Udite 5 - Vakavakadewa Vou kei na iVola tale eso（FNVDC12）

Na tuva ivalu e na keba nei Oloferenesi

1Ni sa rogoca o Oloferenesi, na vunivalu ni Asiria, nira sa vakavakarau na kai Isireli, sa sogo na icabecabe i colo, sa viribai kece na veiulunikoro, sa sogo na sala e na veibuca,

2sa duatani na nona cudru. Sa qai kacivi ira kece na iliuliu kei Moapi, o ira na vunivalu kei Amoni, kei ira kece na kovana ni veivanua e baravi,

3kaya vei ira, “Dou tukuna mada mai na kai Kenani se mataqali tamata vakacava era vakoro mai colo. O cei so nodra koro? E vakacava na levu ni nodra mataivalu? E vu mai vei nodra lewa kei na qaqa? O cei nodra tui e liutaka na mataivalu?

4O ira kece na vakoro mai ra era mai raici yau, o ira ga qo era bese, baleta?”

Na vosa nei Akiori

5Sa qai kaya vua o Akiori, na nodra iliuliu kece na kai Amoni, “Moni rogoca saka mada na vosa ni nomuni italai, au na qai tukuna na ka dina baleti ira na tamata era vakoro e na colo voleka e ke. E na sega ni lasu na nomuni italai.

6O ira qo era kawa ni kai Kalidia.

7E liu, era vakoro mai Mesopotemia, nira bese ni qarava na kalou ni nodra qase mai Kalidia.

8Era sa biuta na itovo nei tubudra mera sa qarava na Kalou ni lomalagi, na Kalou era sa mai kila. Era sa mani cemuri mai na mata ni nodra kalou na nodra qase. Era sa qai dro i Mesopotemia, ra lai dede kina.

9 Vteki 11.31–12.5 “Sa qai lewa na nodra Kalou mera biuta na vanua era tiko kina mera lako i Kenani. Era lai vakoro kina, era sa qai vutuniyau, levu na koula kei na siliva, levu sara na manumanu.

10Vteki 42.1-5; Lako 1.7Sa qai dausiga o Kenani, era sa mani toki i Ijipita, era tu kina ni se levu kina na kedra; sara qai le levu mai, sega ni wili rawa na kedra levu.

11Lako 1.8-14Sa mani kedra meca tale na Tui Ijipita, e vakalaboci ira, vakaocai ira e na buli biriki, vakaisini ira, qai vakabobulataki ira.

12Lako 7.1–12.46Era sa qai tagi vua na nodra Kalou, sa qai kuitataka na vanua taucoko o Ijipita o koya e na kuita e sega ni vorati rawa; era sa mani cemuri ira na kai Ijipita.

13Lako 14.21,22Sa qai lewa na Kalou me maca e matadra na Wasa Damu,

14sa qai liutaki ira i Sainai kei Katesi-banea, cemuri ira kece na vakaitikotiko e na vanua lala.

15“Era sa mani tikora na nodra qele na kai Amori; nodra ligaqaqa era ravuti ira kece kina na kai Esiponi; era sa qai kosova na Joretani ra tawana kece na veidelana.

16Era cemuri ira na kai Kenani, na kai Perisa, na kai Jevusa, na kai Sekemi, kei ira kece na kai Qerekesa, era qai dede kina.

17 Vrua 28.1-68 “E na gauna era sega kina ni valavalaca vua na nodra Kalou, era sautu kina, ni tomani ira tiko na Kalou e sevaka na ivalavalaca.

18Ia e na gauna era biuta kina na sala a dusimaka vei ira, era druka vakaca veitarataravi, ra mani kau vakabobula i vanua tani; e vakamai na valenisoro ni nodra Kalou, era vakavuai na nodra koro.

19Ia qo era sa lesuva tale na nodra Kalou, era sa biuta tale na vanua era dui tu kina, ra sa mai tiko tale e Jerusalemi, na koro e tiko kina nodra vale tabu, era sa tiko e na veidelana baleta ni a lala tu.

20“O koya gona, noqu iliuliu noqu turaga, ke mani dua nodra cala ra vakanadakuya kina na nodra Kalou, meda qai kila nodra cala, eda na qai cabe yani meda lai samuti ira.

21Ke sega na cala e na nodra matanitu, moni lakobaleti ira saka ga, ni na taqomaki ira na nodra Turaga nodra Kalou, eda na qai madua e mata i vuravura taucoko.”

Na lomadra na lewevuqa

22Ni sa vosa oti vaqo o Akiori, era sa vosavosa kina o ira kece na duri wavokita tu na valelaca. O ira na turaganivalu nei Oloferenesi kei ira kece na kai baravi kei na kai Moapi, era cikeva me moku.

23Era kaya, “Eda na sega ni rerevaki ira na kai Isireli, era tamata malumalumu, era guce e na ivalu.

24Meda cabe saka gona yani, Oloferenesi na turaga, e na covuti ira na nomuni mataivalu vakaitamera.”