Same 114 - Vakavakadewa Vou kei na iVola tale eso（FNVDC12）

A Sere ni Lakosivia

1Ena gauna era a biuti Ijipita mai kina na Isireli;

Era a biuta mai kina na vanua tani na kawa i Jekope,

2Sa yaco o Juta me nona matatamata tabu,

Ka yaco me nona matanitu o Isireli.

3Sa raica na Wasa Damudamu ka sa dro;

Ka sa tu vakadua na wai ni Joritani.

4Era sa rika na veiulunivanua me vaka na me,

Ka ra rika na veidelana me vaka na sipi.

5Na cava sa manati iko Wasawasa o sa dro kina?

Na cava sa manati iko Joritani o sa tu vakadua kina?

6Na cava o ni sa rika kina na veiulunivanua me vaka na me?

Na cava o ni sa lade kina na veidelana me vaka na sipi?

7Mo sautaninini na vuravura ni sa lako mai na Turaga,

Ena mata ni Kalou i Jekope,

8O koya sa vukica na vatu me veitobu wai,

Kei na vatu kaukauwa me veimata ni wai.