei ira na luvedra nomuni matatamata tabu, a biu e dua qai vakabulai, oni sa qai kuitataki ira e na nomuni vakamatei ira e levu na luvedra, kei na nomuni vakawabokotaki ira vakadua e na ua lelevu.

6Sa vakatakilai rawa vei ira na tubu i keimami na iloku ni bogi ya mera na reki kina e na nodra kila deivaki na yalayala era nuitaka tu.

7Era sa namaka nomuni tamata na nodra sereki na yalododonu kei na nodra vakadrukai na meca.

8E na cakacaka vata ga oni kuitataki ira kina na meca, oni a kacivi keimami yani kina me keimami vakalagilagi.

9Era vakacabo isoro vuni na luvedra yalododonu na tamata vinaka, era duavata mera rokova na lawa ni Kalou, me nodra vata kina na veika kece na kalougata kei na leqa. Era sa lagata nodra sere ni veivakacaucautaki na qase.

10Ia sa voqa mai nodra tagiyaso na meca, sa rogo yawa nodra tagilagalagataki ira na luvedra.

11E dua vata na kedrau kuita na bobula kei na turaga, erau leqa vata ga na tauvanua kei na tui.

12E dua vata kece na itovo ni nodra mate, na yagonimate e sega ni wili rawa. Era lewe lailai na vo ni bula mera veibulu, ni dua vata ga na gauna era mate kina na ulumatua.

13Era sega ni vakabauta, nira nuitaka ga nodra caka iba, ia nira sa qai vakamatei na nodra ulumatua, era sa ciqoma nira luve ni Kalou na nomuni tamata.

14Ni sa sobuta na vanua na vakanomodi, sa veimama toka na bogi,

15sa qai lade mai nomuni idabedabe vakatui mai lomalagi na nomuni vosa mana me tau e na loma ni vanua sa lewai me mate, e na kena waqawaqa na qaqa rerevaki,

16nona iselewau gata na nomuni lewa dina, me vakamatea na ka kece; a tarai lomalagi ni butu tu e vuravura.

17Sa basika sara vei ira na tadra vakadomobula e so, sa tuburi ira sara na rere.

18Era sa tavulaki vaka vaka, ra vakaraitaka na vu ni nodra mate,

19ni sa vakatakila rawa vei ira na ka qo na tadra vakadomobula e a yavalati ira tiko, mera kila rawa kina na vu ni nodra rarawa qai mate.

E vakabulai ira na kai Isireli na masu i Eroni

20 Tiko 16.41-50 Era bau vakila tale ga na mate na tamata yalododonu, ni levu vei ira ra tauvi matetaka levu e vanua lala, ia a sega ni dede na cudru,

21ni a tu mai e dua na tamata yalododonu me nodra qaqa. Nona isasabai tiko na veiqaravi vakabete, na masu kei na veisosoi e na mira. A vorata na cudru, qai muduka na leqa, qai macala kina ni nomuni dauveiqaravi.

22A vakadruka na cudru, sega e na nona kaukaua se na iyaragi ni ivalu, e na masu ga kei na nona vakadreta tale na bubului kei na veiyalayalati vei ira na tubu i keimami.

23Nira sa veidavori na mate, sa qai tataro, me vakaseyavutaka na cudru me kua ni tau vei ira na vo ni bula.

24A kesavi tu e nona isulu rabe na vuravura taucoko, ceuti na nodra lagilagi na qase e na va na iyatu vatu talei, kei na kemuni lagilagi e na nona isala vakatui.

25Qo na vu ni nona vakasuka o dauvakacaca, ni rerevaka; ni sa tovolea vakalailai ga na cudru, sa rauti koya.