Dauveilewai 14 - Vakavakadewa Vou kei na iVola tale eso（FNVDC12）

Na Vakawati nei Samisoni

1Ena dua na siga a gole sobu o Samisoni ki Timinaca, a mani sotava e dua na goneyalewa ni Filisitia.

2A lesu tale ki nodratou ka tukuna vei rau na tamana kei tinana, “Au sa kerea e dua na goneyalewa ni Filisitia mai Timinaca, au sa taleitaki koya.

3Mo drau la'ki vosaki koya. Au sa vinakata me watiqu.” E rau a qai tarogi koya o tamana kei tinana ka kaya, “A cava o lako kina vei ira na kai Filisitia tawa vakabauta oqo mo qara kina na watimu? E sega beka ni rawa mo qara ga e dua na yalewa ena nomu mataqali, se vei ira na kai nomu?”

A sauma o Samisoni vei tamana ka kaya, “Sa rauti koya ga ni'u sa vinakati koya, kauti koya ga mai vei au.”

4E rau a sega tiko ni kila na nona i tubutubu ni sai Jiova ga sa liutaki Samisoni tiko ki na veika oqo, ka ni vakasaqara tiko o Jiova e dua na gaunisala me valuti ira kina na kai Filisitia. Ena gauna oqo era qali tu na Isireli ki na veiliutaki i Filisitia.

5E ratou a mani gole sobu ki Timinaca o Samisoni kei rau na tamana kei tinana, ni ratou lako tiko, donuya na veiloganivaini, a rogoca sara o Samisoni na domo ni tagi ni luve ni laioni.

6A curumi Samisoni vakasauri na kaukauwa i Jiova, ka basuraka kina na laioni ena ligana ga, me vaka ga e basuraki na luve ni me. Ia a sega ga ni tukuna vei rau na nona i tubutubu na ka a cakava.

7A lako o koya ka la'ki vosa vua na yalewa ka vinakata.

8Ni vo ga e vica na siga, a lesu tale o Samisoni me la'ki vakamautaki koya. Ena nona i lakolako yani o ya, a gole talega yani me la'ki raica na yago ni laioni ka a vakamatea, ka kunea ni a sinai tu ena oni kei na de ni oni.

9A qai karia tani na de ni oni o Samisoni ka lukuta ena ligana ka mai kania yarayara yani. Ni sa mai sotavi rau o tamana kei tinana a solia talega vei rau eso me rau kania. A sega ga ni tukuna vei rau ni a kau mai na de ni oni o ya ena yago ni laioni mate.

10A lako sobu o tamana vua na yalewa, a vakarautaka o Samisoni e dua na magiti levu me vaka na kena i valavala era dau vakarautaka na tagane sa qai vakarau vakawati.

11Ia ni ra raici koya na tamata, era a kauta mai e lewe tolusagavulu na tamata me tiko kaya.

12A sa kaya vei ira o Samisoni, “Me'u taroga mada vei kemudou e dua na i ba, kevaka o dou na sauma rawa vei au ena loma ni vitu na siga ni kana magiti, au na solia vei kemudou e tolusagavulu na i lobi sulu lineni, ka tolusagavulu na i sulu ni soqo.

13Ia kevaka e sega ni dou tukuna rawa na kena i sau, dou na solia vei au e tolusagavulu na i lobi sulu lineni, kei na tolusagavulu na i sulu ni soqo.” Era a qai kaya vua,

“Tukuna mai vei keitou na nomu i ba me keitou rogoca.”

14A sa kaya vei ira o koya,

“Mai na dauviakana sa vure mai kina na ka me laukana.

Ia mai na kaukauwa, sa vure mai kina na kamikamica.” Ia ena loma ni tolu na siga era a sega ni vakamacalataka rawa na i ba oqo.

15Ena i kava ni siga, era sa qai kaya vua na wati Samisoni, “Lawakitaki watimu mada me rawa ni tukuna mai na i balebale ni ba, kevaka e sega keimami na vakama na vale i tamamu kei iko talega. Baleta o iko kei tamamu drau a sureti keimami mai mo dou mai butakoci keimami. E sega beka li ni o koya o ya na nomudou i tuvatuva?”

16A lako yani vei Samisoni na watina ena tagi ka kaya vua, “O sa sega ni lomani au; O sa cati au ga. O sa tukuna vei ira na wekaqu e dua na i ba, ia o sega ni se tukuna vei au na kena i balebale.”

A sa kaya o Samisoni, “Raica, au sa sega mada ga ni bau tukuna vei tamaqu kei tinaqu. A cava me'u qai tukuna kina vei iko?”

17A tagi tiko vei Samisoni na watina ena gauna taucoko ni soqo ni kana magiti me siga vitu. Ia ena i ka vitu ni siga, a tukuna vei watina o Samisoni na i balebale ni ba, ka ni a cikeva wasoma tikoga. A sa qai tukuna o yalewa vei ira na kai Filisitia.

18Era sa qai kaya vei Samisoni o ira na lewe ni koro o ya ena i kavitu ni siga ni bera ni curu o koya ki na nona rumu ni moce,

“A cava tale me qai kamikamica cake mai na oni?

A cava tale me qai kaukauwa cake mai na laioni?”

A sauma o Samisoni,

“Kevaka dou a sega ni siviyarataka tiko noqu bulumakau yalewa,

Ke dou se sega ga ni kila na kena i wali me yacova mai oqo.”

19A vakasauri ni sa curumi koya na kaukauwa i Jiova ka vakaukauwataki koya. A sa lako sobu yani ki Asikiloni ka vakamatea e 30 na tamata mai kea, ka luvata na nodra i sulu, ka solia na nodra i sulu digitaki vei ira era sa walia rawa na i balebale ni i ba. Ni oti o ya, a sa lesu yani ki na nona vale e cudru waqawaqa ena vuku ni ka sa yaco oqo.

20Ia na watina sa soli yani vua na tagane ka rau a sulu vata ena gauna ni nona vakamau.