Same 78 - Vakavakadewa Vou kei na iVola tale eso（FNVDC12）

1Ni vakarorogo, na noqu tamata, ki na noqu i vakavuvuli,

Ka rogoca na ka au sa kaya.

2Au na vakayagataka na veivosa ni vuku momona eso

Me vakamacalataki kina na veika vuni ni gauna sa oti,

3Na veika eda a rogoca ka kila,

Na veika era a tukuna vei keda na noda qase.

4Eda na sega ni vunitaka oqo vei ira na luveda;

Eda na tukuna ga vei ira na i tabatamata ka tarava

Na qaqa i Jiova kei na nona veicakacaka kaukauwa,

Kei na nona cakacaka veivakurabuitaki sa vakayacora.

5Sa solia na lawa vei ira na Isireli

Kei na i vakaro vei ira na kawa i Jekope,

Sa vakaroti ira na noda qase

Me ra vakatavuvulitaka na nona lawa vei ira na luvedra,

6Me ra na vulica kina na nona lawa na i tabatamata ka tarava,

Ka me ra na qai tukuna talega vei ira na luvedra.

7Ena ka oqo era na vakadinata talega kina na Kalou

Ka sega ni guilecava na ka sa cakava,

Ia, era na dautalairawarawa ga ki na nona i vakaro.

8Me ra na kakua ni vakataki ira na nodra qase

E dua na matatamata dauveisaqasaqa ka dautalaidredre,

E sega ni dei na nodra vakabauta na Kalou

Ka sega ni yalodina tikoga vua.

9O ira na Ifereimi era vala ena dakaititi kei na kena gasau

Era a dro ena siga ni valu.

10Era sa sega ni vakayacora na nodra veiyalayalati kei na Kalou;

Era sa bese ni muria na nona lawa.

11Era sa guilecava na ka sa cakava o koya,

Kei na veika mana sa vakaraitaka vei ira.

12Ena gauna era a vakararai tu kina na nodra qase

A sa qai cakava na Kalou na cakacaka mana

Ena buca o Soani ena vanua o Ijipita.

13A sa wasea rua na wasawasa ka liutaki ira yani,

A sa cakava na wai me ra duri tu me vaka na bai.

14Sa liutaki ira ena dua na o ena siga,

Kei na veibogi kece na bukawaqa.

15Sa voroka na vatu ena vanua dravuisiga,

Ka vagunuvi ira ena wai mai na boto ni qele.

16Sa cakava me drodro mai e dua na uciwai mai na vatu

Ka vakavuna me drodro tu na wai me vaka na uciwai.

17Ia, era sa qai valavala ca tikoga vua na Kalou,

Ka veisaqasaqa kei koya sa Cecere Sara ena vanua dravuisiga.

18Era sa nakita me ra vakatovolea na Kalou

Ena nodra vinakata na kakana era via kania.

19Era sa vosa vakacataka na Kalou ka kaya,

“Sa rawata li na Kalou me solia vei keda na kakana ena vanua dravuisiga?

20E dina taucoko ni a mokuta na vatu

Ka sa vure mai kina na wai,

Ia e rawa li me na solia na keda madrai,

Ka solia vei ira na nona tamata na lewe ni manumanu?”

21Ia sa cudru sara na Kalou ni sa rogoci ira;

Ka sa ravuti ira kina ena bukawaqa,

Ka toro cake sara na nona cudruvi ira,

22Baleta ni ra sa sega ga ni vakabauti koya

Ka sega ni vakabauta ni sa rawa vua me vakabulai ira.

23Ia, sa qai vosa cake o koya ki na maliwa lala

Ka vakarota na kena veikatuba me ra tadola;

24A sa solia vei ira o koya na sila mai lomalagi,

Ena nona solia sobu mai na mana me ra kania.

25Era sa qai kania na kedra kakana na agilosi,

A sa solia na Kalou na ka kece sara era sa gadreva.

26Ia, sa qai vakavuna me liwa e dua na cagi tokalau

Ka sa vakavuna me liwa mai na ceva ena nona kaukauwa,

27Ka talai ira sobu mai na manumanu vuka me vaka na kuvu ni soso,

Ka vuqa sara me vaka na mataninuku e matasawa.

28Era sa tau ena maliwa ni nodra keba,

Ka ra vakavolivolita na nodra veivalelaca.

29Era sa kana na tamata ka ra mamau;

Sa solia vei ira na Kalou na veika kece era gadreva.

30Ia, era se sega ga ni ra vakacegui

Ka ra se ia ga na kana,

31A sa qai cudruvi ira na Kalou,

Ka vakamatei ira na nodra tamata qaqa,

O ira na cauravou vinaka duadua ni Isireli.

32E dina ga ni yaco oqo, era sa ia ga na i valavala ca na tamata;

Ka sega ni via vakabauta.

33A sa muduka kina o koya na nodra siga me vaka na i cegu

Kei na nodra bula ena leqa tubu koso.

34Ena gauna e vakamatea kina eso vei ira o koya

Era na gole sara mai vua na kena vo,

Era sa veivutuni sara ka masu vagumatua vua.

35Sa qai nanuma ni sa nodra dauveitaqomaki na Kalou,

Ka sa nodra i Vakabula o koya sa Cecere Sara.

36Ia, sa lasu kecega na nodra vosa;

Ka ra sa vosa ni veicavilaki wale ga.

