2 Samuela 16 - Vakavakadewa Vou kei na iVola tale eso（FNVDC12）

Tevita kei Sipa

1Ia ni sivia vakalailai na ulunivanua o Tevita, e rau a sota e kea kei Sipa na tamata i Mefiposeci ni a mai tavaki koya; a sa kauta voli yani o Sipa eso na asa vakaidabedabe era dreketa tiko e 200 na i buli madrai, e dua na drau na i soso vua ni vaini, e dua na drau na vuanikau e dau vakayagataki ena vula i katakata, kei na dua na taga kuli-ni-manumanu na waini.

A sa kaya o Sipa vua na tui, “E sa tiko ga mai Jerusalemi o koya, baleta ni sa vakadeitaka e lomana ni ra na vakasuka lesu ki vua o ira na Isireli na matanitu nei tukana o Saula.”

4A sa kaya vei Sipa na tui, “Raica, sa nomu na veika kecega sa nei Mefiposeci.” A sa kaya o Sipa, “Au sa nomuni tamata, me'u kune loloma tikoga e matamuni na noqu turaga na tui.”

O Tevita kei Semeai

5Ia ni yaco ki Peurimi o Tevita na tui, a lako mai vua e dua na tamata mai vei ira na mataqali i Saula, a yacana o Semeai na luve i Kira, ka sa vosa cudrucudru vua na tui ni lako voli.

6A vakaviriki Tevita kei ira kecega na nona tamata ena vatu o Semeai, ka dina ga ni ra a vakavolivoliti koya tu na nona tamata kei ira era dau yadravi koya voli.

7A vosa vakacacataki Tevita tiko o Semeai, ka kaya, “Mo lako tani! Mo lako tani! O iko na tamata daulaba! A tamata ca o iko!

8O sa kovea na matanitu i Saula, ia oqo sa cudruvi iko o Jiova ena vuku ni nodra dra kecega na mataqali i Saula. Sa solia o Jiova na matanitu ki na liga i Apisalome na luvemu, ka sa yacovi iko na leqa; ni o sa tamata daulaba!”

9A vosa vua na tui o Apisai na luve i Seruwaia, ka kaya, “A cava e mai vosavakacacataka kina na noqu turaga na tui o koya na koli mate oqo? Mo ni vakatara mada me'u lako i kea me'u musuka laivi mada na uluna.”

10Ia sa qai kaya na tui, “E sega ni dua na ka e nomudrau kina, oi kemudrau na luve i Seruwaia. Kevaka sa rukaki au voli baleta ni sa lewa o Jiova me vakakina, sa sega kina ni yaga me da vakataroga, ‘A cava li sa cakava kina o koya na ka oqo?’ ”

11A qai vosa vei Apisai kei ira kecega na nona tamata o Tevita ka kaya, “Raica, sa qarai au tiko na luvequ dina me vakamatei au; a cava dou sa kurabui kina ena vuku i koya na Penijamini oqo? Ni laivi koya ga me ruru tiko; ni sa tukuna vua o Jiova me vakakina.

12Ena qai raica beka o Jiova na noqu rarawa, ka na qai caka vinaka vei au ena vuku ni nona vosavakacacataki au na tamata oqo edaidai.”

13Ena vuku ni ka oqo, a sa tomana tikoga na nodratou i lakolako ena sala o Tevita kei ira na nona tamata. A muri ratou voli o Semeai, ka lako ena veidelana, ka tomana na nona ruru kei na veiviri ena vatu kei na soso.

14Ia ni yaco yani ki na Joritani na tui kei ira kece na nona tamata era a lako vata tiko, a sa bikai ira na oca; era sa vakacegu mai kea.

15A sa lako mai ki Jerusalemi o Apisalome kei ira kece na Isireli, ka lako vata mai kei ira o Eitofeli.

16Ni sa lako mai vei Apisalome na i tokani voleka i Tevita o Usai na Ariki, a sa kaya vei Apisalome, “Me bula balavu na tui! Me bula balavu na tui!”

17A sa kaya vei Usaia o Apisalome, “Oqo li na i vakaraitaki ni nomu yalodina vua na nomu i tokani voleka? A cava o sega ni lako vata kina kei koya?”

18A sa kaya vei Apisalome o Usaia, “E segai; au na totaka ka tiko talega kei koya sa digitaka o Jiova kei ira kecega na Isireli.

19Ia o cei me'u qarava? Sa sega li ni o koya na luvena? Me vaka au a qaravi tamana, ena vaka talega kina vei kemuni.”

20A sa kaya vei Eitofeli o Apisalome, “Mo solia mada mai na nomu i vakasala; a cava me da cakava?”

21A sa kaya vei Apisalome o Eitofeli, “Mo lako ka la'ki moceri ira na watina lalai na tamamuni, oqo o ira era biu tu mai me ra vakatawana voli na valenitui. Na ka oqo era na kila kina na Isireli taucoko ni sa raici iko o tamamu ni o kena meca, ka na qai vakauqeti ira vakalevu era sa tiko kei kemuni.

22A sa biriki vei Apisalome e dua na valelaca ena dela ni vale vakatui; ka sa curu ki loma o Apisalome ka moceri ira na watina lalai na tamana e matadra kecega na Isireli.

23Ia ena gauna o ya, sa dau rokovi ka ciqomi na i vakasala i Eitofeli me vaka na kena ciqomi na vosa ni Kalou; ka rau dau talairawarawa kina o Tevita kei Apisalome.