1Dou uvuca na davui e Saioni;
Dou vakatagica na alamu
Ena noqu ulunivanua tabu!
Dou sautaninini na leweniveivanua,
Ni sa lako mai na siga i Jiova.
2E dua na siga vakaturubuto,
E siga ni veio butobuto levu!
Sa tadu mai na mataivalu qele ni vodre levu
A sa vaka na buto e solega na veiulunivanua;
E se qai yaco vakadua oqo,
Ka na sega ni yaco tale maimuri.
3Sa liu vei ira na bukawaqa ka veivaqeavutaki;
E dakudra talega na yameyame ni buka ka veivakamai;
Sa koto e matadra na vanua sa tautauvata kei na i teitei o Iteni;
Ia, e dakudra, na dravuisiga ka sega na ka e dro bula.
4 Vtaki 9.7-9 Na kedra i rairai sa vaka na ose;
Era sa cici me vaka na ose ni valu.
5Ni ra sa ladeva na dela ni veiulunivanua,
Era sa vaka na rorogo ni qiqinivalu;
Ka cacalidilidi me vaka na rorogo ni kama ni co mamaca.
Era sa tuvani tu me vaka e dua na mataivalu levu
Sa vakarau me vakacibi i valu.
6Era sa taqaya sara na tamata ni ra basika mai;
Sa tavuki na matadra kecega ena rere.
7Era sa vakataki ira na mataivalu sa kaba koro
Me vakataki ira na sotia era sa kabata na bai.
Era ravuravu vakadodonu ki na nodra dui sala
Ka sega e dua me gole tani mai na nodra gaunisala.
8Era sega ni veidrigidrigiti,
Era dui muria ga na nodra gaunisala;
Era bolea na gasau ka sega ni tu vakasuka.
9Era ladeva na koro,
Ka ra ciciva na dela ni bai;
Era curu botea yani na veivale,
Ka curu yani e katubaleka me vaka na daubutako.
10 Vtaki 8.12 Sa uneune na vanua era butuka yani
Ka sakure na lomalagi.
Sa tabogo na matanisiga kei na vula,
Ka ra tabonaka na kedra rarama na veikalokalo.
11 Vtaki 6.17 A sa tabalaka na domona na Kalou
Ki vua sa liutaki ira na nona mataivalu;
Ni sa vakaitamera na nona mataivalu,
O koya sa tu vua na lewa
Me vakayacora na nona vosa sa kaukauwa.
Ni sa ka levu ka rerevaki na siga i Jiova;
O cei ena vosota rawa?
12“Ia oqo ga,” sa kaya o Jiova,
“Dou lesu mai vei au ena yalomudou taucoko,
Dou lolo talega, ka tagi ena vakaloloku.
13Me dusia na nomudou veivutuni dina
Na yalo sa raramusumusu;
Ni sa sega ni yaga na dresulaki wale ga ni nomudou i sulu.”
Dou lesu vei Jiova na nomudou Kalou,
Ni sa yalovinaka ka yalololoma o koya;
Sa berabera na nona cudru
Ka vutuniyau ena loloma sa tudei;
Dou veivutunitaka na nomudou caka cala.
14O cei li e kila rawa
De veisautaka na lomana o Jiova na nomudou Kalou
Ka vakalougatataki kemudou ena sautu ni kakana.
Dou na qai rawa ni vakacaboisoro kina vua.
15Dou uvuca na davui mai Saioni;
Dou vakatabuya e dua na siga ni lolo;
Dou kaciva e dua na vakasoqoni vata!
16Vakasoqoni ira mai na tamata;
Vakasavasavataki ira na lewenivanua;
Vakasoqoni ira vata mai na qase,
Kauti ira mai na gone lalai,
Kei ira talega na gone dramidrami.
O ira talega era se qai vakawati vou
Me ra biuta na nodra rumu ka lako mai.
