1Era sa lewe vuqa sara na Isireli era vakasoqoni wavoliti Esera yani ni sa masu tiko ena mata ni Valenisoro, ni sa tagi ka vakatusa tiko na nodra i valavala ca. Oqo o ira na tagane, na yalewa, kei ira na gone, ka ra sa tagi vakalevu talega.
2A sa qai kaya vei Esera o Sekonaia na luve i Jeieli, mai na kawa i Ilama: “Keimami sai valavala ca vua na Kalou baleta ni keimami sa vakawatitaki ira na yalewa tani. E dina ga ni sa yaco na veika oqo, e se tiko ga na i nuinui me baleti Isireli.
3Ia oqo, e dodonu me keimami ia na veiyalayalati kei na noda Kalou me ra na vakatalai laivi o ira na yalewa oqo kei na luvedra. Keimami na vakayacora na ka ga o sa vakasalataka kei na nodra i vakasala o ira sa rokova na i vakaro ni Kalou. Keimami na vakayacora taucoko na ka sa vakarota na Lawa ni Kalou.
4Sa nomu i tavi mo vakayacora oqo. Keimami sa tokoni iko kina; ia mo yalodei ga, ka vakayacora sara vakakina.”
5A sa tucake o Esera ka cakava me ra vosa bubului o ira na nodra i liuliu na bete, kei na Livai, kei na lewenivanua ni ra na vakayacora na veika sa vakatura o Sekonaia.
6A sa qai biuta na matamata ni Valenisoro o koya ka curu ki na i tikotiko i Joanani na luve i Eliasipa tagane, ka tiko kina ena bogi taucoko, ka tagicaka tiko kina na nodra talaidredre o ira era a tiko vakabobula. A sa sega ni kania se gunuva e dua na ka.
7A sa qai vakau e dua na i tukutuku ki Jerusalemi kei Juta taucoko me ra soqoni vata yani ki Jerusalemi o ira kecega era sa suka lesu mai na veivakabobulataki,
8me vaka na nodra i vakaro na i liuliu vakamatanitu kei ira na nodra i liuliu na tamata. Kevaka e dua e sega ni yaco mai ena loma ni tolu na siga, ena taura vakaukauwa na nona i yau na matanitu, ena qai kau laivi talega mai vua na nona dodonu me okati tiko vakalewe ni koro.
9Era sa qai soqoni vata yani ki Jerusalemi o ira mai na vanua o Juta kei Penijamini ena loma ga ni tolu na siga, ka ra soqoni vata kece yani ena rara levu e mata ni Valenisoro, ka yaco oqo ena i ka ruasagavulu ni siga ni kaciwa ni vula. A sa tau bi vakalevu na uca ka ra sautaninini kecega na tamata ena vuku ni draki ca kei na i naki bibi ni nodra vakasoqoni vata mai ki na bose.
10Sa qai tucake o Esera na bete ka vosa vei ira, ka kaya: “O ni sa tamata tawa vakabauta ka vakacalai Isireli ena nomuni tauri ira na yalewa tani me watimuni.
11Ia oqo mo ni vakatusa mai na nomuni i valavala ca vei Jiova, na Kalou ni nomuni qase, ka cakava na ka me yalovinaka kina o koya. Me da qai bula tawasei keda tani mai vei ira na tamata era tu oqo ena noda vanua, ka mo ni biuti ira laivi talega na yalewa tani era sa watimuni.”
12Era sa qai kailavaka lesu na i sau ni vosa o ya o ira na tamata ka vaka, “Keimami na kitaka na veika cava ga o sa tukuna.”
13Era sa kaya talega, “Sa rui sivia na levu ni tamata era sa soqoni vata mai oqo, ka sa tau bi vakalevu na uca. E ka dredre toka me keimami tucake tu vakaoqo e tautuba. Na ka oqo ena sega ni qaravi ena loma ni dua se rua ga na siga, baleta ni sa lewe levu sara vei keimami sa coriti tu ena i valavala ca oqo.
14Me ra tiko ga e Jerusalemi o ira na neimami vakailesilesi ka qarava na leqa oqo. Ia me qai lako mai o koya vakayadua sa vakawati kei na yalewa tani ena dua na gauna lokuci, vata kei ira na i liuliu kei na dauveilewai ni koro. Na sala oqo ena vagolei tani kina na cudru ni Kalou me baleta na cala levu oqo.”
