Tobita 11 - Vakavakadewa Vou kei na iVola tale eso（FNVDC12）

1Oti, sa gole o Tobia ni vakacaucautaka tiko na Kalou e na katoa ni nona ilakolako. A yalataka ni na rokovi rau na veiwatini o Rakueli kei Etenā e na nona bula taucoko.

Sa yaco i vale na ilakolako

Sa qai toso na ilakolako me yacova nirau sa volekata na koro o Kasetini, e na saula kei Ninive.

2Sa qai kaya o Rafaele vei Tobia, “Na wekaqu, o kila na ituvaki ni bula nei tamamu e nomu biuti koya mai.

3Vakacava medaru sa liu, muri mai na watimu, medaru lai vakarautaka na vale.

4Kauta tiko mai na mina ni ika.” Erau sa mani liu, muri rau tiko yani na koli.

5A dabe toka o Ana, vakaraica matua toka na gaunisala me namaki luvena.

6Ni qai raici koya ni lako tiko mai, sa kaya vei tamana, “Raica, sa lako tiko mai na luvemu, kei na nona lewenisala!”

7A kaya o Rafaele, “Au kila, Tobia, ni na rai na mata i tamamu.

8Mo boroya na matana e na mina ni ika; ni katia ga, e na qilia sara, e na qai lutu na seila, e na qai raici iko.”

9Sa qai cici yani o Ana me tavaki rau, a mokoti luvena, tukuna vua, “Au sa qai raici iko na luvequ; veitalia meu mate yani.” Sa qai tagi.

Rai tale o Tobita

10A lako yani o Tobita i katuba, mani tacaqe, qai cici yani o luvena,

11tabei tamana, uvuca na matana qai sevuka kina na mina ni ika, a kaya, “Kua ni leqa tamaqu.”

12Caka 9.18Me vaka ni tekivu mosi na matana, sa qilia,

13qai kalia na seila e tutu ni matana.

14Sa qai mokoti luvena, tagi, qai kaya, “Au sa qai raici iko luvequ, noqu isakisaki! Moni lagilagi na Kalou, me lagilagi tawamudu na yacamuni, ra lagilagi na nomuni yagilosi tabu kece,

15nioni a vakararawataki yau, oni sa qai lomani yau; au sa raica qo na luvequ o Tobia!” Sa qai curu mamarau yani o luvena, vakacaucautaka na Kalou e na domolevu, talanoataka vei tamana na veika lelevu a yaco vua mai Mitia, ni sega wale ga ni kauta mai na ilavo, sa vakawatitaki Sera na luve i Rakueli, ia o Sera sa voleka sara ni yacova na matamata ni koro o Ninive.

Yaco mai o Sera

16Sa qai curu yani o Tobita e na marau kei na vakacaucautaka na Kalou, me lai tavaki vugona kina. Era kurabui na raici koya e gaunisala ni sa tayabe duadua, sega ni dua e tuberi koya.

17Sa qai vakavinavinakataka e matadra o Tobita na loloma ni Kalou e na nona vakamataraitaki koya. Ni sa voleka yani vei Sera, na vugona, sa vakalougatataki koya a kaya, “Matavinaka mai na vugoqu! Me vakalagilagi na Kalou, ni sa kauti iko mai; merau kalougata tale ga o tamamu kei tinamu vaka kina o kemudrau kei luvequ o Tobia. Matavinaka mai nomu vuvale vou. Me nomu tu ga na bula vinaka kei na marau.” Era sa mamarau kece na wekana e Ninive.

18Erau a lako mai o Ahikari kei na vugona o Natavi,

19sa qai solevutaki na vakamau nei Tobia e na malaude.