17 1M 7.36-38 Me ra tagi ga ka cabo masu
O ira na bete kei na i talatala i Jiova dauveiqaravi
Ena maliwa ni matamata ki na Valenisoro
Kei na i cabocabonisoro, ka kaya:
“Ni yalololoma vei ira na nomuni tamata, na Kalou,
Ni kakua ni cudruvi keimami
Se me ra vakalialiai keimami na veimatanitu
Ni ra sa kaya, “Evei na nomudou Kalou?”
Na Kalou sa Vakalougatataka Tale na Vanua18A sa kauwaitaka tale o Jiova na nona vanua
Ka yalololoma tale vei ira na nona tamata.
19Sa qai kaya o Jiova
Vei ira na nona tamata:
“Raica, au na solia yani vei kemudou
Na sila, na waini, kei na waiwai
Mo dou mamau kina:
Ka'u na sega ni laivi kemudou tale
Mo dou vakalialiai mai vei ira na veimatanitu.
20“Au na kauti tani na mataivalu qele ni vodre sa lako mai na vualiku;
Ka'u na vakatala eso vei ira ki na vanua lala,
Na i yatu e liu era na vakatalai ki na Waitui Mate,
Kei na i yatu e muri ki na Meditereni.
Ena tete na boi ca ni yagodra mate.
Au na vakarusai ira ena vuku ni veika era sa cakava vei kemudou.
21Mo kakua ni rere, na vanua;
Mo reki ga ka marau,
Ni sa cakava na veika lelevu o Jiova!
22Dou kakua ni rere, na manumanu ni vanua,
Ni sa tubu na veico ena veikau;
Sa vuataka na vuana na kau,
Na lolo kei na vaini sa vua vakalevu sara.
23Dou marau, na luve i Saioni,
Ka reki ena Turaga, na nomudou Kalou,
Ni sa vakatauca na uca
Me nomudou i vakadinadina;
Sa vakatauca vakalevu na uca vei kemudou,
Na uca taumada kei na uca taumuri
Me vaka ena gauna e liu.
24Na buturara ni qaqi sila
Ena sinai ena sila,
Ena vuabale na taqe
Ena waini kei na waiwai.
25Au na sauma lesu vei kemudou na veiyabaki
Sa kania na qele ni vodre,
Na vodre ladelade, na vodre ququru
Kei na vodre dauveivakarusai.
Ni sai au ga sa tala yani vei kemudou
Na mataivalu oqo.
26“Dou na sautu ena kakana ka mamau,
Ka vakacaucautaka na yaca ni nomudou Turaga
Na nomudou Kalou,
O koya sa mana na nona cakacaka vei kemudou
Ia era na sega tale ni na vakamaduataki na noqu tamata.
27Dou na qai kila ni'u sa tiko kei ira na Isireli,
Sa i au ga o Jiova, ka'u sa nomudou Kalou,
Ka sa sega tale e dua.
Era na sega tale vakadua
Ni vakamaduataki na noqu tamata.
28Ia ena qai yaco ena gauna mai muri,
Ka'u na sovaraka na yaloqu
Vei ira na tamata kecega;
Era na parofisai na luvemudou gonetagane
Kei ira na luvemudou goneyalewa,
O ira na nomudou qase
Era na tadra na tadra eso,
Kei ira na nomudou cauravou
Era na raica na raivotu.
29Au na sovaraka talega na yaloqu
Vei ira na bobula tagane kei na yalewa
Ena gauna o ya.
30Ia ka'u na vakatakila na veika e veivakidacalataki mai lomalagi e vuravura talega, na dra, kei na bukawaqa kei na duru kubou.
31Maciu 24.29; Mari 13.24,25; Luke 21.25; Vtaki 6.12,13Na matanisiga ena vuki me butobuto, kei na vula me dra, ena qai yaco mai e muri na siga i Jiova, na siga levu ka rerevaki.
32Caka 2.17-21 Roma 10.13Ia mai muri, o koya yadua ena masuta na yaca i Jiova e bula: Io, ena ia na veivakabulai mai na ulunivanua o Saioni, kei Jerusalemi, me vaka sa kaya o Jiova. Io, vei ra sa vakabulai ena tiko kina eso au sa kaciva.
Who We AreWhat We EelieveWhat We Do
2025 by iamachristian.org,Inc All rights reserved.
