1“I kemuni na Turaga sau, Kalou ni Isireli, keimami sa tagi yani vei kemuni e na lomabibi kei na yalovusolo.
2Moni rogoci keimami saka, moni yalololoma, ni keimami sa cala e matamuni.
3Oni lewa tawamudu, keimami sa rusa tawamudu.
4I kemuni na Turaga sau, Kalou ni Isireli, moni rogoca qo neimami masu na Isireli keimami sa vaka na mate, keimami luvedra na valavalaca vei kemuni e na nodra sega ni rogoca na vosa ni Turaga na nodra Kalou, sa mani keimami sotava tu ga na leqa lelevu.
5Moni kua ni nanuma nodra cala neimami qase; e na leqa qo, ni nanuma ga na nomuni sau kei na yacamuni.
6O kemuni na Turaga na neimami Kalou, o kemuni duadua saka keimami na vakacaucautaka.
7Oni sa vakacuruma i yalo i keimami na dokai kemuni me keimami masuti kemuni; keimami na dau vakacaucautaki kemuni e na neimami tu tani, ni keimami sa biuta tani e loma i keimami na nodra ca kece na tubu i keimami era a valavalaca e matamuni.
8Isa, keimami sa tu tani nikua e na vanua oni veitalayaki keimami kina, keimami sa mai vakamaduataki, laulauru, totogitaki baleta nodra cala na tubu i keimami e na nodra vakanadakuya na Turaga na neimami Kalou.”
Vakacaucautaki na yalomatua9 Vbale 4.20-22 I Isireli, rogoca na ivunau ni bula;
vakatudaliga, vulica na yalomatua!
10Baleta na cava, Isireli, na cava na vuna o sa tu kina e na nodra vanua na kemu meca,
o sa lai qase mai e vanua tani,
o sa dukadukali vata kei ira na mate,
11o sa wili vata kina kei ira mai Etesi?
12O sa vakanadakuya na vure ni yalomatua.
13Keo a muria na sala ni Kalou,
keo sa tiko vakacegu tawamudu.
14Mo kila se kune e vei na yalomatua,
na kaukaua, na vuku,
mo matata kina vei iko se e vei na bula balavu kei na bula vinaka,
na rarama kei na vakacegu.
15 Jope 28.12,20 O cei sa kunea na itikotiko ni yalomatua?
O cei sa curuma nona lololo?
16E vei o ira na ravouvou ni veimatanitu,
kei ira na lewa tu na manumanu ni vuravura;
17o ira na lasava na manumanuvuka,
kei ira na kumuna na siliva kei na koula,
na inuinui ni tamata,
sega ni mudu nodra vaqara;
18o ira na vere mera rawa siliva, era nuiqawaqawa,
nodra cakacaka e sega ni katumi rawa?
19Era sa yali, era sa siro i Etesi,
e so tale era sa vura me kedra isosomi.
20Era sa vura mai na itaba vou,
ra mai tiko e vuravura,
era sega ga ni kila se rawa vakacava na vuku
se mera kunea na kena sala,
se mera yacova yani.
21O ira na luvedra era sa sese sara mai na kena sala.
22E sega ni se kilai mai Kenani,
se laurai mai Temani;
23o ira na luve i Eka era vaqara na vuku e vuravura,
o ira na dauveivoli mai Merani kei Temani,
o ira na dautukuni kei na dau vaqara na vuku,
era sega ni kila se rawa vakacava na yalomatua
se mera vakasamataka na kena sala.
24I Isireli, e wacava tu na levu ni vale ni Kalou!
E wacava tu na levu ni vanua e nona!
25E vakaitamera sega ni vakaiyalayala;
e cecere, sega ni katumi rawa.
26 Vteki 6.4; Ym 14.6 Era sucu e kea na tuwawa era a dau rogo e liu,
era tamata lelevu qai matai e na ivalu.
27A sega ni digitaki ira na Kalou
se dusimaka vei ira na sala me rawa kina na vuku;
28era mani mate, ni sega vei ira na yalomatua,
era mate e na nodra lialia.
29O cei sa cabe mada i lomalagi me vesuki koya,
qai kevutaki koya mai na o?
30O cei sa soko wasa me kunei koya,
me qai volia e na koula uasivi?
31E sega ni dua e kila na vanua e tu kina,
se me leqataka na kena sala.
32Ia o koya e kila na ka kece,
sa kilai koya sa kunei koya e na nona vuku.
O koya a vakarautaka na vuravura me tawamudu,
qai vakasinaita e na manumanu yavaiva;
33o koya a kaya me rarama, mani rarama mai;
a kaciva, mani vakarorogo vua e na veidokai;
34era cila e na marau na kalokalo e na nodra dui gauna ni yadra;
a kacivi ira, era qai kaya, “O keimami qo!”
Era cila e na reki e na vuku i koya a buli ira.
35Qo na noda Kalou;
e sega tale ni dua merau tautauvata kaya!
36Sa kunea na sala dina ni vuku,
qai solia vei Jekope nona italai,
kei Isireli o koya a dau lomana.
37Sa qai basika e vuravura na yalomatua me maliwai keda.
Who We AreWhat We EelieveWhat We Do
2025 by iamachristian.org,Inc All rights reserved.
