Josua 11 - Vakavakadewa Vou kei na iVola tale eso（FNVDC12）

Vakadrukai na Matanitu Cokovata ni Vualiku kei Kenani

1Ni sa rogoca o Japini na tui Asori na i rogorogo ni qaqa, sa vakauta sara na nona i tukutuku vei Jopapa na tui Matoni, ki vua talega na tui Simironi kei na tui Akisafi,

2kei ira kece na tui ena vanua veidelana ki na vualiku, vei ira talega ena Buca o Joritani ka koto ena ceva ni drano o Kalili, kei na buca ena baravi volekati Doro.

3Sa vakau i tukutuku talega vei ira na kai Kenani ena tai ruarua ni Joritani, na Amoraiti, na Itaiti, na Perisaiti, kei ira na Jepusaiti ena vanua veidelana, ka vakakina o ira na Aivaiti ka ra tiko ena ruku ni ulunivanua o Erimoni ena vanua o Misipa.

4Era sa lako kece na tui oqori kei ira na nodra mataivalu, ka vaka na mata ni nuku ni matasawa na kedra levu. Sa levu talega na nodra ose kei na nodra qiqi ni valu.

5Era sa cokovata na tui kece oqori kei na nodra mataivalu, ka lako vata mai, ka tara na nodra keba ena bati ni wai o Meromi me ra valuti ira na Isireli.

6Sa qai vosa vei Josua o Jiova ka tukuna, “Mo kakua ni rerevaki ira. Ena gauna vata oqo ni mataka, au sa na vakamatei ira kece sara ena vuku i Isireli. Mo ni taya me cavuka na uwa ni yava ni nodra ose kece ka vakama na nodra qiqi ni valu.”

7Era sa qai lako yani vakasauri o Josua kei na nona mataivalu ka valuti ira ena wai o Meromi.

8A sa solia o Jiova me ra qaqa na Isireli; era sa ravuravu na Isireli ka vakasavi ira yani vaka ki na vualiku me yaco sara yani ki Sitoni Levu kei Misirefoci-meimi, ka yaco sara ki na buca o Misipa ena tokalau. Era sa vala tiko me yacova sara ni sa sega tale ni dua na meca e vo.

9A sa vakayacora vei ira o Josua me vaka sa vakaroti koya kina o Jiova, a sa taya cavuka na uwa ni yava ni nodra ose kece, ka vakama na nodra qiqi ni valu.

10A sa qai lesu tale o Josua ka vakamalumalumutaki Asori ka vakamatea na kena tui. O Asori na nodra i liuliu na veimatanitu kece o ya.

11Era vakamatei ira kece sara na tamata ka ra tiko kina, ka sega tale ni vakavo e dua me bula, ka vakama talega na koro.

12A sa vakamalumalumutaka na veikoro kece oqo kei na nodra tui, o Josua, ka vakamatei ira kece na lewena me vaka sa vakarota o Mosese na tamata ni Kalou.

13Ia era sa sega ga ni vakama o ira na Isireli na veikoro ka tara ena dela ni yavu, vakavo duadua ga o Asori na koro ka vakama o Josua.

14Era sa kauta na Isireli me nodra na veiyau talei kece kei na manumanu yava i va kecega mai na veikoro kece o ya. Ia, na tamata ga era a vakamatea, ka sega ni laiva e dua me bula.

15E a solia o Jiova na nona i vakaro vua na nona tamata o Mosese, ka vakadewataka o Mosese vei Josua, ka sa talairawarawa kina o Josua. A sa vakayacora o koya na veika kece sara sa vakaroti Mosese kina o Jiova.

Na Veivanua sa Ravuta o Josua

16A sa rawa na vanua taucoko o Josua o ya ena veidelana, kei na ruku ni veidelana ena vualiku kei na ceva, na yasayasa taucoko sara vaka-Koseni kei na vanua talasiga ena ceva, ka vaka talega kina na Buca o Joritani.

17Me vakatekivu mai na ulunivanua o Alaki volekati Sia me yaco sara yani ki Peali-kata ena buca kei Lepanoni ena ruku ni ulunivanua o Erimoni. A sa vesuki ira tiko na tui kece oqo, o Josua, ena dua na gauna balavu.

18E a valuti ira tiko na tui kece oqo, o Josua ena dua na gauna balavu.

19A sa sega sara ni dua vei ira na veikoro o ya e veisaututaki taumada kei ira na Isireli, vakavo ga o Kipioni na vanua era tiko kina eso na Aivaiti. Na veivanua tale eso era sa rawai ni ra moku ena i valu.

20A sa vakaukauwataka na yalodra o Jiova me ra tu ka vala kei ira na Isireli, me na rawa kina me ra vakawabokotaki vakadua ena sala sa sega kina na loloma. A sa yaco oqo me vaka na ka sa vakaroti Mosese kina o Jiova.

21Ena gauna vata oqo, sa lako yani kina o Josua ka vakamatei ira na Anaki, o ya o ira na kawa ni tuwawa ka ra tawana na vanua veidelana; mai Epironi, mai Tepiri kei Anapi kei na vanua veidelana e Juta kei Isireli. A sa vaqeyavutaki ira vakadua o Josua ka vakarusa na nodra veikoro.

22A sa sega tale vei ira na kai Anaki e vo me bula ena vanua o Isireli. Ia, era lewe vica wale era bula tiko e Qasa, Kaca, kei Asitoti.

23A sa vakamalumalumutaka na vanua taucoko o Josua, me vaka sa vakaroti Mosese kina o Jiova. Sa qai solia o Josua na veivanua kece oqori vei ira na Isireli me ra taukena ka wasewasea ki na nodra veimataqali yadua.

Era sa qai vakacegu na tamata ni sa mudu na i valu.