Jeremaia 37 - Vakavakadewa Vou kei na iVola tale eso（FNVDC12）

Kerekere i Setekaia

1A lesi Setekaia na luve i Josaia o Nepukanesa na tui Papiloni me tui e Juta me i sosomi kei Jo-akini na luve i Jo-akimi.

2Ia o Setekaia vata kei ira na nona vakailesilesi kei ira na tamata era sega ni muria na vosa ni Turaga o Jiova a tukuna o Jeremaia na parofita.

3Ia a mani talai rau o Jiukali na luve i Selemaia, kei Sefanaia na luve i Maseia na bete o Setekaia me rau lako vei Jeremaia na parofita ka kaya vua, “Ni yalo vinaka mo ni masulaki keimami vei Jiova na Kalou.”

4E a veilakoyaki voli ga o Jeremaia vei ira na tamata ka sega ni biu ki na vale ni veivesu.

5Ena gauna vata o ya, a ra sa biuti Ijipita mai na mataivalu nei tui Ijipita, ia ni ra sa rogoca oqo na kai Papiloni ka ra kabai Jerusalemi tiko, era sa mani vakasuka tani mai kea.

6A sa qai kaya vei Jeremaia na parofita o Jiova, na nodra Kalou na Isireli,

7Tukuna vua na tui Juta, o koya e talai kemudou mai mo dou mai tarogi au, ‘Na mataivalu i tui Ijipita sa lako tiko mai me vukei iko ena lesu tale ki Ijipita.

8Ia era na qai lesu tale mai na kai Papiloni. Era na mai valuta na koro; era na taura vakaukauwa ka vakama.”

9A sa kaya o Jiova, “Mo ni kakua ni vakacalai kemuni ena nomuni sa nanuma ni ra na sega ni lesu tale mai na kai Papiloni, era na lesu dina ga mai.

10Kevaka sara mada ga o ni vakadruka na mataivalu kece ni Papiloni e samuti kemuni ka ra qai vo ga e vica na tamata era a davo vuetaki kece tu ena nodra valelaca, e ratou na tucake tale na tamata oqori ka vakama na koro oqo.”

11Era a vakasuka na mataivalu ni Papiloni mai Jerusalemi baleta ni ra sa voleka mai na mataivalu i tui Ijipita.

12A cavutu o Jeremaia me biuti Jerusalemi me lako ki na vanua i Penijamini me la'ki taukena na nona i votavota ni vanua vei ira na kai nona.

13Ia ni yaco yani ki na matamata i Penijamini, e a yadra tiko e kea o Irijia na nodra i liuliu na yadra, a tarovi Jeremaia ka kaya vua, “O sa tovata li kei ira na kai Papiloni?”

14A qai kaya o Jeremaia, “A sega ni ka dina oqori, au sa sega ni vuki vei ira na kai Papiloni.” A sega ni via rogoci koya o Irijia. A vesuki Jeremaia ka kauti koya vei ira na vakailesilesi.

15A kanakuita ka mai sogo tu yani ena vale i Jonacani na vunivola. E a caka na nona vale me vale ni veivesu.

16A biu o Jeremaia ena dua na vale ni veivesu ena loma ni qele, ka maroroi tiko e kea me dua na gauna balavu.

17A lewa o Setekaia na tui me kau mai vua o Jeremaia, ka mai vakatarogi koya vuni ena valenitui, “E bau dua li na i tukutuku mai vei Jiova?” A qai kaya o Jeremaia, “Sa tiko oqo,” a vakuria tale, “O na soli yani ki na ligana na tui Papiloni.”

18Ia a qai taroga o Jeremaia, “Na cala cava au sa cakava vei kemuni, se vei ira na nomuni vakailesilesi, se vei ira na tamata oqo ka vakavuna na nomuni biuti au ki na vale ni veivesu?

19Sa e vei na nomuni parofita era a tukuna vei kemuni ni ra na sega ni samuti kemuni o tui Papiloni kei na vanua oqo?

20Ia oqo kemuni na turaga na tui, au kerea mo ni rogoca na noqu kerekere malumalumu. Ni yalo vinaka ni kakua ni vakatalai au lesu tale ki na vale i Jonacani na vunivola, de'u na qai la'ki mate e kea.”

21A qai vakarota o Setekaia me biu o Jeremaia ena lomanibai ni vale ni veivesu, ka dau soli tiko vua e dua na i buli madrai ena dua na siga mai vei ira na daubuli madrai me yacova ni oti kece sara na madrai ena koro. A biu tikoga o Jeremaia ena lomanibai ni vale ni veivesu.