37Era a sega ni yalodina vua,

Ka ra sega ni yalodina ena nodra veiyalayalati kei koya.

38Ia, sa yalololoma ga na Kalou vei ira na nona tamata.

A sa vosota na nodra i valavala ca,

Ka sa sega ni vakarusai ira.

Sa dau vakavuqa me tarovi koya me kakua ni cudru,

Ka sa lewai koya vinaka me sega ni cudru vakalevu sara.

39Sa nanuma ni ra sa tamata ga,

Ka vaka na cagi sa liwa mai ka takali sara yani.

40Era sa saqati koya vakavuqa ena vanua dravuisiga

Ka ra sa vakararawataki koya vakalevu.

41Era sa vakatovolea vakavuqa sara na Kalou,

Ka vakacudruya na Lewe Dua Yalo Savasava ni Isireli.

42Era sa guilecava na nona kaukauwa levu;

Kei na gauna a vakabulai ira kina mai na kedra meca.

43Ka cakava na nona cakacaka kaukauwa kei na cakacaka mana,

Ena buca o Soani ena vanua o Ijipita mai na nodra veiuciwai.

44A sa vukica na veiwai me dra; sa qai sega kina na medra

Wai ni gunu na kai Ijipita.

45A sa tala na yavusa lago ena kedra maliwa me vakararawataki ira,

Kei na boto me vakacacana na nodra vanua.

46A sa talai ira na nuve o koya me ra kania na nodra i teitei

Kei na vodre me ra vakacacana na nodra vanua.

47Sa vakamatea na nodra veivaini o koya ena uca cevata

Kei na nodra vunilolo ena tegu cevata.

48Sa vakamatea o koya na nodra bulumakau ena uca cevata

Kei na nodra qele ni sipi ena yaseyase.

49Sa vakayacora vei ira na nona cudru waqawaqa.

Ka sa vakavuna me ra rarawa sara vakalevu,

Ena nona talai ira mai na agilosi dauveivakarusai.

50A sega ni tarova na nona cudru o koya

Se vakavoca na nodra bula,

Ia sa vakamatei ira ena dua na mate dewa.

51A sa vakamatea o koya na ulumatua

Ni veivuvale kecega e Ijipita.

52Ia sa qai liutaki ira yani na nona tamata o koya

me vaka e dua na i vakatawanisipi,

Ka tuberi ira yani ena vanua dravuisiga.

53A sa kauti ira vakavinaka yani o koya ka ra sa sega ni rere

Ia sa ubi ira na kedra meca na wasawasa.

54A sa kauti ira mai ki na nona vanua tabu ki na veiulunivanua,

Sa vakamalumalumutaka o koya vakaikoya.

55A sa qai vakasavi ira yani na kena i taukei

ni ra sa toso mai na nona tamata;

Sa wasea o koya na vanua vei ira na veimataqali ni Isireli,

Ka laiva me ra tiko e kea ena nodra valelaca.

56Ia era sa qai veisaqasaqa kei na Kalou Kaukauwa

Ka vakatovolei koya.

Era sega ni muria na nona i vakaro.

57Ia era sa dauveisaqasaqa ka sega ni yalodina me vakataki ira na nodra qase,

Ka ra sa sega ni nuitaki me vaka na gasau ni dakaititi veve

58Era sa vakacudrui koya ena nodra veivanua ni qaravi kalou tani,

Ka vakavuvutaki koya ena nodra matakau;

59Ka sa cudru vakalevu na Kalou ni raica na ka era cakava;

Sa qai biuti ira tani na Isireli.

60A sa biuta na nona valelaca mai Sailo o koya

Na vanua sa tiko kina ena kedra maliwa na tamata.

61A sa solia na nona Kato ni Veiyalayalati me ra vesuka na meca,

Na vanua e dau kune kina na nona kaukauwa kei na nona lagilagi.

62A sa cudruvi ira na nona tamata o koya

Ka solia me ra vakamatei ira o ira na kedra meca.

63Era sa mate na nodra cauravou ena i valu,

Ka sa sega ni dua me ra vakawati kei ira na nodra goneyalewa.

64Era sa mate na bete ena i seleiwau,

Ka ra sa sega ni rawa ni tagicaki ira na nodra vada.

65Sa qai yadra mai na Turaga me vaka e dua mai na moce;

Sa vaka na tamata qaqa sa kaila ena vuku ni waini.

66Sa vakasavi ira lesu na kena meca o koya

Ena druka veivakamaduataki e sega ni oti rawa.

67A sa cati ira na kawa i Iosefo o koya,

Ka sega ni digitaka na mataqali i Ifereimi.

68Ia, a sa qai digitaka ga na yavusa o Juta,

Io, na ulunivanua o Saioni ka sa daulomana.

69A sa tara mai kea na nona vale tabu

me vaka na nona i tikotiko mai lomalagi,

A sa vakadeitaka me vaka na vuravura,

Ka taqomaki vinaka ena veigauna kecega.

70A sa digitaka na nona dauveiqaravi o Tevita

Ka kauti koya mai na vanua ni vakatawa sipi.

71A sa buli koya na Turaga me nodra tui na Isireli,

Me nodra i vakatawa na tamata ni Kalou.

72A sa qaravi ira o Tevita ena yalodina,

Ka liutaki ira ena ligana maqosa.

A Masu me Sereki na Matanitu

A Same i Esava.