Aisea 3 - Vakavakadewa Vou kei na iVola tale eso（FNVDC12）

Sa Cudruvi o Jerusalemi kei Juta

1Ni raica, sa na vakarau kauta tani na Turaga o Jiova

E Jerusalemi vata kei Juta,

Na veika kece era vakararavi kina na tamata;

Na medra wai kei na kedra kakana.

2O ira na nodra qaqa kei ira na nodra sotia;

O ira na turaganilewa kei ira na parofita,

O ira na qase kei ira na dautukuna na veika vinaka,

3O ira na turaganivalu kei ira na turaga,

O ira na dauveiliutaki, dauvakadraunikau kei na daucakamana.

4Au na laivi ira na gone tagane me ra nodra turaga

Kei ira na gone lalai me ra liutaki ira.

5Era na veivakasaurarataki vakai ira na tamata yadua,

Ka vakakina na tamata yadua kei na kai nona.

O ira na i taba gone era na sega ni dokai ira na qase,

Kei ira na tamata wale era na beci ira na nodra turaga.

6Sa na yaco dina mai na gauna,

Era sa na digia kina na lewe ni dua na mataqali,

E dua ga vei ira ka ra kaya vua,

“E sa bau toka e dua na i sulu mo daramaka,

Mo sa noda i liuliu mada ena gauna dredre oqo.”

7Ena qai kaya na tamata o ya ena siga o ya,

“Au na sega ni nomuni liuliu,

Sa sega na madrai kei na i sulu ena noqu vale,

Ka mo ni kakua ni lesi au me'u liutaki kemuni.”

8Sa bale o Jerusalemi, ka rusa o Juta,

Na veika kece era kaya ka cakava,

Sa veisaqasaqa kei Jiova.

9Na i rairai ni matadra sa beitaki ira.

Era sa vakaraitaka e matana levu na nodra ca me vakataki Sotoma.

Era na rusa, ni ra sa kauta mai vei ira na veivakarusai.

10Tukuna vei ira na yalo dodonu,

Ni na daumaka na veika kecega vei ira,

Ni ra na kania na vua ni nodra cakacaka.

11Ia na tamata ca ena rusa,

Ni na saumi lesu vua na veika e a cakava.

12O ira na gone lalai era sa vakararawataki ira noqu tamata

Ka sa liutaki ira na yalewa. Kemuni noqu tamata,

Era sa vakasesei kemuni na nomuni i liuliu,

Mo ni kakua ni kila kina na sala mo ni lesu tale mai kina.

13Sa vakarau tukuna na ka e veibeitaki kina o Jiova;

Ka sa vakarau lewai ira na veimatanitu.

14Sa kauti ira mai na qase,

Kei ira na nodra i liuliu na nona tamata o Jiova me ra lewai mada.

A sa beitaki ira ka kaya,

“O ni sa butakoca na veiloganivaini

Ka sa sinai na nomuni veivale

Ena veika o ni taura mai vei ira na dravudravua.

15Sa sega ni tu vei kemuni na dodonu,

Mo ni tabaki ira sobu na noqu tamata,

Ka rawa ka mai vei ira na dravudravua. Oi au, o Jiova ni lewevuqa sa kaya vakaoqo.”

Ai Vakasala vei Ira na Yalewa ni Jerusalemi

16A sa kaya o Jiova,

“Raica mada na nodra dokadoka na gone yalewa ni Jerusalemi

Era sa dau rai tu ga ki cake ni ra lako,

Ka sa kunei sara tu ga e matadra na gagadre ca.

Era dau kalawa vakaleleka ni ra lako,

Ka me qai rorogo tu na i ukuuku ni yavadra.

17Ia ena qai vakavuna o Jiova,

Me cou na uludra na gone yalewa ni Saioni

Ka biuti ira tu me ra luvawale.

18Ena yaco mai na gauna ena kauta tani kina na Turaga

Na veika era dau dokadokataka na yalewa ni Jerusalemi.

Na veiukuuku ni yavadra, uludra kei na domodra;

19Kei na i ukuuku ni ligadra. Ena kauta tani na nodra i pulou,

20Na nodra i sala, na i ubi ni tabadra kei na i vau ni tolodra;

21Na mama ni nodra i qaqalo kei na ucudra,

22Na nodra kote balavu, na i ubi balavu, na kote kei na nodra kato ni lavo,

23Na nodra i sulu lineni, i sala kei na i ubi balavu.

24Ena vakaisosomitaki na ka boi vinaka ena ka bona

Ena i sosomi ni beleti na dali,

Ena i sosomi ni drau ni ulu bula vinaka na ulu cou,

Ena i sosomi talega ni sulu balavu voli dredre na taga,

Ka i sosomi ni rairai vinaka na madua.

25Era na bale na nomuni tagane ena i seleiwau,

Ka ra na bale na nomuni tamata qaqa ena i valu.

26Ena tagi ka vakaloloku na matamata ni koro

Ka na vaka e dua na yalewa sa dabe tiko ena qele, ka sa luvawale.