15A sa sega ni dua me saqata na i tuvatuva oqo ka vakavo duaduaga o Jonacani na luve i Asaeli tagane vata kei Josaia na luve i Tikiva tagane, ka rau sa tokoni mai vei rau o Mesulame kei Sapitai, e dua na Livai.
16Era sa vakadonuya na i tuvatuva o ya o ira era suka lesu mai na veivakabobulataki, ka sa lesia kina o Esera na bete eso vei ira ena kedra maliwa na turaga ni mataqali ka vola na yacadra. A tekivu na nodra veivaqaqai ena i matai ni siga ni katini ni vula,
17ka otivi taucoko sara na veivaqaqai ni tamata yadua era vakawati yalewa tani ena loma ni tolu na vula ka tarava.
O Ira Era Vakawati Yalewa Tani18Oqo na yacadra na tagane era vakawati yalewa tani:
Vei ira na bete, era sa volai vakavuvale:
Mai na kawa i Josua kei iratou na tacina tagane, na luvena tagane o Josateki: o Maseaia, kei Iliesa, kei Jaripi, vata kei Kitalaia.
19Eratou sa yalataka me ratou sere kei na dui watidratou, ka ratou vakacabora na sipi tagane me i soro ni nodratou i valavala ca.
20Mai na kawa i Imeri: o Anani vata kei Sepataia.
21Mai na kawa i Erimi: o Maseaia, kei Ilaijia, kei Simaia, kei Jeieli, vata kei Usaia.
22Mai na kawa i Pasuri: o Elionai, kei Maseia, kei Isimeli, kei Nacanieli, kei Josapati, vata kei Elasa
23Mai vei ira na Livai:
o Josapati, kei Semeai, kei Kelaia (yacana talega o Kilita), kei Peceaia, kei Juta, vata kei Iliesa.
24Mai vei ira dauvakatagi:
o Ilaiasipi
Mai vei ira na dauyadrava na Valenisoro:
o Saluma, kei Teleni, vata kei Uri.
25Mai vei ira na Isireli:
mai na kawa i Parosi: o Ramaia, kei Isaia, kei Malakaia, kei Maijamini, kei Iliesa, kei Malakaia, vata kei Penaia
26Mai na kawa i Ilama: o Matanaia, kei Sakaraia, kei Jeieli, kei Apiti, kei Jeremoci, vata kei Elaija.
27Mai na kawa i Satu: o Elieonai, kei Eliasipi, kei Matanaia, kei Jeremoci, kei Sapati, vata kei Asisa.
28Mai na kawa i Pepai: o Joanani, kei Enanaia, kei Sapei, vata kei Acelai.
29Mai na kawa i Pani: o Mesulame, kei Maluki, kei Atajia, kei Jasupi, kei Siali, vata kei Jeremoci.
30Mai na kawa i Peaci Maopi: o Atina, kei Kilali, kei Penaia, kei Meesea, kei Matanaia, kei Bisaleli, kei Pinui, vata kei Manasa.
31Mai na kawa i Arimi: o Iliesa, kei Isaia, kei Malikaia, kei Simaia, kei Simione,
32kei Penijamini, kei Maluki, vata kei Simaraia.
33Mai na kawa i Asumi: o Matinai, kei Mataca, kei Sapati, kei Ilifeleti, kei Jiremai, kei Manasa, vata kei Semeai.
34Mai na kawa i Pani: o Meatai, kei Emirami, kei Ueli,
35kei Penaia, kei Pitiaia, kei Kilui,
36kei Vaniya, kei Meremoce, kei Eliasipa,
37kei Matanaia, kei Matinai, vata kei Jeesau.
38Mai na kawa i Pinui: o Semeai,
39kei Selemaia, kei Necani, kei Ataia,
40kei Makanatipei, kei Sasei, kei Sarei,
41kei Esareli, kei Selemaia, kei Simaraia,
42kei Salumi, kei Amaraia, vata kei Iosefo.
43Mai na kawa i Nipo: o Jieieli, kei Matacaia, kei Sapati, kei Sipina, kei Jatai, kei Joeli, vata kei Penaia.
44Sa i koya oqo na tagane taucoko sara era vakawati yalewa tani. Era sa sere kei na watidra oqo ka vakatalai ira tani yani kei na dui luvedra.
Who We AreWhat We EelieveWhat We Do
2025 by iamachristian.org,Inc All rights reserved.
